1 BAKORINTOS 2

1Bandomi, ayo waa m bi ki byeni jiji m dan yini aji bu Cidon wa byenbyen waa ku tà yimi ra, m danmi aji dzun wa dzondzon ba abu wa fyenfyen dzun wa ci tutu waa nī hwa yini ba. 2Abu dzundzun wa ki mikyinmi waa mna con m dan yini ciri aji wa ki cin bu Cindoi Yesu Kiristi ba akia waa ku hu ki cin hin wa shon gege ra. 3Ayo waa m ndi bi ki byeni ra, m bi na hu dimi huhu numa, azin panmi yi adimi na vonvon suu numa. 4Aji waa m dan yini ba abu wa fyenfyen waa m fyen tà yini ra, m danmi aji dzun wa dzondzon dzun jiji ḿ tà yini dan­ ra m ci ba ayì ba, ama jiji m tà yini danra Denden bu Cidon ci ba gben. 5Ci numa ra wajinderi waa nī ci baku ra cia jiji kyinye bu apa ba, ama ci jiji agben bu Cidon. 6Ki bye baa ci ba ayì ki co bu Cidon, mri babe zen aji ba ayì du. Ama ayì waji cia ayì bu fin tswen wakara ba, ko bu abe akù baa ci ba gbentsòn wa ki fin tswen wari nwādzudzu raba. 7Ci numa ra mna zen aji bu ayì bu Cidon wa dzondzon waa ku ndi nde yu pajukun yo kuku ra. Ayì wakara Cidon yii avo waa ku ndi màa bye wa ki don ba bye wa ki jinni raba jiji í du hwe. 8Akù dzun wa ki fin tswen wa yì cinna bu aji wakara baani. Akyan beri ma ndi yinu beri ndebe Cindoi wa ci ba hwe kata kan ki cin hin wa shon gege ba. 9Ci tsadzu waa be ta so fin Afa bu Cidon danra, "Abu dzun waa apa mbyà foa raba, abu dzun waa apa ga foa aji ki cin'a danra ribi tsa ba, abu waji ciri abu waa Cidon mbyāsan so pajukun baa conku." 10Ai ciri pajukun baa Cidon tà ayì bua waa ku ndi nde yu so hun ra dzu bye Denden wa nyenye. Ki cin waa Denden wa nyenye tsayi wa mbyàyi koke kata nu, ci numa ba abu wa yuyu bu Cidon. 11Ki fin pajukun akani tsaka wa yì abu wa ki fin mikyin bu apa ri? Se aku apa waji ba dia ri tsaka wa yi abu waa kuna ga ki fin mikyin'a ranu. Ci numa ra apa dzun baani wari yi aji wa yuyu bu Cidon, se Denden wa nyenye maari ri yi ri abu wa ki fin mikyin bu Cidon. 12Ci numa ra Denden waa ī du ra, cia abu fin tswen ba. Ku ci Denden wa dzu bye Cidon bi jiji í hwayi cinna bu koke kata waa Cidon nde tafan vo yii. 13Ki cin wakara iri dan'i aji ba ayì bu pajukun baa ki fin tswen ba, ama Denden bu Cidon ciri wari fyen tà yii aji bu Cidon. Aji wakara ina dan yafan fin jinni yi pajukun baa ci ba Denden bu Cidon ki fin mikyinbe. 14Ama apa wama cia ba Denden bu Cidon ba, kuri zen'ande ba abu baa ci bu Denden bu Cidon ba, ki cin waa kuri mbyà danra ci abu wa dán numa ki zoa. Kuri tsakaa waa ku mbyà yibe ba. Ki cin waa ci ken apa ku ci ba Denden waji hunnu ku hun hwa­ yi. 15Ci numa ra apa wama ci ba Denden bu Cidon kuri mbafo koke kata, ama aku ba dia pajukun ri hwa yibe baku danra ku ci apa wa sansan ba. 16Ci tsadzu waa Afa bu Cidon danra, "Akani hwayi ba mikyin bu Cidon ri akani ri ga zaku aji yo ri. Ama bui ī ci ba mikyin bu Cindoi Yesu Kiristi ki fin'i.

will be added

X\