Taitos 2

1Taitos, yu afi tiich wa rait; yu afi tiich di chuut. 2Tel di uolda man dem se dem no fi go uova buod wid notn. Dem fi kanchuol demself an liv so piipl kyan rispek dem. Di uolda man dem fi eva chrang iina wa dem biliiv, aalwiez shuo lov an neva gi op.

3A siem so di uolda uman dem fi liv laik uman we se dem a fala Gad. Dem no fi tel lai ar taak bad bout ada piipl. Dem no fi lov wain so til dem kyaahn tap jringk it niida. Di uolda uman dem fi tiich wa gud. 4Kaaz a so di yongga wan dem wi lorn fi lov dem ozban an dem pikni. 5Dem wi lorn ou fi ron dem ous. Di uolda uman dem wi elp di yongga wan dem lorn ou fi kanchuol demself, liv wan gud an kliin laif, an fi fala wa dem ozban se. So dat nobadi kyaahn se notn bad bout Gad wod.

6Push di yongga man dem fi kanchuol demself tu. 7Yu, Taitos, mek shuor se yu eva a du gud sitn an liv rait, so piipl wi si ou yu liv an fala wa yu du. Wen yu tiich mek shuor se yu taak di chuut an tek it siiriyos. 8Mek shuor se wa yu a tiich a riili Gad wod we nobadi kyaahn taak gens. Da wie de di piipl dem we go gens yu wi shiem kaaz dem kyaahn se notn bad bout wi.

9Tiich di sliev dem fi lisn an fala wa dem maasta se aal di taim. Dem fi du dem bes fi mek dem maasta api iina aal we dem du. Tel di sliev dem no fi bak ansa dem maasta niida, 10ar tiif fram dem. Dem fi anis an shuo di piipl dem se dem kyan chos dem. Wen dem du dis, piipl wi luk pan dem an rispek wa wi tiich bout wi sievya Faada Gad.

11Gad shuo ou im gud tu wi wen im mek wan wie fi piipl get siev. 12Di gud we im du fi wi, tiich wi ou fi ton we fram wikidnis an fi no lov di sitn dem we di worliyan dem waahn. 13It a tiich wi wail wi wiet an luk faawod fi di die wen wi laad an sievya Jiizas Krais kom bak iina aal a im powa. 14Im a di wan we gi op im laif fi siev wi fram aal kaina wikidnis an mek wi kliin so wi kuda bi im piipl; piipl we eva a chrai fi du gud.

15Mek shuor se yu tel evribadi dem sitn ya. Yuuz di powa we Gad gi yu fi inkorij an karek di piipl dem. An no mek nobadi put yu dong ar se yu a wan bad tiicha an no pie yu no main.

will be added

X\