Jiemz 5

1Lisn tu mi, unu rich piipl, ala an baal kaaz som torbl sitn ago apm tu unu! 2Unu moni an aal a unu nais sitn dem ratn aaf, an insek a nyam op nyam op unu dier kluoz dem. 3Unu guol an unu silva dem get rosti, an dem ago joj unu an shuo se unu gilti. Dem ago nyam op unu flesh jos laik se a faiya a bon unu op. Unu pak op wan uol iip a moni an nais sitn iina dem taim ya wen di worl suun don. 4Lisn tu mi! Unu rab di piipl dem we wok pan unu faam an no pie dem we dem wok fa. Nou dem pie we unu tiif aaf a baal out gens unu tu di Laad we ruul uova evriting.

5Unu a liv big laif pan ort. Unu get evriting unu waahn fi mek unu api. Bot rait ya nou, unu komiin laik dem big fat kou we dem a kyari go a bucha shap fi go kil. 6Unu mek joj rait aaf piipl we no du notn rang se dem gilti, an morda dem. An dem kudn iivn tan op fi demself gens unu.

7Mi breda an sista, no gi op, jos wiet til di Laad kom. Tingk bout ou wan faama afi wiet lang fi di soma an di spring rien fi mek im fiil gruo. 8A siem so unu fi tan todi an no gi op, kaaz Gad suun kom. 9Mi breda an sista, no bada grombl grombl bout wan aneda, ar Gad wi joj unu. An luk, di joj tan op rait a di duor.

10Mi breda an sista, ef unu waahn fi nuo ou fi riili wiet pan di Laad iivn wen unu a sofa, luk pan Gad prafit dem we gi out im mesij. Dem neva gi op, iivn wen dem did a go chuu nof chobl. 11Lisn tu mi, wi se di wan dem we tan op chrang fi Gad dem bles. Unu memba ou Juob did tan op chrang fi Gad chuu aal a di torbl sitn dem we im sofa? Unu memba ou Gad elp im, an kyari im chuu. Di Laad du aal a dem sitn de kaaz a ou im jengkl an gud an kain.

12Bot mi breda an sista, ef unu no memba notn els, memba dis, no swier non at aal. No swier an kaal pan evn, ar no swier an kaal pan ort, ar no swier an kaal pan notn at aal. Jos mek shuor se wen unu se “yes,” unu miin yes, an wen unu se “no,” a no unu miin. Da wie de unu wi no kaal dong Gad jojment pan unuself.

13Ef non a unu a sofa an av prablem, unu fi prie. Ef non a unu api, unu fi sing an priez Gad. 14Non a unu sik? Aks di choch liida dem fi kom prie fi unu. Mek dem put aliv ail pan unu an kaal pan di Laad niem. 15An wen di choch liida dem prie tu di Laad an biliiv se im ier dem, dem prieya ago mek di sik sumadi get beta. Di Laad ago mek dem get beta, an ef dem did sin, im ago paadn dem.

16Ef unu sin, unu fi tel wan aneda wa unu du, an prie fi wan aneda so unu kyan get beta. Wen sumadi we liv rait prie, im prieya ful op a powa an wi mek gud sitn apm. 17Ilaija a did jos wan man laik enibadi els. Im prie aad aad an aks Gad no fi mek no rien faal. An fi chrii an a aaf ier, no iivn wan jrap a rien neehn faal pan di lan. 18Den im prie agen an aks Gad fi sen rien, an rien faal so dat di lan bier nof fuud.

19Mi breda an sista, ef nobadi mongks unu schrie fram Gad chuu mesij an wan a unu elp im kom bak, 20memba dis: di wan we elp im kom bak ago siev im so im no ded an im wi get paadn fi di uol iip a rang we im du.

will be added

X\