TITO 2

1Walach Tito, ha' b'aytet lahc'ulal yalni b'oj st'in̈anil cuywab'al, ha' chawa' scuyu anma. 2Hal tet heb'ya' juẍtaj yihla anma ta scach sb'a heb'ya', ta c'ul ya'ni hala' sb'a heb'ya' tet anma, ta st'in̈anil chu heb'ya', ta lin̈an heb'ya' yin̈ cuywab'al b'ay ẍja' yuluj co c'ul, ta choche heb'ya' anma, b'oj ta ẍtecha sya'tajil yu heb'ya'. 3Hactu' hawalni pax tet heb'ya' janab' yihla anmaxa, ta c'ul chute sb'a heb'ya' haca' mac yet-xa Comam Dios, ta mat hob'om tzoti'oj heb'ya', ta mach scamtze heb'ya' swi' yu te' uq'ue. 4Syeb'ab' heb'ya' tzetet c'ul yin̈ sat heb'ya' janab' k'opoto, haxin̈wal choche heb'ya' yichamil b'oj niẍtej yunin, 5ta st'in̈anil chu heb'ya', mach tx'oj say heb'ya' yin̈, ta c'ul smunla heb'ya' yul yatut, c'ulch'an chute heb'ya' sc'ul, b'oj yijyom chute sb'a heb'ya' tet yichamil, yun̈e mach tx'ojal ẍhal-lax yin̈ stzoti' Comam Dios. 6Iptze pax heb'naj tzehtaj ta scach sb'a heb'naj yin̈ hej tzetet tx'oj. 7Hach caw yetwanoj ay ha yeni hej tzetet c'ul. Ha' tzet caw yeyi, ha' cha cuyu, han̈c'a st'in̈anil chawala. 8Caw c'ul ha tzoteli, haxin̈wal mach mac tx'oj ẍhalnoj tawin̈. Ha' yet to xtx'ixwojcan̈ mactaj ẍpaq'uicoj tawin̈ tu', haxca machu yalni hunuj tx'ojal jin̈. 9A' scuyb'anil heb'naj chejab' yin̈ tzet chu smunlayi: Yijyomojab' chute sb'a heb'naj tet naj yahaw munil tu', c'ul chute sb'a heb'naj, mat can̈oj sta'wen heb'naj sti' naj yahaw b'ay ẍmunla tu', 10mach'elk'an heb'naj, ẍcawxi sc'ul anma ta yel chal heb'naj, yun̈e yil-laxi to caw eltich'an scuywab'al Comam Dios Scolomal jet. 11Haxca sye Comam Dios sc'ulch'anil sc'ul jet, yun̈e sunil anma chu schani scolb'anil. 12Yu hune' sc'ulch'anil sc'ul Comam tu', ha' ch'a'ni co txumuluj ta yilal ẍjacanoj hej xtx'ojal chu anma mach Dios sat, b'oj tzet chochetoj anma mat tzujanoj yin̈ Comam. Ha' hune' st'in̈anil tu', ha' chon̈ cuyni jehc'oj yin̈ stoholal ẍju, b'oj co cachni co b'a, b'oj cam janicoj janma yin̈ Comam Dios yulb'al ẍtoj co sataj ti'. 13Jechmac'oj hune' tz'ayic caw eltich'an b'ay ẍcawxi co c'ul, hune' tz'ayic b'ay syeb'can̈ sb'a smay Scolomal jet Jesucristo co Dios caw can̈ yeyi. 14Ha' xa' camoj sb'a co heleloj yu hon̈ scolniloj tet xtx'ojal, chon̈ sajn̈encan joc scon̈ob'oj, yun̈e ẍjoche jub' b'aytet c'ul. 15Ha' hune' ti' yilal ha cuyni tet heb'ya' jetb'i, sunil ha c'ul cha cachni heb'ya'. C'ul hawa'ni hala' ha b'a tet heb'ya'.


Copyright
Learn More

will be added

X\