TITO 3

1Ẍtic'a ha natij tet heb'ya' jetb'i ta yijyom chute sb'a heb'ya' tet naj jahaw b'oj tet hej yak'b'il autoridad, b'oj ayn̈etic'acoj yin̈ sc'ul yuni hej tzetet c'ul. 2Cha cach heb'ya' taj ton̈c'a tx'oj stzotel heb'ya' yin̈ anma taj ay howal chu heb'ya' yin̈ anma. Ayojab' heb'ya' nianb'ail, ayojab' yelapnoj ye anma yul sat heb'ya'. 3Haxca yet yalan̈to, hayon̈ hun ayon̈coj yin̈ sucal, xco man̈c'o tzet chal Comam Dios, c'aynajon̈toj, ayon̈coj yalan̈ tzet chal yec'najil janma b'oj hej tzetet choche co nimanil. Xcon̈ ehc'oj yin̈ xtx'ojal b'oj jec'najil, xcon̈ yahot b'oj xco yahni pax jetb'i. 4Yaja' yet syeni co Dios Scolomal jet sc'ulal sc'ul, ẍcon̈ yochen co hunil, xcon̈ scolni. 5Mach xto Comam yin̈ tzet jeyi, ta ay hunuj tzetet c'ul xju, to ton̈e stz'a' sc'ul Comam jin̈, yuxin xcon̈ scolo. Xcon̈ sajn̈eni yet xcon̈ ya'ni pitzc'aoj Comam yin̈ scayel yet xa'ni Comam Espíritu Santo k'inal ac' jet. 6Yu Comam Jesucristo Scolomal jet, xa' Comam Comam Espíritu Santo jet yin̈ mach yecheb'anil. 7Yu sc'ulch'anil sc'ul Comam Jesucristo chu co can c'ulal yul sat Comam Dios cat co chanoj hune' k'inal mach stan̈b'al b'ay ẍcawxi co c'ul ti'. 8Hune' ẍwal ti'an caw yeli.Ẍwochean ta caw chawa' yilal, yun̈e hantaj mac cha' yuluj sc'ul yin̈ Comam Dios, chacoj yin̈ sc'ul yuni b'aytet c'ul. Hunk'aan ti' ay sc'ulal b'oj ẍcolwa yin̈ anma. 9Yaja' hej tzetet tx'oj, macha mohn̈etoj, haca'na halo sucal tzoti', yic'ti'al ichmame, hej chichonc'uleal, hej teyeb'ail yin̈ sley ya' Moisés. Hunk'aan tu' sucal tzoti'n̈e, b'oj mach yelapnoj yeyi. 10Ta ay mac ẍpohnitoj iglesia yu scuywab'al mataj ye chute scuyni, cha cach hunel cayeloj. Ta machab'etoj, iloj hune' mac tu' te xol. 11Haxca yu tzet chu tu', hat cha txumu ta hune' mac tu' xax yetatoj sb'a, yohtajxa ta mat t'in̈anoj yecoj. 12Yet ẍwanojtoj ya' Artemas tawetan, mato ya' Tíquico, chawa' yilal ha tit hin hawilnoj yul con̈ob' Nicópolisan, haxca xax wacoj yin̈ hin c'ulan ta hat chin ehoj b'etu'an yet ch'uluj stz'ayical b'ay ch'ay chew. 13Hantaj chuapnoj hawu colwaan̈ yin̈ ya' licenciado Zenas, b'oj ya' Apolos. Chawa'ni hantaj ch'ocnicoj yu heb'ya' yetoj sb'eh, yun̈e matzet ẍmahlan heb'ya'. 14Sk'aytzeab' sb'a heb'ya' jetb'i smunlayi haxin̈wal chu scolwa heb'ya' yin̈ mac ẍmahlani, yun̈e mat nab'a'oj ay heb'ya'. 15Hantaj heb'ya' ay tin c'atan̈ b'eti'an chatoj heb'ya' scawil ha c'ul. A' pax scawil sc'ul heb'ya' cha' yuluj sc'ul yin̈ Comam chon̈ ochen ay b'etu'an. Ya'ab' Comam Dios sc'ulch'anil sc'ul teyet te hunil.


Copyright
Learn More

will be added

X\