3 YOHANNA 1

1Ami wa ci baco ki fin abi bu pajukun baa bà Cidon ra, mna ta afa wakara ri na yiu, au Gayus ajomi waa m con ajiu ba mikyin­ mi kata ajinderi byenbyen numa ra. 2Wandomi, mna pya danra, ko­ ke kata ku ciu yo kyoo numa, jiji ú ci rito numa ba Cidon. 3M mbu mikyin suu numa ki cin waa ayo waa bazhenzai baa bà Cidon nabi kire ra, bena dan aji yimi danra, una bà aji wajinderi wa byenbyen ra ba mikyin dzundzun kata ci tsadzu waa ù ndi na tsa keke dzu jinni bira kyoo numa. 4Ayo waa m fo danra, bazhenzhenmi na bà aji wajinderi wa byenbyen ra sansan numa ra, aji waji hwa mikyinmi mbu ka koke kata. 5Wandomi, ù ci apa wajinderi byenbyen numa ki bye koke kata waa una tsa bandoi baa bà Yesu, tuntun pajukun baa ci akyon ho­ ra ba. 6Abe pajukun baa ù tsa­ zabe yo ra, bena dan ri yi abi bu pajukun baa bà Yesu kire aji ki cin acon waa ù ci baku ra. Uma tsaza pajukun baaji kwan yo ri san kagben, ki bye abē kyon wa kyenkyenbe, ba nyaco wa fye ba pajukun baa bà Cidon. 7Ki cin waa pajukun baaji be do kyonbe waji ki cin butso bu Yesu Kiristi. Be zenbe nde pan abu dzun ki vo bu pajukun baa bàbe Yesu Kiristi ba, 8Ci numa ra ai pa­ jukun baa bà Yesu Kiristi san kari í tsaza pajukun baakara yo. Ki cin waa jiji í hwabe vo ki bye butso waa bena tsa ki cin bu aji wajinderi byenbyen ra. 9M ta afa yi abi bu pajukun baa bà Yesu kire, ama Diyotrifis nghaa wa gon tson fo ajimi, ki cin waa kuna con aji bu hwe numa ki finbe kagben. 10Dede waa mma bira, mri bi dan yini abu baa ku tsa ra kata, Kuna zen aji ge aji baa baba baba numa na sen'i ki cin tsabai. Wakara ma ken'a zoa raba. Ku nghaa wa pan akyon bandoi, kukà zen'a­ nde yi apa dzun ku panbe ba. Ku kana ten pajukun baa na con jiji be panbe ra pwadzu ki fin abi bu pajukun baa bà Cidon. 11Wandomi, ká bà aji bu abu wa rimyi wa tsatsa ba, ama ú bà aji bu abu wa sansan wa tsatsa. Apa wa mana tsa abu wa sansan kata, apa waji ci apa bu Cidon. 12Ko kani kata zen aji wa sansan numa ki cin bu Dimitiriyus. Ajibyen ba dia ma na zen aji wa sansan numa ki cin'a. Ai ba dii ina zen aji wa sansan numa ki cin'a du. Au yinu danra, aji waa ī zen ki cin'a ra ci aji wajinderi byenbyen numa. 13M ci ba aji suu numa wa dan yiu, ama m conmi waa m ta aji baaji tata ba akwēte ba jape kuruma ba. 14Mna so hwan dan­ ra, iri shon ge ba dii ba mbwari jiji í vyace ba dii azo ba azo. 15Cidon ku yini mikyin wa na jinni. Bandoi kire na nau jen kiyo. U nà bandoi kiyo a dzun­ dzun dzundzun ba azenbe kata ken cin dibe.

will be added

X\