1 BATASALONIKA 5

1Bazhenza, aji ki cin anyunu ba ayo waa Cindoi Yesu Ki­ risti ri kasen bira, cia abu waa í dandan yini riba. 2Ki cin waa ani ba dini nī yinu kata danra, anyu­ nu waa Cindoi Yesu Kiristi ri kasen bira, kuri bi ge pajukun gege tsa bwa numa ci tsadzu waa avyú ri ge apa afitse ra. 3Ayo waa pajukun ri danra, "Ko kake kata ci rito, abu dzun tsaa ba," dede waji bwa numa beri bi mbyà afyin ba azo, ci tsadzu amba wa tutu ri tu awuwa ra. Nyaco wa nwàdzudzu ri baani. 4Ama bazhenza, buni nī cini ki fin afitse ba. Ci numa ra Anyunu waji ri geani gege ki don tsa bwa numa ci tsadzu waa avyú ri tsa raba. 5Ai, ani katani nī ci pajukun baa ki fin abye wa yafan jinni ba anyutu. ī cii pajukun baa ki fin afitse ko abye wa na tsu­ ken jinni ba. 6Iká na ana ci tsa­ dzu pajukun badati na na raba. í ci ju kyoo numa. 7Afitse ci ayo waa pajukun ri na ana kiyo, ka ci ayo waa pajukun baa wa jan kari pyen ajan kiyo. 8Ama ai pajukun baa ci byecu bui ki fin anyutu ra, í wà dii sansan ci tsadzu waa apa wa nuken ri ho abuken asho ri nuken baku, kuri nde abucin asho ri be tsuken cin'a kiyo ra. Ci numa ra, í nde wajinderi ba acon wa ki fin mikyin'i ra gon akì kiyo, í ho mikyin'i so bye Yesu Kiristi Cin­ doi wa kari nwàdzui ra. 9Cidon soi danra, í kan pajukun baa wa fyin bu kyinnaa ba. Ama ku cei jiji í du nyaco wa nwàdzudzu ki di bu Cindoi Yesu Kiristi, 10wa hu aki ki cin'i ra. Ki cin waa ko ima ci ju ko ima huhu anyunu waa kuri kasen bira iya baku ci dzun. 11Ki cin wakara numa ní zen gban dini mikyin yo. Ní tsaza dini yo ci tsadzu waa nina tsa tanma ra. 12Bazhenza, pajukun baa ki pyenni baa Cindoi cebe yibe na tsa butso ki byeni, bena konni, be kana fyen ta yini abu ra, ina voni, ní yibe hwe sansan numa. 13Ní yibe hwe, ní conbe ki cin butso waa bena tsa ra. Ní ci byecu ba dini rito numa. 14Bazhenza, ina voni ni nu pa­ jukun baa dibe zen'a hwen wa tsa abu bara adon. Ni zen gban pajukun baa zinzin mikyinbe yo. Ní tsaza pajukun baa byèbyè yo. Ní gban mikyin ba ko kani kata. 15Ní tsa sansan níká tsa abu pyó ba dini ba. Ama nina tsa adini abu wa sansan ba pajukun badati. 16Nina cu cucu ko nukon. 17Nina dzwa nde na vo Cidon ko nukon. 18Ko kake ma tsari kata ní mbu mikyin yi Cidon. Wakara ciri abu waa Cidon na nya ki byeni ani pajukun baa bà Yesu Kiristi nina tsa hun. 19Níká tsaden Denden bu Cidon ba. 20Níká sinni ba aji waa baa da don bu Cidon na dan ki cin bu Cidon raba. 21Ní ken mbafo ko­ ke kata ní mbyà, ní pan wa san­ san, ni fan abu wa baba wa tsatsa be jinni. 22Níká tsa abu dzun wa baba ba. 23Cidon wari yi apa mikyin wa na jinni ra ku tsonyeni horododo numa ba dia. Ku tsonye dendenni, ba cindini, ba dini ku konbe kata rito ho­ rododo numa dzwadzwa ki myi jiji béká bi mbyà boni ki bye abu dzun anyunu wa kasen bibi bu Cindoi Yesu Kiristi ba. 24Aku Cidon wa bani nde bi ra ku ci apa wa tsa abu wa sansan kuri tsa numa tsatsa. 25Ní pya Cidon wei yo du ba­ zhenza. 26Ní nà bazhenza bandoi baa ba Yesu kiyo. Ní pan dini be mikyin tsadzu bazhenza fin dzundzun. 27Ki di bu Yesu mna nuni don ní hwèn afa wakara yi bazhenza kata. 28Wa sansan bu Cindoi Yesu Kiristi ku bani ci dzun.

will be added

X\