BAAFISUS 4

1Ami waa be panmi tsu tan ki cin waa mna tsa butso bu Cindoi Yesu mna voni ní ci bye­ cuni we dzun mbamba ba ndeba waa Cidon bani ra. 2Ní nde cinni na jinni, ní ho kyinni we jinni, ní pan mikyin. Ní tsaza dini yo ba acon wa con dini. 3Ki bye cin­ kwan bu vyon waa niri kwan ba dini ki bye Denden bu Cidon ra, ní nga ní pantse ba gben gban­ gban ki bye dzundzun ba mikyin wa na jinni. 4Pajukun baa bà Yesu ci adi dzundzun, Denden ci dzundzun, ai kata ī ho hwan'i so bye abu dzundzun we ki dzun ba ndeba waa Cidon bai ra. 5Cindoi ci dzundzun, wajinderi bui ci dzundzun, batisma bui ci dzundzun. 6Atai Cidon kata ci dzundzun ku ci Ata bu ko kani kata, kuri tsa tson ki cin koke kata, kuri tsa butsoa ki cin'i kata, ku ci fin mikyin'i kata. 7Yesu Kiristi yi ko kani kata byon mba­ mba nu gben butso waa apa ku tsa. 8Ci tsadzu waa be ta ki fin Afa danra, "Dede waa ku do don neya ki don, ku ho abe jo­ ken'a hwehwe numa neya ki dzun baku ki don ki nyaken waa ku ji ken ki cinbe ra, ku yi pa­ jukun byon suu numa" 9Waa ku danra, "Ku neya ki hwadon ra" cinnaa dan dan ke? Cinnaa ciri waa Yesu kapyen tubi ki jinni ki fin tswen wakara, 10aku wa ndi tubi ki jinni ki fin tswen wakara ku ciri wa ka ne kasen ya ki hwa cucu ki don ki bye Cidon jiji ashishi dia ku be koke kata. 11Ku ciri apa wa yi badati byon be kan fotson, badati be kan pajukun baa da don aji bu Ci­ don, badati ci baa ri dan Aji wa Sansan bu Cidon yi pa, badati ci pasta, badati ci manu baa fyen bu. 12Ku tsa numa ki cin waa kú dzo pajukun bu Cidon gben wa tsaka butso bu Yesu Kiristi be gbe ho pajukun kata myi kwan bye dzundzun ki di bu Yesu. 13Iri tsa numa pan keke ya zan anyu­ nu waa ai kata iri ho cin'i kwan í ci adi dzundzun ki bye wajinderi bui, ba ayì waa ī ci baku ki bye Nwu bu Cidon, í ci baa hwe byen kan pajukun ra, ya zan ki byecu waa Yesu Kiristi kiyo. 14Ci numa ra iri cii tsadzu baci riba, baa awo ri sabe jape wa name ri tebe taya numa, tabi numa, bena gon tson fo abu wa fyenfyen bu pajukun baa bye pa­ jukun, baa ri nwà pajukun nwe bu abu wa fyenfyen yibe na jan nyaco. 15Ama í dan aji wa byen­ byen ki bye acon, í hwe kan pajukun baa bà Yesu Kiristi Cin­ doi, ina kwan cin baku ki dzun, aku wa ciri cin'i. 16Ki cin waa abendi kata ri ho dibe kwan dzun ki dia ki bye dzundzun, kuri ho abendi ra ki cincin numa mbe kwan dzun kan adi dzun­ dzun. Ci numa ra abendi ra dzun wa mana tsa butso wa we baku, kuna tsa ki cin waa adi waji ku hwe ku myi dia ya pyen ki bye con. 17Mna dan yini aji ki fin zen bu Cindoi, m kana mbyā dan bavo kiyo kwan yo na yini danra niká ci byecuni ci tsadzu pajukun baa yibe Cidon ba, aji wa gaga bube ci aji wa dán numa nya hwan azota. 18Azo mikyinbe nà tsuken jinni numa, abu dzun kwan'abe ba cindi waa Cidon na yi pajukun'a raba, ki cin waa be cibe numa azokon azota, be gban cin kagben. 19Atsenni baa­ ni ki zobe, be fan dibe gbaya numa yi abu wa vya hwanbe wa tsatsa, ba atswi aso wani kata, be kanden kabe adibe kiyo ba. 20Wakara cia abu waa ni ndi fyen ki nyaco bu Yesu Kiristi ba. 21Ajinderi be ndi fyenni abu ki cin bu Yesu Kiristi, ani baa ci pajukun baa bàku ra, ni yi abu wa byenbyen wa ki cin bu Yesu ranu. 22Ní fan tswi abu wa tsa­ tsani wa ndi kapyen waa ni ndi ci fin'a ra jinni, wana tsabani cin nya hwan azota numa ki cin bye­ bye wa dado mikyin azota. 23Ní vyin pukan mikyinni ba aji wa gaga buni ku kan wa ripye. 24Ní nga tswi mikyin wa ripye waa be mà dzu bu Cidon waa ku ci baku byenbyen numa ada baani kiyo ra. 25Ci numa ra se ní gadi ba akan wa kankan, ko kani kata kuna dan ajibyen na yi nwuzaa ko nukon, ki cin waa ai kata ī ci abu dzundzun ba dii. 26Nima ngongo ba dini, niká hwa yi ango ra ku yini tsa abu wa baba ba dini ba. Niká fan anyunu ku koni ki cin ni ci tiri ki fin ango wa ngongo ba dini ba. 27Niká pofan apyo ko titi numa yi Shetan ku kayo ba. 28Apa wama ndi na vyi vyu ku fan avyú wa vyivyi jinni ku nga ku tsa abu ba avo dia byenbyen numa ku du abu waa ku tsaza pajukun baa nyani bu yo. 29Niká zen aji wa soso numa pwadzu ki nuni ba, ama ni zen aji wa sansan wari myi san dini wari tsaza pajukun baa ri fo aji buni ra. 30Niká tsaba mikyin bu Denden bu Cidon ba, ki cin waa Denden bu Cidon ciri àmà wari tà danra nī ci pajukun bu Cidon waa Cidon ten nwàni pwadzu ki fin pajukun baa tsa abu wa baba keke numa yaya ki bye anyunu wa kennu. 31Ní gadi ba tswi mikyin wa baba. Ní gadi ba ango kata ki mikyinni niká yi mikyinni na do ngo fu ba! Niká gbende ba dini ba, niká zen aji tsaba zen bu adini ba. Ní gadi ba aji wa baba wa gaga ki fin mikyinni. 32Ama ni tsa dini sansan, nina hwi cici bu dini, nina fan ada bu dini na yi dini tsadzu waa Cidon na fan abu wa babani na yini ki di bu Yesu Kiristi ra.

will be added

X\