Revilieshan 22

1Den di ienjel shuo mi di riva wid di waata we gi laif. Di waata did a kom fram Gad an di Biebi Shiip chuon. Di waata did so klier it luk laik kristal. 2Di waata did a ron dong di migl a di siti mien ruod. Pan di tuu saida di riva, di chrii we gi laif did a gruo. Di chrii bier fruut twelv taim fi di ier — wan taim fi evri mont a di ier. Di piipl iina di worl yuuz di liif dem fi mek dem beta wen dem sik. 3Notn ar nobadi we Gad no aksep kyaahn go iina di siti. Gad an di Biebi Shiip chuon a go iina di siti an Gad piipl ago worship im. 4Dem ago si Gad fies tu fies, an im niem ago rait pan dem farid. 5No muo nait naa go kom iina di siti, so Gad piipl dem naa go niid no lamp lait nar no son lait, kaaz di Laad Gad brait brait lait ago lait op di siti. An Gad piipl ago ruul fi eva an eva. 6Di ienjel tel mi se, “Aal a dem sitn ya we mi a tel yu chuu an evribadi kyan biliiv dem. Di Laad, di Gad we gi'im Spirit tu im prafit dem fi priich im wod, sen im ienjel kom shuo im sorvant di sitn dem we suun apm.”

7Jiizas se, “Lisn, aal a unu, mi suun kom! Unu si enibadi we du aal we rait dong iina da buk ya bout wa ago apm nou an wa ago apm lieta, a dem wel api.”

8A mi, Jan, we ier an rait dong dem sitn ya. An wen mi did ier an si dem sitn de, mi fling dong miself a di ienjel fut we did a shuo mi di sitn dem. Mi did bout fi worship im, 9bot di ienjel se tu mi, “No, no du dat! Mi a wan sorvant jos laik yu an yu breda — di prafit dem, an aal uu du we rait dong iina da buk ya. A Gad yu fi worship!”

10“Di sitn dem we bout fi apm nou, an di sitn dem we ago apm lieta we rait dong iina da buk ya, no aid dem fram piipl, kaaz di taim suun kom fi aal a dem apm. 11So, di piipl dem we a du rang mos gwaan du rang. Di piipl dem we a du aal kaina naasinis mos gwaan du dem naasinis. Di piipl dem we a liv rait mos gwaan liv rait, an di piipl dem we a kip demself kliin mos gwaan kip demself kliin.”

12“Lisn, aal a unu, mi suun kom! An wen mi kom mi ago ponish di piipl dem we du rang, an mi ago gi di piipl dem we a liv rait wa mi did se mi wuda gi dem. Evribadi ago get wa dem fi get bies pan wa dem du. 13Mi a di leta Ie an mi a di leta Zed. Evriting staat wid mi, an evriting en wid mi..

14“Di wan dem we wash dem lang jakit a dem api, kaaz a dem ago get di rait fi go iina di siti an fi iit fruut fram di chrii we gi laif. 15Bot di piipl dem we mek demself doti wid aal kaina naasinis kyaahn go iina di siti: piipl we wok obiya, du aal kaina seks sin, kil piipl, worship faalz gad, an piipl we lov fi tel lai, non a dem kyaahn go iina di siti.

16“A mi, Jiizas, sen mi ienjel kom tel yu dem sitn ya fi tel di choch dem. Mi a di wan we kom fram King Dievid fambili — Mi a di wan we komiin laik di brait staar we shain wen di son a kom op a maanin taim.”

17Di Spirit an di braid se, “Kum Laad Jiizas!” An aal uu ier wa de iina da buk ya, se, “Kum Laad Jiizas!” Aal uu fa chuot jrai an we waahn waata fi jringk, kom kom tek di frii waata we gi laif.

18Mi a waan enibadi we ier di sitn dem we rait dong iina da buk ya bout wa ago apm. Mi a waan unu, ef nobadi ad notn, Gad ago mek dem go chuu di sevn torbl sitn dem we rait dong iina da buk ya. 19An ef enibadi tek we eni paat a di mesij we iina da buk ya bout we Gad se ago apm, Gad ago tek we fi dem rait fi iit non a di fruut fram di chrii we gi laif an im rait fi liv iina di uoli siti, we rait dong iina da buk ya.

20Jiizas, di wan we tel wi dem sitn ya, im se, “Ye, mi suun kom.” Iemen! Kom Laad Jiizas!

21Mi prie se di Laad Jiizas wi shuo aal a im piipl lov iivn duo wi no dizorv. Iemen!

will be added

X\