TITO 1

1Hanin Pablo inti'an, ismunlawom Comam Dios wehan, yebpaxo ischejab Comam Jesucristo yu winitijan anma sic'bilxalo yu Comam Dios, cat yanico yanma yin̈ Comam Jesucristo, yun̈e yohtan̈enilo isyelal cuybanile chon̈inito cowatx'en tzet choche Comam Dios. 2Hac ton tu' inmunilan yun̈e yanico anma tu' yin̈ isc'ul ischahni k'inale mach istan̈bal haltebilcano yu Comam Dios yettax maẍto chiwatx'icano sat yiban̈k'inal ti'; wal xin caw mach chaco Comam lek'ti'al. 3Tinan̈ xin, xa'ayilo istiempohal bay isyelo Comam Istzoti' jet. Ha' Comam Dios Cocolomal haln̈e wetan ta yilal inyijenan walnic'ojan Istzoti'. 4Chintz'ibn̈etojan hune' incartati'an tawet wuẍta Tito. Yin̈ caw isyelal haca' inc'aholan hawehi, yuto haninan walan Istzoti' Comam hawabe'. Yak'ab Comam Dios yeb xin Cocolomal Jesucristo isc'ulal yeb isc'ulch'anil isc'ul tawet yebpaxo xin ak'anc'ulal. 5Caẍwacanojan bey tx'otx' Creta tu' yun̈e hawatx'en sunil huntek'an ayto iswatx'i, cat hasaynicano mac chi'oc ancianohal xol ebnaj juẍtaj yul hunun con̈ob bey tu', haca' wute walnicanojan tawet. 6Ha' ebnaj chioc ancianohal tu', c'ulojab isbeybal ebnaj haxinwal machi mac chalni tzet ye tu' yin̈ ebnaj. Machojab chissay ebnaj hunuxa ix, yeb xin ayojabico yuninal ebnaj yul isk'ab Comam Dios, machojab xin man̈comoj; hac tu' xin machi mac chibuchwa yin̈ yuninal ebnaj tu'. 7Yuto ebnaj chioc ijbalomal yin̈ yuninal Comam Dios c'ulojab isbeybal ebnaj, yuto yilomal ismunil Comam Dios ye ebnaj. Mach c'uluj ta han̈e ebnaj ay yoc yin̈ sunil tzet ye tu', yeb machojab ishowal iswi' ebnaj. Machojab chuc'paxo ebnaj te' uq'ue, yebpaxo istzan yin̈ yak'len howal, yebpaxo yik'ni ismelyu yin̈ tzet ye tu' mach c'uloj. 8Wal xin ebnaj chioc ancianohal, yilal yak'ni ebnaj bay chiway macta chiec' isc'atan̈. Ha'n̈ehojab isc'ulal choche ebnaj iswatx'e', toholojab isnabal ebnaj, yeb han̈ehojab istoholal chiswatx'e ebnaj. Han̈c'an̈ehojab yin̈ yet Comam Dios chaco isnabal ebnaj, yeb iscachni isnimanil ebnaj yin̈ tzet ye tu' mach c'uloj. 9Yilalojab yanico isnabal ebnaj yin̈ cuybanile caw yel chala, hune' ak'bil iscuyu'. Hac tu' xin chu yiptzen ebnaj anma yu cuybanile caw yeli, cat yay isc'ul macta ayco ishowal yin̈ Istzoti' Comam Dios yu ebnaj. 10Wal xin ay ebnaj mach chischah yabe' istoholal cuybanile, han̈e huntek'an tzoti' matzet chal yelapno chal ebnaj, cat yak'ni subchaho ebnaj anma, ha' ton ebnaj xin chalni ta yilal yak'lax circuncidar macta ayxaco yul isk'ab Comam. 11Yilal chicachlax ebnaj tu', yuto bajxan̈etu'wal ch'ec' ebnaj, cat yak'ni somchahoto ebnaj isnabal anma yu cuybanile maẍtaj ye chal ebnaj. Chute ebnaj haca' tu' yun̈e yik'ni ebnaj ismelyu. 12Ay hune' naj ay bey Creta tu', ay isnabal ayco xol yet con̈ob, yal naj haca' ti': “Ha' ebnaj wet con̈obti'an, lek'ti' ebnaj, lahan ebnaj haca' hunu no nok' caw how. Isa ebnaj yebpaxo xin caw pek' iswa'i,” ẍi naj. 13Yel chal naj yuxin yilal hacachni ebnaj tu' sic'lebil, haxinwal chiyaco ebnaj yin̈ yanma hune' cuybanile yel chala, 14yeb yun̈e mach chishajba istxiquin ebnaj yin̈ huntek'an ic'ti' chisnacan̈ ebnaj ah Israel, yeb xin yun̈e mach chisyijeto ebnaj tzet chal anma caw machi yelapno ye sunil isyelal yul sat. 15Wal han̈on̈ sajxa ye conabal ti', sunil tzet ye tu' c'ul yul cosat. Walpaxo mac maẍto chiyaco yanma yin̈ Comam Dios maẍto sajo ye isnabal, caw mach c'ulo sunil tzet ye tu' yul sat, yuto machiswalil tzet chiec' yin̈ isnabal ebnaj yeb yin̈ yanma ebnaj. 16Chal ebnaj tato yohta ebnaj Comam Dios, yaja' tzet chiswatx'e ebnaj chiyeniloj tato mach yohtajo ebnaj Comam. Ton̈etic'a chichiwa isc'ul ebnaj, mach chisyijepaxo ebnaj tzet chal Comam. Machi hunu tzet ye tu' c'ul chiswatx'e ebnaj.

will be added

X\