Revilieshan 1

1Di sitn dem we rait dong iina da buk ya, a di sitn dem we Gad shuo Jiizas Krais. Gad shuo im dem sitn ya, so im kuda tel im sorvant dem bout di sitn dem we suun apm. A dem sitn de Jiizas sen im ienjel go tel im sorvant Jan. 2An Jan rait dong evriting wa im did si an ier. Im rait dong aal a di mesij dem we Gad sen im, an evriting we Jiizas Krais shuo im. 3Enibadi we riid di sitn dem we iina da buk ya out loud ago api, an di wan dem we ier it an du wa it se, dem ago api tu. Kaaz di taim suun kom wen aal a dem sitn dem we Jiizas tel wi bout ago apm.

4Dis a Jan. Mi a rait da leta ya tu di sevn choch dem we de iina Iezha. Mi a prie se Gad, di wan we alaiv, di wan we de bout fram wie bak wen, an di wan we ago kom bak a ort, an im Uoli Spirit we de infronta im chuon, wi gud an kain tu unu an gi unu piis iina unu aat. 5An mi prie se Jiizas Krais, di wan we aalwiez taak di chuut bout Gad, wi gud an kain tu unu an gi unu piis iina unu aat. Im a di fos wan fi ded an kom bak alaiv, an a im ruul uova aal a di king dem we de pan ort. Jiizas a di wan we lov wi an a im frii wi fram wi sin dem wid im blod wen im ded pan di kraas.

6Sieka dat wi komiin laik wan fambili, wan gruup a priis fi sorv Gad im Faada. So wi fi ana an rispek Jiizas Krais fi eva an eva! Iemen! 7Luk de! Im a kom iina di kloud, an evri yai ago si im, iivn di wan dem we mek dem kil im wid di suod; an aal di piipl dem pan ort ago baal sieka im. A so it ago go! Iemen.

8Di Laad Gad se, “Mi a di leta Ie an mi a di leta Zed. Evriting staat wid mi, an evriting en wid mi. Mi a di wan we alaiv, di wan we de bout fram wie bak wen, an di wan we ago kom bak a ort. A mi a di wan we av aal a di powa.”

9Mi a Jan, unu breda an fren we a go chuu di siem sofarieshan we unu a go chuu. Aal a wi ago tek paat iina Gad kindom, an siem laik unu, mi naa gi op — mi wi gwaan sofa til Gad kom bak. Kaaz mi priich Gad wod an tel piipl aal a di sitn dem we Jiizas shuo mi, dem put mi pan wan ailan niem Patmos. 10Pan di die wen piipl gyada fi worship di Laad, di Uoli Spirit tek kanchuol a mi. Den mi ier wan vais baka mi, an di vais loud an klier laik wan chompit. 11Di vais se tu mi se, “Rait dong dem sitn ya we yu si iina wan buk an sen it go a di sevn choch dem: sen it go a Efisos, Simorna, Porgamom, Taiyataira, Saadis, Filidelfiya an Leyodiisiya.

12So mi ton roun fi si uu a taak tu mi. Wen mi ton roun mi si sevn a di sitn dem we wi yuuz fi uol kyanggl, an di uol a dem mek outa guol. 13An tan op iina di migl a dem, mi si sopm we luk laik wan man. Im did av aan wan lang lang jakit we kech im klier dong a im fut, an wan guol schrap kraas im ches. 14Im ed an im ier did wait laik katn ar sunuo, an im yai dem shain brait laik wan faiya we a bliez. 15Im fut dem shain brait laik branz aiyan we dem rob til it shain, an we dem did bon iina faiya fi get out aal wa no fi iina it. An wen im taak, im vais soun loud laik di naiz fram wan big big waatafaal. 16Im did av sevn staar iina im rait an, an wan suod wid di tuu said dem wel shaap kom outa im mout. An im fies shain brait laik di son a migl die.

17Wen mi si di man, mi fling dong miself a im fut an no muuv — laik se mi ded. Den im chrech out im rait an, an toch mi an se tu mi se, “No bada fried. Mi a di fos an mi a di laas. Evriting staat wid mi, an evriting en wid mi. 18Mi alaiv! Mi did ded wan taim, bot luk, nou mi a liv fi eva! Mi av di kii an di powa fi uopm ar lak op di plies we di ded piipl dem de, an mi kyan mek dem kom bak alaiv.

19“So rait evriting iina di buk, dat a di sitn dem we yu si we a apm nou an we go apm lieta. 20Di sevn staar dem we yu si iina mi rait an, an di sevn guol sitn dem fi uol kyanggl, dis a wa dem miin: di sevn staar dem a di liida fi di sevn choch dem, an di sevn sitn fi uol kyanggl a di sevn choch dem.”

will be added

X\