Aks 26

1Den Agripa se tu Paal, “Yu kyan taak fi yuself nou.” So Paal ries im an an staat taak op. Im se, 2“King Agripa, mi tingk mi wel loki tide fi get di chaans fi taak op fi miself infronta yu bout aal a wa di Juu dem se mi du, 3kaaz mi nuo se yu wel nuo bout ou di Juu dem liv an bout aal di sitn dem we dem aagyu bout. So mi a beg yu du, tek taim an lisn mi.

4“Nou aal di Juu nuo ou mi liv fram mi a likl bwai — fram mi a likl bwai a gruo op iina mi uona konchri an iina Jeruusilem. 5Dem nuo, kaaz dem nuo mi fram lang lang taim. An ef dem waahn dem kyan tel yu ou mi liv azkaadn tu di gruup mongks wi piipl we fala di Laa tu a tii, kaaz mi a wan Farisii. 6Nou dem a joj mi kaaz mi biliiv an an a luk fi get di sitn dem we Gad pramis fi gi wi faada faada dem. 7Yu ana, a da siem pramis ya di twelv chraib a wi piipl dem a luk fi get. A dat mek dem gwaan sorv Gad nait an die. A sieka wa mi a luk fi get fram Gad mek di Juu dem a se di sitn dem we dem a se gens mi. 8Wa mek unu Juu mek op unu main no fi biliiv se Gad mek sumadi we ded kom bak alaiv?

9“A siem so mi did biliiv se mi did afi du evriting we mi kuda du fi ort Jiizas we kom fram Nazaret. 10An a dat mi yuus tu du iina Jeruusilem. Mi neva jos get powa fram di ed priis fi lak op som a di piipl dem we biliiv, bot mi aal vuot gens dem wen dem sen dem fi ded. 11Mi ponish dem nof taim iina di Juu dem choch an chrai fi get dem fi ton we fram Jiizas an se dem no biliiv iina im no muor. Mi did so mad wid dem mi go afta dem aal iina farin konchri fi mek dem sofa.

12“A dat mi did a go a Damaskos fa, an di ed priis dem did gi mi wan leta we gi mi di powa fi dwi'it. 13Bot yu ana, bout twelv aklak wen mi did de pan wi wie, mi si wan brait brait lait fram evn, braita dan di son kom uova mi an uova did man dem we did de de wid mi. 14Aal a wi jrap a grong, an mi ier sumadi se tu mi iina di Aramieyik langwij se, ‘Saal, Saal, wa mek yu a mek mi sofa? A ort yu a ort yuself wen yu du dat. Dat komiin laik se yu a kik gens wan shaap shaap tik.’

15“So mi aks ‘A uu yu, Laad?’ Di Laad ansa mi se,

16Bot git op tan op kaaz mi pik yu fi shuo miself tu yu. Mi du dat fi mek yu wan a mi sorvant fi go tel piipl bout di sitn dem we yu si an we mi ago shuo yu. 17Mi ago siev yu fram yu uona piipl an fram di piipl we a no Juu, we mi ago sen yu tu. 18Mi a sen yu tu dem so yu kyan elp dem fi si an kom outa di daaknis an kom iina di lait. An mi a sen yu fi elp dem get frii fram Sietan powa an mek Gad ruul dem laif. Da wie de dem wi ton paat a Gad piipl uufa sin im paadn kaaz dem biliiv iina im.’

19“So King Agripa, di wan we kom fram evn we mi si iina mi vijan, mi du wa im se. 20So di fos plies mi priich a Damaskos. Afta dat mi priich iina Jeruusilem an aal uova Judiya. Mi priich tu di piipl we a no Juu tu. Mi tel dem fi ton we fram dem sin an ton tu Gad an fi du di sitn dem we shuo se dem riili sari bout dem sin. 21A dat di Juu dem ares mi fa wen mi did de iina Gad ous an a dat mek dem did a chrai fi kil mi. 22Tu da die ya Gad a elp mi an so mi tan op infronta aal a unu, weda unu impuotant ar no impuotant fi taak di chuut. Di siem ting wa Muoziz an di prafit dem did se ago apm, a di siem ting mi a se. 23Dem se di wan we Gad sen fi siev piipl did afi ded so im kuda bi di fos wan fi kom bak alaiv an fi mek piipl we a Juu an piipl we a no Juu nuo se dem kyan get siev, an da mesij de ago komiin laik lait tu dem.”

24Wail Paal did a taak, Festos kaal out pan tap a im vais, “Paal, yu mad. Yu ed a tek yu! Yu lorn tu moch an yu ed a tek yu nou!” 25Bot Paal ansa im se, “Anarebl Festos sa, mi no mad. Wa mi a se a chuu, mi naa taak no fuulinish. 26Mi naa taak no fuulinish, kaaz di King nuo bout aal a dem sitn ya, so mi a taak tu im an naa uol notn bak, kaaz mi shuor se non a dem sitn ya no apm we im no nuo bout, kaaz dem neva apm iina wan kaana. 27King Agripa, yu biliiv wa di prafit dem rait? Mi nuo se yu biliiv.”

28Agripa se tu Paal, “So iina no taim yu a chrai ton mi iina sumadi we biliiv iina Jiizas?”

29So Paal ansa se, “Mi prie Gad se no onggl yu bot aal uu a lisn mi tide wuda ton jos laik mi, weda iina no taim ar aal ef it tek lang. A onggl wan ting mi no waahn, mi no waahn unu fi chien op laik mi.”

30So di King, di govana, Borniis an aal uu did sidong de wid dem get op, 31an wen dem did a lef dem se tu dem wan aneda, “Da man ya naa du notn we im shuda get lak op fa, ar we im fi ded fa.” 32Agripa se tu Festos se, “Ef da man ya neva aks fi Siiza di ruula joj im, wi kuda let im go.”

will be added

X\