1 Ani pajukun bu Cidon baa Cidon ri conni ba mikyin dzundzun, ní tsa kokeni kata ci tsadzu waa Cidon ri tsa. 2 Ní tsa buni kata ki fin con ci tsadzu waa Yesu Kiristi con'i ku nde dia hwa aki kiyo yi Cidon ki cin'i. Cidon mbu mikyin ba aki wa penrei waa ku hu ra. 3 Tsadzu waa ni d pajukun bu Cidon ra, san'a waa ni tsa agya ba, ba abu baa ci aso, ba abu wa ngingi. San'a waa nina zen aji ki cin abu baakara ki finni ba. 4 Niká zen aji wa soso ba, niká zen aji jeje numa ba, ko aji wari da doni mikyin wa tsa aso, ama nína mbu mikyin yi Cidon. 5 Ní yinu danra, ko apa wani kata wa mana tsa aso, ko aji wa baba wa gaga ki mikyin'a, ko apa wa ngingi bu, ku ba apa wa wa aki kata ci abu dzundzun. Kuri dua abu dzun ki bye abu waa Yesu Kiristi ri yi pajukun bua hora ba, kuri kakaa ki ndo Cidon ki don ba. 6 Niká zen nde fan zo yi apa dzun ku byeni ba aji wa dán numa ba, ki cin waa ki bye abu baakara Cidon ri pan pajukun kwen ki cin waa be gonbe tson fo ajia ba. 7 Ki cin wakara ní gadi ba tswi pajukun baakara. 8 Andi gbogbo ani ba dini ni ci fin afi tse, ama tanma ni ci fin bye wa yafan jinni bu Cidon, ci numa ra ní tsa abu ci tsadzu pajukun baa ci fin bye wa yafan jinni. 9 Ki cin waa abye wa yafan jinni ri mba abu wa sansan wa tsatsa ba abu wa byenbyen ba aji wajinderi ri bi. 10 Ní nga ni tsa abu wa we hwan bu Cidon. 11 Ní gadi ba abu baa dán numa baa pajukun ri tsa ki fin fitse, ama ni fu abu baaji nya myi ki bye wa yafan jinni. 12 Ko aji wa zenzen ki cin abu waa bena tsa yuyu rama ci abu wa pan tsenni kagben. 13 Ko ka ke kata waa bena tsa yuyu ra anyunu waa bema pwadzu ki myi ki bye wa yafan jinni ra hunnu ri tà yibe cinnabe waa be ci. 14 Ki cin waa ko kake kata wama ci ki fin afitse, bema ndeku pwadzu bi ki fin bye wa yafan jinni kuri pukan kan wa yafan jinni. Ábu wa hwa be danra, "Dze jinni au apa wa nana, do don ki fin baa huhu. Abye wa yafan jinni bu Yesu Kiristi ri yafan bye dzwau ki di." 15 Ci numa ra se ní wa dini sansan ba byecuni waa ni ci. Byecuni kuká ci tsadzu bu pa jukun baa ci àfo numa ba, ama ku ci bu pajukun baa ci ba ayì. 16 Apyo waa nima du kata ní tsa abu kiyo sansan numa, ki cin waa anyunu baa tanma ra ci anyunu baa baba. 17 Niká ci pa jukun baa ci jeje numa ba, ama ni hwayi abu waa Cindoi ri con. 18 Niká pyen cen tsaba ba, ama ní zen nde fan Denden bu Cidon ku mu ki fin mikyinni. 19 Nína dan aji ba dini ki bye vyon wa ki fin aku Afa wa tso vyon ra, ní tso vyon gba bu we yo she Cidon ba mikyinni kata. 20 Nína mbu mikyin yi Ata Cidon ki cin koke kata ko nukon ki fin zen bu Cindoi Yesu Kiristi. 21 Ní fo tson bu dini ci tsadzu waa nina con Yesu Kiristi nina yiku hwe ra. 22 Ko awuwa wani kata ki finni ku gon tson fo tson bu nua ci tsadzu waa kuri gon tson fo tson bu Cindoi ra. 23 Ki cin waa awu wa ci ki vo bu wunu ci tsadzu waa Kiristi ci cin bu abi bu baa bàku ra. Abi waji ci dia, ku ciri apa wa nwàdzu adi waji. 24 Ci numa ra ko awuwa wani kata ku fo tson bu nua ku zen nde ba aji bua tsadzu waa abi bu pajukun bu Yesu Kiristi ri fo aji bua ri zen nde baku ra. 25 Ko wunu wani kata ki finni kú con awaa tsadzu waa Yesu Kiristi con abi pajukun'a ku nde dia yi aki ki cinbe ra. 26 Ku tsa numa ki cin waa ki nyaken waa ku tsonye be ba jape ki bye ajia ra kú hobe ndafan yi Cidon ki pyen. 27 Ki cin waa jiji ku gbe abi bu pajukun bi dia be ci nyenye numa ada dzun baani ki dibe ko abanfyon bu abu dzun wa baba wa tsatsa, ba ko tswi abu wa baba wani kata baani ki dibe. 28 Ko wunu wani kata ku con awaa ci tsadzu waa kuri con dia ra. Apa wama con awaa kuna con adia hun. 29 Ki cin waa apa dzun wa ngha fo dia fora baani, ama kuri ji buju, kuri kon di bua ci tsadzu waa Yesu na kon abi pajukun ra. 30 Ki cin waa ī ci aben baa ki dia. 31 Afa bu Cidon danra, "Ki cin wakara apa ku fan ataa, ba ayoa ku tābà ba awaa abe pyinna hora be kan apa dzundzun." 32 Afin aji waka ra dzondzon. M hwayi fin aji waji danra ci Yesu Kiristi ba abi pajukun bua. 33 Ama cinna bu aji waji tea kire kenken ba, bi ki byeni du, ko kani kata ki finni ku con awaa ci tsadzu waa ku con dia ra. Ko awuwa wani kata kukà yi nua hwe.
