1 TIMOTI 3

1Apa wama nyà ku ci baco ki fin bi bu baa bà Cidon, wakara ci butso wa sansan kuna nyà. 2Apa wama ci baco ki fin bi bu baa bà Cidon ci ken kú ci apa waa pa­ jukun mbyàbe boa ki bye abu dzun ba; kú ci apa wa ci ba awuwa ngyikan dzundzun tori numa, kú ci apa wa ta mikyin, kú pan cin'a bi dzun sansan, kú tsa abu bua kata coa ndafan jinni, kú pan akyon sansan ba avo pyinna, kúkà tsayi wa fyen pajukun abu. 3Kúká ci apa wa pyen cen ba, kúká ci apa wa ngongo mwamwa nde vo da apa ki di ba, ama kú ci apa wa tashuma numa, kúká ci apa wa nyà jinyà ba, kúká ci apa wa vya aji bu abè zadi ba. 4Ci ken ku pan ndoa sansan, bazhenzhen'a bé nde cinbe na jinni gon tson nari foku ko nukon. 5Ki cin waa apa wama tsa yia tson ki cin bu ba­ zhenzhen'a kú panbe sansan ba, kuri bi tsanini ahunnu kú pan yì pajukun bu Cidon? 6Ci ken apa waji kúká ci apa wa pan aji bu Cidon panpan tiri ripye numa ba, ki cin waa kuri bi nde cin'a ki don ri caco ri gbe kwen ribe dia ki cin tsadzu waa Shetan tsa ra. 7Baco ku ci apa waa ko pajukun baa bàbe Yesu bara be mbyàku ba hwe, ki cin waa kúká bi ko ki bye tswe bu Shetan pajukun bebi na zen baboa ba. 8Kà ci numa ba abe dikon du, bé ci pajukun baa pan cinbe bi dzun sansan, béká ci pajukun baa zen aji nu pyinna ba, béká wa jan kacin ba, béká ngingi bu abu hwe kacin ba. 9Ama be pan­ san aji wa byenbyen waa Cidon tà yibe ra gangan numa ba mikyin wa nyenye. 10Se ní ka­ pyen ken mbafobe ní mbyà ahunnu, nima pannibe ba ada dzun ba ahunnu bé tsa butso wakara. 11Bawuwabe bé ci baa tashuma, béká ci bawuwa baa ri fyi aji ba, be pan cin nabe bi dzun sansan, abu waa bema tsa be tsa wa ndafan jinni. 12Ci ken dikon kú ban awuwaa a ngyikan dzundzun tori numa vinni, kúkà tsa tson kú pan ndoa ba bazhen­ zhen'a sansan. 13Dikon baa tsayi butsobe sansan ndafan jinni ra beri du azen wa sansan, bekà tsayi wa dan yi pajukun aji ba agben ki cin wajinderi waa i yi ki bye Yesu Kiristi ra. 14Afa waa mna ta yiu kara, mna ma ki fin mikyinmi danra, m bi ge ba mbwari jiji m mbyà zou. 15Ama mma bi gemi ba, afa wakara ri ta yiu cinna bu abu wa fye waa pa­ jukun bu Cidon bé tsa, pajukun bu Cidon wa ci ba cindi wa ci kenken ra, bé ci tsadzu ahinpo bé na nyaken bu ajibyen be teku soso ki don. 16Ajinderi, aji bu Cidon bui waa ina bà ra ci aji wa ndanda kwakyi numa: "Ku kàn pajukun pwadzu bi nde dia tà yi pajukun ki fin tswen, Denden bu Cidon zen nua danra, ku ci apa wa byenbyen. Abe zhentsōn bu Cidon mbyàku nu ba zo dibe, pajukun nde aji ki cin'a dan yi tsu pajukun kata, pajukun ki fin tswen yi wajinderi ki byea, Cidon ndeku ki fin hwe numa neya don."

will be added

X\