1 Ami Siman Bitrus nwu anya bu Yesu Kiristi, mka ci fo tson'a kati, mna ta afa wakara ri na yini kata ani pajukun baa wa sansan bu Cidon ba Cindoi Yesu Kiristi apa wa nwàdzui hwa nī yi wajinderi ki bye Yesu Kiristi byenbyen numa ci tsadzu waa ī yi ra. 2 Wa sansan bu Cidon ku kwanni kiyo suu numa. Ku yini mikyin wa na jinni, ní yì Cidon ba Cindoi Yesu. 3 Yesu Kiristi ciri apa wa tsa yii bi yì Cidon wa cei danra jiji í du ahwè ki di bu hwea ba abu wa sansan'a wa kagben ra. Ki cin waa jiji í du cindi, í tsa abu wari vya hwan bu Cidon. 4 Dzu bye nyaco wakara ku yii abu baaji baa kwakyi ajinderi baakara baa ku ndi genu ki cinbe ra. Ki cin waa jiji ki di bu abu baakara ní nwàdzu ki vo bu abu baa baba baa ki fin tswen wari dzu bye abu wa vyavya wa baba ra. Jiji ní nga tswi mikyin bu Cidon. 5 Ki cin wakara numa, se ní so hwan kiyo ní nga jiji ní foji abu wa sansan wa tsatsa kwan bye aji bu Cidon waa nī zen nde yi wajinderi kiyo ra. Ní foji abu wa sansan wa tsatsa kwan yo foji wa yaya ki pyen. Ní nga jiji ní yì abu kwan cin'a. 6 Ki nyaken abu wa yìyi wa kwan cin'a ciri, ní pan dini bi dzun sansan. Ki nyaken bu adi wa pan bi dzun sansan, ní gban mikyin pantse ba gben kwan cin'a. Ki nyaken bu mikyin wa gbangban pantse ba gben, níkà tsa abuu Cidon. 7 Ki nyaken bu abu Cidon wa tsatsa, abu wa sen kwan yo ciri, ní tsa abu vyon ba dini ci tsadzu nwuza. Ki nya ken bu abu vyon wa tsatsa ba dini, ní con pajukun kata. 8 Abu baakara kata ciri atswi abu baa fyeni waa ní tsa hun. Nima foji abu baaji baakara numa wa tsa kwan yo ya pyen ki bye buni waa nima tsa kata kuri dzu cin san san numa. 9 Ama apa wama tsaa abu baakara ba, ku ci tsadzu agbànzo wari mbyà kaa abye ba. Ku mujia ba waa be fan abu wa babaa waa ku ndi tsa ra yiku ra. 10 Ci numa ra, bazhenza, ní nga gbangban numa jiji ní pantse ba gben numa ki cin abu baaka ra. Ki cin waa Cidon bani nde, ku ceni ki cin waa jiji ní tsa abu baaji. Nima tsa tswi abu baaji numa niri koni kwi ki nyaco bu Cidon ba, ko nukon. 11 Ki bye wakara numa hunnu niri hun du nyaco wa kaya ki ndo tson wa ci kenken bu Cindoi Yesu Kiristi apa wa nwàdzui. 12 Ci numa ra, mri kyepanni yo abu baaji baakara ko nukon. Ko waa nī kapyen yìbe, nikà pantse gbangban numa ki cin bu aji baajinderi byenbyen baa nī yi wajinderi kiyo ra. 13 Waa m ci tiri ki ju ki fin tswen kire ra, m mbyà san kari waa mna kyepanni yo abu baakara jiji ní do don tse don. 14 M yinu danra, nde kire ya pyen ri dedea riba, mri gadi ba fin tswen wakara ci tsadzu waa Cindoi Yesu Kiristi ndi dan yimi ra kyoo numa. 15 Mri nga dimi jiji m hwa ní kyepan ba abu baakara ko nukon. Ko ki nyaken waa mma hu. 16 Ī ndi kapyen dan yini aji ki cin waa Cindoi Yesu Kiristi ri kasen bira. Ī kà dan yini aji ki cin bu agben'a. Aji baaji baakara baa ī ndi na dan yini ra, be cibe aji baa pajukun màmá ki mikyin be numa pwadzu ba. Ama ai ba dii pantse numa mbyà hwea ba zoi nu. 17 Ki bye ayo waa ku pan hwea ba tson ki bye Ata Cidon ra, ī fo nde dzu ki bye Cidon wa ka koke kata ki don bi na zen aji ki cin'a danra, "Wakara ci Nwu wa conconmi, ajia sanmi ki mikyin numa cia wa dandan ba." 18 Ai ba dii ī fo nde waji wakara ba tson dii ki bye ayo waa ī ba Cindoi Yesu ci bye dzundzun ki cin kwèn bu Cidon ra. 19 Aji bu abe baa da dòn dan rá, tà yii ki byeya numa kwan yo danra, abu baaji ci abu baajinderi. Nima gon tson fo ajibe, ní gon tsonni waji sansan numa fo ajibe. Ki cin waa ajibe waji ci tsadzu be mu pyu so nase ki fin bye wa na tsuken jinni nde numa keke ya kyabye, Atswí wa te cin byekya ri mbu yafan bye dzwa mikyinni. 20 Abu wa kapyen kata ciri, ní hwa yinu danra, aji waa baa da dòn ndi da dòn ki cin'a be nde ta fin Afa bu Cidon ra, be pwabe hwan ki bye kyinye bube bu dibe numa zen aji waji ba. 21 Ki cin waa aji ki cin adòn bu Cidon wa dada dzu foa ki mikyin bu apa numa azota bi fo raba, se Den den bu Cidon ma pwa apa ri ki fin mikyin'a hunnu ri hwa yiku zen aji wa dzu bye Cidon bi.
