TITO 1

1Hayin Pablo hin ti'an, schejab' Comam Dios wean, b'oj yapóstol Comam Jesucristo. Xquin yacoj Comam yin̈ hune' munil ti'an yu hin colwa yin̈ mactaj sic'leb'ilxa yu Comam Dios yu ya'ni yuluj sc'ul yin̈ Comam Jesucristo. Choche Comam ta chin cuy heb'ya sic'leb'ilxa tu' yin̈ hune' cuywab'al st'in̈anil yeyi yin̈ tzet chu jehc'oj haca' chal sc'ul Comam Dios. 2Yin̈ hactu' ay scawxob'al co c'ul, co chanoj co k'inal mach stan̈b'al halteb'il yu Comam yettax x'ichitij satyib'an̈k'inal ti', Comam chij sb'a tzet chala. 3Tinan̈ xhul stz'ayical ya'lax ohtajn̈elaxoj stzoti', yuxin xa' Comam Dios Scolomal jet hin chejb'anil yin̈ hin pujb'anc'oj hune' stzoti' ti'an. 4Tito, ẍwatoj hune' wum ti' tawetan haxca haca'tic'a hin c'ahol hawe yin̈ tzoti' b'ay ẍja' yuluj co c'ul ti'. Ya'ab' Comam Dios Padre b'oj Comam Cristo Jesús Scolomal jet, sc'ulch'anil sc'ul b'oj ak'anc'ulal tawet. 5Cach wacan Cretaan yun̈e ha t'in̈b'ancoj hantajto mach xwatx'ican wuan. Ẍwochean ta chawacoj yancianoal hunun iglesia ay yul hunun con̈ob' haca' xu hin tak'en tawetan. 6Heb'ya' ch'oc ancianoal tu', c'ul sb'elwub'al heb'ya' chala: Mach tx'oj say heb'ya' yin̈, haxin̈wal mach mac ay tzet ẍhalni yin̈, machca hunujxa ix say heb'ya' yin̈. Yilal cha' yuninal yuluj sc'ul yin̈ Comam, c'ul yehc'oj b'oj yijyom chute sb'a heb'ya', haxin̈wal mach tx'oj ẍhal-laxoj yin̈ heb'ya'. 7Haxca ch'a'lax schejb'anil ya' yilni b'aytet yet Comam Dios, yuxin yet aya c'ul chu yehc'oj ya' yin̈ sat anma. Ta mat han̈c'aoj tzet chala ya' ha' schij sb'a, ta mat can̈oj stit showal, machca ch'uq'ui, matca a'omoj howal, machca sub'wal yin̈ sayo' melyu, haxca hunk'aan tu' mat c'uluj. 8Ha' yet ay yuni heb'ya' ch'oc ancianoal tu': Schani anma ch'ec' sc'atan̈, sc'ulaln̈e choche yub', st'in̈aniln̈e b'oj stoholal ẍwatx'e, caw yeli ab'ilxacoj sb'a yul sk'ab' Comam Dios, b'oj scach sb'a. 9Ha' stzoti' Comam x'a'lax scuyu', ha' ch'ec' heb'ya' yi'a', haxin̈wal chu yiptzen heb'ya' anma yin̈ cuywab'al c'ul, b'oj yun̈e scachni heb'ya' anma ẍpaq'uicoj yin̈ stzoti' Comam. 10Haxca caw ay heb'naj paq'uinajxacoj yin̈ cuywab'al st'in̈anil yeyi, ec'b'al heb'naj ch'ochen scawxecoj circuncisión xol anma. Sub'cha anma yu hej tzoti' mach yelapnoj ye chal heb'naj. 11Hunk'aan heb'naj tu' yilal scachlax sti' heb'naj, haxca ton̈e chetatoj heb'naj anma, tx'ihal n̈ahil anma sucb'itoj swi' yu cuywab'al mataj ye chal heb'naj. Yun̈e yi'ni heb'naj smelyu, yuxin hactu' scuywa heb'naj. 12Ay hune' naj ah Creta caw ohtajb'il b'etu', stz'ib'n̈en naj tzet ye hune' con̈ob' tu', chalni naj: Anma ah Creta ti' caw lek'ti', haca' no' howla nok', tzet swa'i, b'oj caw isa. 13Yel chal naj, yuxin tinan̈ yet aya cam cha may heb'ya' yun̈e slin̈b'an sb'a heb'ya' yin̈ cuywab'al b'ay ẍja' yuluj co c'ul ti', 14b'oj machab'etoj heb'ya' hej ic'ti' chichecan̈ heb'naj israel, b'oj hej comon chejb'anil chal heb'naj xax yiloj sb'a yin̈ st'in̈anil. 15Jet hayon̈ c'ul co nab'al ti', sunil tzetet c'ul jet. Yaja' matzet c'ul yul sat anma tx'oj yecoj snab'al b'oj macha' yuluj sc'ul yin̈ Comam Dios. Yuxin, mat c'uluj tzetet yalni heb'naj, haxca quistal ye yul swi' heb'naj, b'oj mat c'uluj yanma heb'naj. 16Chal heb'naj ta yohtaj heb'naj Comam Dios, yaja' hej tzetet tx'oj chu heb'naj, ha' ẍyeniloj ta mat yohtajoj heb'naj Comam. Quistal ye yul swi' heb'naj, macha' heb'naj swi' tet stzoti' Comam, mach hunuj tzetet c'ul chu yuni heb'naj


Copyright
Learn More

will be added

X\