1 BAKORINTOS 9

1Ami cimi byecu bu akù dimi ba? Ami cimi fotson bu Yesu ba? Ami mbyà Cindoi Yesu nu ba zomi, Ani nī jini byetu bu butsomi ki bye zen bu Cindoi ba? 2Ko waa badati zenbe nde danra m ci fotson ba, ama ki byeni ci ken ní zen nde danra m ci fotson. Ki cin byecuni waa m gbeni kabi ki nyaco bu Cindoi Yesu Kiristi ciri wa tà danra m ci fotson. 3Ayo waa pajukun mari ken mba fomi jiji be panmi ba ada dzun, aji waa mri mbyebe ciri, 4ko m kenmi waa m du buju wa jiji, ba jan wa wawa ba? 5Ko m bamni ba gben dzun waa m kyenkyon ba awuwa ben wa yi wajinderi, tsadzu abe fotson badati, ba bazhenza bu Cindoi Yesu, kà ba Bitrus du, na kyen ra? 6Ko ami ba Barnabas kenken ci ken í tsa butso ba vo dii hunnu í du buju wa jiji ba jan wa wawa? 7Nī fo fo danra apa wa nuken dzun ki fin baa nuken ri jia ba dia tiri, kari dzea dia tukpa tiri fora? Akani wa nà ada anab ri jia nwaa ba? Akani wa pyu ana ri nì wa pen jan myia wa? 8Aji waa mna dan ra, cia aji wa gaga bu apa maari vinni ba. Ki cin waa adòn bu Cidon dan numa du. 9Ci tsadzu waa be ta ki fin adòn bu Musa danra, "Níká nde abú be tsuken nu bu ana waa niri nde ya ri tsa butso bu aza wa dada ba." Nina ga danra Cidon ri con ana maari vinni re, 10ko aji waa kuna dan ra kuna dan ki cin'i du? Ajinderi be ta abu wakara ki cin'i. San kari apa wa nane ku lolo hwan'a so danra kuri du abu dzun ki daa. Kà ci numa ba apa wa da aza, kuri lolo hwan'a so danra kuri du vokwin ki bye wa sansan bu adaa. 11Bui waa ī ndi nde aji bu Cidon tà ki fin mikyinni ra, ribi kan abu wa ci ba fyin ki byeni waa í ben buju wa jiji ba tukpa wa dze di ki byeni? 12Badati baa ri tsa butso bu Yesu ma ci ba gben wa du buju ki voni ji, bui ī kaibe waa í du buju ki voni ka bube waa nī yibe raba? Ama ī tài gbentsòn waji ba, nu waa í tà gbentsòn waji numa ī wa fyin bu koke kata jiji íká tsa abu dzun wari hwaden Aji wa Sansan bu Yesu Kiristi ku ya pyen ba. 13Ní yinu sansan danra apa wari tsa butso ki tan wa wa Cidon ri du buju wa jiji bua ki fin buju baa pajukun ri ten bi wa Cidon kiyo ra. Kati, baa ri tsa butso ki bye cin kyen­ kyen be kana du nyi kwinbe ki bye bucon waa beri ge bwan ki cin kyenkyen ra, 14Ci numa ra Cindoi Yesu nu dòn danra baa da dòn bu Aji wa Sansan be du bujube ki di bu adòn wa dada be. 15Ama bumi m pan tsemi gan­ gan numa ki cin gbentsòn baakara ba. M tāmi afa wakara ki cin waa jiji ní tsami numa tanma ba. Ki cin waa anu waa apa ku mbyà acò waa mna ca ra ci abu wa nya hwan azota, sanfo waa aki ku bwanmi. 16Ro waa mna dan Aji wa Sansan bu Yesu yi pajukun ra mri ndemi cinmi ki don ki cin aji waji ba. Ci ken m dan yi pajukun aji bu Ci­ don, mma tsami numa ba, ci abu wa ciei ki byemi. 17Akyan mri ma kyan tsa butso waji ba mikyin bu dimi mri kyan du vokwin. Ama cia numa ba, Cidon nderi kwami ki vo danra m tsa, ci numa ra ci ken m pan butso waa Cidon nde yimi rá m tsaku yo. 18Ci numa ra vokwin bumi ci kake kiyo tanma? Avo kwinmi ciri ḿ dan yi pajukun aji bu Ci­ don, ki bye conmi mká nyà vokwin kiyo ba. 19Ko waa m cimi anya bu apa dzun ba, ama m nde dimi kan nya bu ko kani kata ki cin waa jiji m gbebe bi ki bye Cidon. 20Ayo waa mri tsa butso ki bye Yahudawa m nde dimi so ci tsa­ dzu m ci Yahudawa ki cin waa jiji m gbebe bi ki bye Cindoi Yesu. Akwen bu dòn waa Cidon yi Musa ra panna Yahudawa ki tiri ki cin. Dede waa mna tsa butso babe ra ci tsadzu akwen waji pan nami ki tiri ki cin du, ko waa akwen waji baani ba gben dzun ki cinmi ra. Ki cin waa jiji m gbe pajukun baa kwen ki cinbe ra bi bye Cidon. 21Kà ci numa du, mma tsa butso ki bye tsu badati baa cibe Yahudawa ba, mri tami dimi yibe danra m ci Yahudawa ba. Akwen bu dòn bu Musa pan naabe ki cin ba. Ci numa ra mri tsa abu tsadzu abe jiji m gbebe bi ki bye Yesu. Tàa danra mri shèmí dòn bu Cidon ba, ki cin waa kwen bu Yesu Kiristi pan nami ki tiri ki cin. 22Dede waa m mana tsa butso ki bye baa wajinderibe ma ci bye­ bye numa, ci numa ra mri tà yibe ci tsadzu wajinderi bumi gban kaa bube ba, ki cin waa jiji m gbebe bi ki bye Yesu. Mri tà dimi ki bye ko kani kata danra ī ci abu dzundzun. Ki cin waa jiji nyaco dzun ma ki tiri m gbe badati bi ki bye Yesu. 23Mna tsa abu baakara kata ki cin waa jiji ḿ dan Aji wa Sansan bu Cindoi Yesu Kiristi yi pajukun be fo, jiji ami du, m du vokwin wa sansan ki bye Aji waa mna dan yibe ra. 24Nī yini waa pajukun baa mbasi bu ashò wa sheshe kata ri ci pyín adzundzun vinni ki finbe ri jiri vyon wa vyonvyon bu ashò waji ba? Ci numa ra ní foji shò wa sheshe ki cin keni jiji ní ji. 25Baa ri jojo bu asi wa mbamba kata, beri gban mikyin wa tswi fyin wani kata. Bena tsa numa jiji be jī abu wari tsababa ki jinni dán numa azota, ama bui jiji bu abu wari tsabaa jinni ba. 26Ki cin wakara bumi mna shesho pen penpen gemi mikyin ba. Ka ci numa mna dagba numa, mna dami vo da abe wa ki fa byeya ba. 27Mna jon pukan dimi kata mna pan dimi ki cin waa ki nyaken waa mma dan vinni aji bu Cidon yi pajukun ra, ami ba dimi m ká kò ba.

will be added

X\