Jan 16

1“Mi a tel unu dem sitn ya so dat unu no tap biliiv iina mi. 2Dem ago ron unu outa di Juu dem Choch. Di taim aal a kom wen sumadi ago kil unu an tingk se dem a du sitn gud fi Gad. 3Dem ago du aal a dem sitn ya, kaa dem no nuo mi ar mi Faada. 4Mi a tel unu dem sitn ya, so dat wen di taim kom, unu wi memba se mi did waan unu.

5Bot rait ya nou, mi a go tu di wan we sen mi kom ya, an non a unu no aks mi se, ‘A we paat yu a go?’ 6Bot unu aat evi dong, kaa mi tel unu dem sitn ya. 7Bot mi a tel unu fi chuu chuu se dat a fi fu'unu uona gud dat mi a go we. Kaa ef mi no go we, di Elpa naa go kom tu unu. Bot ef mi go we mi ago sen im kom tu unu. 8Wen im kom, im gweehn mek di piipl dem iina di worl nuo se dem rang bout sin, dat dem rang bout ou sumadi kyan get rait iina Gad yai an rang bout ou Gad joj piipl. 9Dem rang bout sin, kaa dem no chos iina mi. 10Dem rang bout Gad an bout uu an wa rait iina Gad yai, kaa, luk ya no, mi a go a mi Faada duo piipl tingk se mi a sina. Mi a go bak a mi Faada an unu naa go si mi no muo. 11An dem rang bout ou Gad joj piipl, kaa di wan we ron tingz iina di worl, Gad rait im aaf aredi.

12“Mi av nof muo sitn fi se tu unu, muo dan unu kyan tek iin rait ya nou. 13Bot wen di Spirit we shuo di chuu sitn dem bout Gad kom, im gweehn mek unu nuo aal a di sitn dem we chuu. Im naa go taak aafa im uon. Im onggl ago taak wa im ier mi Faada se, an im ago tel unu wa ago apm. 14Im ago shuo ou mi big an powaful, kaaz im ago ier wa mi se an tel unu it bak. 15Evriting we mi Faada uon, a fi mi tu. A dat mek mi se di Spirit ago tek wa mi se an mek unu nuo it fi unuself.

16“Likl bit fram nou unu naa go si mi no muo, den likl bit afta dat unu gweehn si mi.”

17Wen Jiizas don se dat, som a im falara dem se tu dem wan aneda se, “A wa im miin wen im se, ‘Likl bit fram nou unu naa go si mi no muo, den likl bit afta dat unu gweehn si mi’? An wa im miin wen im se, ‘Kaa mi a go a mi Faada’?” 18Dem kip aan a aks aks, “A wa im miin wen im se, ‘Likl bit fram nou’? Wi no get we im a se.”

19Jiizas si se dem did waahn aks im bout it, so im se tu dem se, “A wa mi dis se unu a aks unu wan aneda bout, ‘Likl bit fram nou unu naa go si mi no muo, den likl bit afta dat unu gweehn si mi’? 20Mi a tel unu fi chuu chuu se unu gweehn ala an baal, bot di piipl dem iina di worl ago wel api. Unu ago sad, bot dat a o chienj an unu ago wel glad. 21Wen wan uman a av pikni shi iina uol iip a pien, kaa di taim fi shi av pikni kom. Bot wen shi av ar pikni, shi no memba di pien agen sieka ou shi glad se sumadi baan kom iina di worl. 22A sed wie so it go wid unu: Unu iina pien nou, bot mi gweehn si unu agen, an unu a glad iina unu aat, an nobadi kyan go mek unu no api agen. 23Da taim de, unu naa go aks mi notn agen. Mi a tel unu fi chuu chuu se mi Faada gweehn gi unu eniting unu aks fa kaa unu a mi falara. 24Aal nou unu no aks fi notn kaa unu a mi falara. Aks an unu wi get we unu aks fa, so dat unu kyan riili riili api.

25“Mi a yuuz picha langwij tel unu dem sitn ya. Taim a kom wen mi naa go taak da wie ya agen. Mi ago taak tu unu plien an chriet bout mi Faada. 26Da die de, unu gweehn aks fi tingz kaa unu a mi falara. Mi naa se mi gweehn aks mi Faada fi notn fi unu. 27No, kaa mi Faada lov unu, kaaz unu lov mi an unu biliiv se a Gad mi kom fram. 28Mi lef fram wich paat mi Faada de an kom iina di worl. Rait ya nou, mi a lef di worl fi go baka mi Faada.”

29Den im falara dem se tu im se, “Si'it de, a nou yu a taak plien an chriet an naa taak iina picha langwij! 30A nou wi nuo se yu nuo evriting, an yu no niid nobadi fi aks yu notn. Sieka dat, wi biliiv se a Gad sen yu kom iina di worl.”

31“Unu biliiv nou?” Jiizas se tu dem. 32“Unu luk! Di taim a kom — an it de ya aredi — wen aal a unu ago skyata an go a unu yaad. Unu ago lef mi wan. Bot mi no de pan mi uon, kaa mi Faada de ya wid mi.

33“Mi tel unu dem sitn ya so dat unu kyan av piis iina unu aat kaa mi an unu a wan. Iina da worl ya, unu gweehn av chobl an sofarieshan. Bot no fret! Mi don win di fait wid di worl.”

will be added

X\