2 BAKORINTOS 5

1Ī yinu danra adii waa í ci baku ki fin tswen kire ra ri dzu hún hun ki jinni ci tsadzu atan waa ī ci kiyo anyunu dzun kuri gban dzu hun jinni ra. Ama Cidon myi atan wa ci kenken ki ndoa ki don soi yo. Atan waji apa myia ku myimyi ba vo ba. 2"Tanma ī ci ki fin tswen ra ina kundekuto, ina con ba mikyin'i kata jiji í kà ki atan bu Cidon wa ki don waa ku myi soi yo ra. 3Anyunu waa ima hu aki iri nyanii atan waa iya ka kiyo ki ndo Cidon ba, iri cii tsadzu apa wa ci nwo rinyi azota numa ba. 4Ayo waa adii ci tiri riju ki fin tswen wakara ina kundekuto ba mikyin wa pepe. San kari waa í hu í gadi ba dii wa huhu wa ki fin tswen wakara, ina con í du cindi wa ripye wari hua ba, a cindi wari ci kenken ko nukon. 5Aku Cidon ba dia tsai ri jiji í vyin pukan numa, ku yii Den­ den'a wari ta yii abu kata ki pyen kire. 6Ki cin wakara ī ci ba gben mikyin ko nukon. Ī yinu danra adii waa ī ci baku ki fin tswen wa ci kara anyunu ma mbaa raba iri ci tiri ki fin tswen wakara iri cii ba Cindoi Yesu Kiristi ki dzun ki ndo Cidon ki don ba. 7Ki cin waa ina tsa abu bui ki bye abu waa ī yi wajinderi kiyo, cia abu waa ī mbyà ba azo ba. 8Ī ci ba gben mikyin waa í hu fan ndo bu dii ra jinni, í ya ci ba Cidon ki don ki ndoa. 9Abu wa sansan kari kata ciri í tsa abu wa vya hwan'a ko ki ndoa wa ki bahun. 10Ki cin waa ai kata iri ya pantse pyen bu Yesu Kiristi kuri foi kwen. Ko kani kata ri ya pan vokwin'a mbamba nu bu waa ku tsa ki fin tswen, ko wa sansan, ko wa baba. 11Ī yì cinna bu azin bu Cidon wa zinzin nu, ábu wa hwa ina nga jiji í gbe pajukun badati bi bye Cidon ra. Cidon yì byecui waa ī ci nu byenbyen, ami mna ga danra ni yì cinna bu byecumi waa m ci nu du. 12Har jinna ī con'i waa ī nyā dii ki byeni ba, ama ina yini apyo wa caco ki cin'i jiji ní zen aji yi pajukun baa ri caco ba abu waa be mbyà ki di bu apa, ama be cabe co ba abu wa ki mikyin bu apa ba. 13Ima ci pajukun baa kyakya ī kya jiji bu Cidon, ima cii pajukun baa kyakya ba, ī tsa numa jijini. 14Acon bu Yesu Kiristi na tsa tsòn ri ki cin'i. Numa ra, ī yinu danra apa dzundzun hu aki ki cin bu pajukun kata ci numa ra pajukun kata hu aki. 15Ku hu aki ki cin bu ko kani kata ki cin waa pajukun baa riju hora beká ci byecu bu dibe ba, ama be ci byecube jiji aku wa hu aki wa do don ba cindi jijibe ra. 16Ci numa ra pan kire ya ki pyen iri mbyài byecu bu apa ba azo waa pajukun ri mbyà raba, ko waa andi ī mbyà byecu bu Yesu Kiristi ba azo bu pajukun baa ki fin tswen, tanma ra iri mbyài ku numa riba. 17Ci numa ra anyunu waa apa ma kwan cin ba Yesu ku kan apa wa ripye ra, mikyin wa riko jan ra, mikyin wa ripye za yo ra. 18Abu wakara kata ci butso bu Cidon. Cidon hwa í ban vyon baku ki di bu Yesu Kiristi, ku yii butso waa í nyà pajukun be bi ban vyon ba Cidon. 19Ki di bu Yesu Kiristi Cidon ri ba pajukun baa ki fin tswen wakara nde be bi ban vyon baku, numa ra ku hwèn'a kwe bu abu wa baba waa be tsaku ra riba. Kukà yii butso waa í dan yi pajukun aji ki cin vyon wa banban baku. 20Ci numa ra, ai ci fotson bu Yesu Kiristi wa bi ki byeni. Ci­ don na bani nde ki bye aji bua waa ī fyen ta yini ra. Ki fin zen bu Yesu Kiristi ina voni ní ban vyon ba Cidon. 21Ki cin'i Cidon hwa Yesu kan apa wa tsa abu wa baba ko waa ku tsaa abu wa baba dzun bara, ki cin waa jiji í bà ki dia í kan pajukun baa san­ san ki bye Cidon.

will be added

X\