2 BAKORINTOS 8

1Bazhenza, ina con í dan yini ní yì abu waa wa sansan bu Cidon tsa ki cin bu pajukun baa bà Cidon baa ki Makidoniya. 2Be ken mba fobe ba tswi fyin baa sepyu suu numa, ama ko waa bena wa fyin ra, be foji cucu wana cucu. Ko waa ahwen tsabe kagben ra be kwan abè tafan vo hwehwe numa jiji be tsaza bazhenzabe yo hwehwe numa ba avo wa pofanfan. 3Ki cin waa m yinu byenbyen numa danra be yi abè ra mbamba gben dibe har tsadzu bé nde cin dibe yi kwan yo. 4Be voi bavo kiyo danra í gbagba í hwènbe ki fin pajukun baa ri kwan vo ri tsaza pajukun baa tsa hwen baa ki fin jen bu Yahudiya. 5Abu waa be tsa ra, ī gai aji ki cin'a danra beri tsa hwe numa ba. Ki cin waa wa kapyen be fan dibe yi Cidon, kati, ki bye mikyin bu Cidon bekà fan dibe yii tsazai yo. 6Ci numa ra, ī vo Titus wa kapyen jo nwo butso wakara jiji ku foji wa tsa numa yaya ki pyen jiji ní tsa vinni butso bu con mikyin wakara. 7NĪ fa hwen kagben ki bye abu waa nī ci baku kata. Nī ci ba wajinderi, nī zen yì aji nu, nī ci ba ayì, ba ngangani waa nina nga nī tsaza, ba acon wa ki fin mikyinni jijii, ci numa ina con ní yi abu pofan voni ki bye butso con mikyin wakara. 8Aji waa mna dan ra, cia adòn dzun mna kan soni ki jinni ba. Ama ki bye wa ngangani pajukun badati ma mbyà numa beri tsaza. Mna nga jiji m mbyà yinu byenbyen numa cinna bu acon waa nī ci baku, 9Ki cin waa nī yì wa sansan bu Cindoi Yesu Kiristi nu. Ku ci apa wa fa hwen numa cia wa dandan ba, ama ku fan dia kan apa wa tsa hwen ki cinni, jiji ahwen waa ku tsa ra ku hwa ní fa hwen. 10Acé wa gengen bumi ki cin aji waji ci kara, san kari ki byeni tanma ní tsa ban abu waa nī ndi jo nwoa aju wa hun ra. Nī cini baa ndi kapyen gbè aji bu abu wa tsatsa vinni ba, ama nī ndi kapyen ri tsa. 11Tanma ra san kari ní tsa vinni abu waa nī ndi kapyen jo nwoa ra mbamba gben waa nī ci baku. 12Nima ci ba mikyin wa yi abu, Cidon ri pan abu waa nī yi ra kuri wezo mbyàa abu waa nī ci baku, kuri mbyàa abu waa nī nyani baku ba. 13M conmi waa ní ho afyin kata ngye dini yo ní fan pajukun badati ci numa azota ba. 14Ama ní gafan koke kata mba dzun mbamba nu gben dini. Ama ci tsadzu waa tanma numa nī ci ba abu ki vo, bube be babe abu dzun ki vo ba, san kari ní tsazabe yo. Numa anyunu wa kyen bema du abu ki vo, nima nyani bé tsazani yo numa du jiji koke kata ku mba dzun. 15Ci tsadzu waa Cidon dan ki fin Afa bua danra, "Apa wama kwan bu suu numa ri kaa gben'a ba. Apa wama kwan bu titi numa ri zoa kagben ba." 16Ina mbu mikyin yi Cidon suu numa ki cin waa ku tsa mikyin bu Titus we dzun ba bui, kuna con ku tsazani yo ci tsadzu waa ina con í tsa ra. 17Ayo waa ī voku danra ku bi ki byeni ra ku zen nde ba mikyin dzundzun, ávo waa ī ndi tson'i ku tson waji raba aku ba dia ma na con wa bibi ki byeni. 18Ina tson nwuzai wa dzun waa pajukun baa bà Yesu ko kini kata na yiku hwe ki cin butso waa kuna dan Aji wa Sansan bu Yesu Kiristi na yi pajukun ko kini ra. 19Cia wakara maari vinni ba, ama pajukun baa bà Yesu ko ki bye wa kini kata ceku jiji ku bai kyen dzun na ya tsa butso bu san hwan bu Cidon waa ina tsa. Ina tsa butso wa sansan wakara ki cin waa í ta yi pajukun hwe bu Cindoi Yesu Ki­ risti, í kà ta yibe danra ina con í tsazabe yo. 20Ina tsa koke kata sansan numa ki cin waa apa dzun kuká bi mbyà boi ki cin avyon wa vyonvyon waa pajukun yi tafan vo hwehwe numa jiji í ho ya yi pajukun baa tsa hwen hora ba. 21Mikyin bui ciri, í tsa koke kata ndafan jinni sansan numa. Cia ki pyen bu Cindoi Yesu Kiristi vinni ba, ama kwan ba pajukun kata. 22Ci numa ra ina tson nwuzai kyen dzun babe bi byeni. ī ken mbafo nwuzai waji ki nyaco tswi tswi, ī mbyà ku ci ba mikyin wa tsazaza ma kwankwan kiyo. 23Titus ci jo bu­ tsomi, butsoni waa ina tsa dzun ra ki cin waa jiji í tsazani yo. Bazhenzai badati baa ri baku kyen dzun bi ra be ci azo bu pajukun baa bà Yesu Kiristi ki bye wani kata, bena yi Yesu Ki­ risti hwe. 24Ci numa ra, ní conbe jiji pajukun baa bà Yesu Kiristi ko kini kata be yinu ajinderi byenbyen numa danra ina caco ki cinni ra, ī ca mba tiri coa.

will be added

X\