2 BAKORINTOS 7

1Bazhenzami baa ki nyaco bu Yesu Kiristi baa mna conni ba mikyin dzundzun, aji baa m dan hora, ciri nuge wa gege waa Cidon ge bai ra. Ci numa ra í tsonye abu wa baba wa ki fin mikyin'i wari hwa adii ba denden'i ci nà jín numa ra. í nga í ci nyenye numa dzu don dzwa dzwa ki jinni. Ki bye byecu waa í ci í zin zin bu Cidon. 2Nī ta yii con ki fin mikyinni. ī tsai apa dzun abu wa baba dzun ba, ī tsabai cin bu apa dzun ba akan wa kankan ba, ī pujii apa dzun ba. 3M danmi aji wa­ kara ki cin waa m mbyà boni ki cin abu dzun ba, ki cin avo ndi gbogbo m ta afa yini danra ina conni ba mikyin dzundzun. Ko ima huhu, ko ima ci tiri riju iri ga kai di ba dii ba ko nukon. 4M yi agben ki dini ken ra ko nukon. M mbu mikyin ki cinni, m yi gben mikyin ki dini cia wa dan­ dan ba. Ko waa ina wa fyin ki cin numa ra, m ci ba mikyin wa mbumbu cia wa dandan ba. 5Ko ayo waa ī ndi bi zan ki Makidoniya ra ma, ī dui apyo waa í ngha nwo dii ba. Pajukun baa yibe Cidon ba, na gbende bai na tai fyin ki bye nyaco wani kata, azin na pan'i ki fin mikyin'i! 6Ama Cidon wari yi apa wa zinzin mikyin wa gbangban ra, se ku yii gben mikyin ki bye akyon waa Titus bi zan ra. 7Cia akyon wa bibi bu Titus maari vinni ba, ama dede waa ī fo ki nua danra nī dan gbanku mikyin ra, ai du ī du gben mikyin. Ku dan yii danra nina con ki fin mikyinni ní mbyà zomi, kukà dan yii tswi mikyin wa pepe waa ni ci baku ki cin abu waa nī ndi tsami, ama tanma numa nī zen nde bami danra niri tsa koke kata wemi yo ki nyakenmi, waa m fo numa ra, m mbu mikyin suu numa ka wa ndi gbogbo rari nana numa. 8Ko ki bye afa wa hun waa m ndi ta yini ra, aji waa m dan kiyo ra, yini mikyin wa pepe, andi kapyen ra m pe mikyin du, ama tanma ra m pemi mikyin ki cin afa waji ba. M yinu danra aji waa m ndi ta yini ra, yini mikyin wa pepe, ama cia fo anyunu suu numa ki fin mikyinni ba. 9Tanma numa m ci ba mikyin wa mbu­ mbu ama cia ki cin waa m ndi hwa yini pe mikyin ba, ama ki cin waa mikyin wa pepe buni gbeni vyin pukan mikyinni bi ki bye Cidon. Ki cin waa nī pe tswi mikyin waa Cidon ri con. Ci numa ra, nī nyani ní abu dzun ki bye afa waa ī ta yini raba. 10Tswi mikyin wa pepe wari dzu ki bye Cidon wari hwa apa ku pukan mikyin bi ki bye Cidon, ci numa ra, apa waji ri pea mikyin riba, ama tswi mikyin wa pepe wari dzu ki fin tswen wakara ri gbe aki ri yi apa. 11Ní mbyà abu waa Cidon tsa ki bye mikyin wa pepe buni ra, nina so hwan kiyo jiji ní bà Cidon ba mikyinni kata ní mbyàyi abu wa babani nu, nina con ní vyin pukan mikyinni, mikyinni tsaba jinni suu numa ki cin abu baa baba waa nī tsa. Nina she zen bu Cidon, nina con ba mikyin jiji m bi ki byeni m mbyàni, nina con jiji ní tse ba wajinderi buni, ní tsa koke kata we hwan bu Cidon. Abu baa nī ndi tsa hora kata ni mbyā sanbe ra, nī ta dini danra nī bàni nī ba ada dzun ki cin bu aji wa ci kara. 12Ci numa ra, ko waa m ndi ta afa kapyen yini ra, m tami afa waji ki cin waa mna mbyà bou apa dzun ba, ko be tsa apa dzun abu wa baba ba, ama ki cin waa jiji ní mbyàyi acon waa nī ci baku jijii ki pyen bu Cidon. 13Ábu waa ī du gben mikyin ra hun. Cia agben mikyin azota vinni ī du ba, ama ayo waa ī du Titus, ī fo danra ani kata nī tsazaku yo jiji ku du mikyin wa na jinni, ī mbu mikyin kari wa ndi gbogbo! 14Waa m zen aji ba Titus ra, m caco ki cinni. Nī tsa cimi ba. Abu baa ī dan yini ajinna ba akyen hora kata ci ajinderi, ka ci numa acò waa ī ca ki cinni duzo bu Titus ra ta danra ci ajinderi. 15Ci numa ra, waa ku kyepan nī gon tson fo aji bua, nī panku ba mikyin dzun­ dzun, ba azin wa zinzin, ba adi wa vonvon, acon waa ku ci baku ki mikyin jijini ra foji wana kwan yo yaya ki pyen ki pyen. 16M mbu mikyin kagben ki cin waa m zen nde bani kagben.

will be added

X\