ROMANOS 9

1Haxca ayinxacoj yin̈ Comam Cristoan, yuxin ha' tzet ẍwala' teyet ti'an caw yeli, mat lek'ti'aloj. B'oj hunxa, iptzeb'il wanma yu Comam Espíritu Santoan, chalni wetan ta yel ẍwalan. 2Ay hune' hin b'isc'ulalan, hune' tu', ya'n̈etic'a yecoj yin̈ wanma yu wetcon̈ob' israelan. 3Haxca ch'ec' yin̈ hin c'ulan, waxan̈ca stz'acti' Comam Dios chin pohniloj yin̈ Comam Cristoan, ta ha' hune' tu' ẍcolwa yin̈ wetcon̈ob' tu'an, sunil hin c'ulan chin chani paxan. 4Haxca wetcon̈ob' israelan xax scha Comam Dios yuninaloj, x'ehcoj Comam xol heb'jetb'i, st'in̈b'a Comam yet b'oj, xa'ni Comam sley tet, syeni Comam tzet chu shak'elaxi, b'oj tx'ihal tzet xaltecan Comam tet. 5Heb'ya' jichmam sic'leb'ilcan yu Comam Dios ay yic'al ye heb'jetb'i, yic'al heb'ya' jichmam tu' ye pax Comam Cristo yin̈ snimanil, yaja' Dios pax Comam, ha' Yahaw yin̈ sunil hej tzetet, yuxin ja'a'coj smay Comam yin̈ stohb'alk'inal. Amén. 6Mat suniloj anma israel ẍcolchaoj. Yaja' mataj yu tu' mach chij sb'a tzet halteb'ilcan yu Comam Dios yin̈, to haxca mat suniloj hej yic'al Israel, yeli israel yul sat Comam. 7Matoj yun̈e yic'al ya' Abraham ye hunk'aanxa sc'ahol tu', mat yun̈eoj yuninal ya' ye sunil yul sat Comam Dios. Machoj, haxca xal Comam tet ya': Yin̈n̈e ha c'ahol Isaac ch'elojtoj hawic'al sic'leb'il wuan. 8- 9Ixtan̈ yeyi ta ẍpitzc'a naj Isaac tu' yun̈e scan̈il ye Comam haca' tzet halteb'il yu Comam tet ya' Abraham yet xalni Comam: Yet chin huluj hunab' yab' hacti'an, ayxa hune' ni'an swinaj unin ya' hawixal Sara ti', ẍi Comam. Ha' chaliloj hune' tu', mat suniloj sc'ahol ya' Abraham yuninal Comam Dios yeyi. To han̈c'a mac ẍpitzc'a haca' tzet halteb'il yu Comam, han̈c'a chal Comam yuninaloj. 10Hacpaxtu' yet xmohyi ya' Isaac tu' b'oj ya' Rebeca xpitzc'a nixtej stioẍ unin heb' ya'. Ha' ya' jichmam Isaac tu', ha' smam heb'naj nixtej cawan̈ tu'. 11- 13Waxan̈ca hactu' yeyi, yaja' yalan̈to maẍto chul niẍtej stioẍ unin ya' tu', maẍto ninoj tzet c'ul ni tx'oj chu, xalni Comam Dios tet ya' Rebeca tu': Naj b'ab'el, ch'ocoj naj schejab'oj naj scab', ẍi Comam. Hune' ti' ch'elicoj haca' yalni Yum Comam: Ha' naj Jacob xin sic'leiltojan, xin pahnitoj naj Esaúan, Hactu' xu scan yin̈ hab'an ta chu sic'len Comam Dios mac chal sc'ul ch'oc yuninaloj, mataj yu hunuj tzet c'ul chu hunuj maca, yuxin chacoj Comam yuninaloj. 14Ta hactu', ¿chim hu jalni ta mat toholoj yanma Comam Dios? Machoj. 15Haxca yalnaj Comam tet ya' Moisés: Stz'a' hin c'ul yin̈ mac chal hin c'ulan, ẍwa' sc'ulch'anil hin c'ul tet mac chal hin c'ulan, . 16Waxan̈ca ẍco col co b'a jalni, waxan̈ca caw ẍjitij janma jin̈, yaja' mat yuuj tu' chon̈ colchayi, to haxca stz'a' sc'ul Comam jin̈. 17Haxca chal Comam Dios tet naj sreyal Egipto: Xcach wacoj reyal yul hune' con̈ob' ti'an, yun̈e syeniloj sb'a scan̈il we tawin̈an. Yu tzet chach wute'an, sunil anma ay satyib'an̈k'inal ch'ab'enoj ta caw ay hin mayan. 18Yuxin johtaj ta stz'a' sc'ul Comam yin̈ mac b'ay choche ya'a' sc'ulal, cat ya'ni Comam cawb'oj yanma mac chal sc'ul. 19Yaja' aymi mac ẍalni yin̈ hacti': Ta mach mac chu sman̈c'on b'aytet ib'il yu sc'ul Comam, ¿tzet yuxin ch'ah yaw Comam jin̈? ẍi mi. 20Yaja' ¿mactaxca chu yab'xal sc'ul yin̈ Comam Dios? ¿tox chu yalni hunuj tx'otx' xih tet mac ẍwatx'eni: ¿Tzet yuxin hacti' chu hin ha watx'enan? ¿tox ẍi tx'otx'? 21K'inaloj hune' naj tz'ajom munlab'al ta chal sc'ul naj, chu swatx'e naj hunuj xih caw eltich'an b'oj hunujxa xih caw comon, yaja' hune'n̈etic'a tx'otx'al ch'ocnicoj yu naj. 22Hactu' ye Comam Dios b'oj anma. Waxan̈ca choche Comam syeb' ta ẍtit showal yin̈ mule, choche pax Comam syeb' scan̈il yeyi, yaja' chijleaytoj Comam xtx'ojal anma yet ay ya'lax tz'a'oj sat, hunk'aan t'in̈anxa ye sc'aylaxiloj. 23Hactu' xute Comam yun̈e syeni sc'ulal sc'ul jet hayon̈ b'ay stz'a' sc'ul ti', hayon̈ ti' yalan̈to tu', xcon̈ st'in̈b'ancanoj yun̈e ay joc yin̈ sc'ulal, 24hayon̈ awteb'ilon̈ yu Comam ti', wal yic'al israelon̈ mato machoj. 25Haca' yalni Comam yul Yum tz'ib'n̈eb'il yu ya' schejab'lom Oseas: Mac maẍtic'a hin con̈ob'ojan, ẍwala' hin con̈ob'ojan. Mac maẍtic'a ocheb'iloj wuan, ẍwala'an ta ocheb'ilxa wuan. 26Hatic'a b'ay xal Comam Dios: Hexti' matex hin con̈ob'ojan, Hatic'a b'etu' chala' Comam: Hexti' hex wuninalxaan, hayin Dios itzitz hin ti'an. 27Xal pax ya' Isaías schejab'lom Comam Dios yin̈ heb'jetb'i wetcon̈ob'an: Waxan̈ca haca'xan̈e yecantoj arena sti' ha' mar, hactu' sb'isil anma israel, yaja' haywan̈xan̈e heb'jetb'i ẍcolchaoj, 28haxca toxa chi'a'tij Comam Jahaw cuenta yin̈ anma satyib'an̈k'inal ti', tz'ajan chi'a'tij Comam cuenta yin̈. 29Ay hune'xa b'ay stz'ib'n̈enajcan ya' Isaías tu' yalan̈to, chalni: Ta mach syan̈ecan Comam Jahaw hanic'ojxa jic'al, lahan mi ẍja'le haca' xa'le anma ah Sodoma b'oj anma ah Gomorra. 30Ha' ch'elicoj hune' tzet ẍwal ti'an, to anma mat israeloj, waxan̈ca machcoj yin̈ sc'ul tzet chu scan c'ulal yul sat Comam Dios, yaja' stzujchaapnoj scan c'ulal yul sat Comam yu ya'ni yuluj sc'ul yin̈ Comam. 31Yaja' anma israel, aycoj yin̈ sc'ul syijyen ley yu scan c'ulal yul sat Comam Dios yalni, yaja' mach stzujchaapnoj yu. 32¿Tzet yuxin hactu' xa'le heb'jetb'i? Haxca mach xa' yilal heb'jetb'i ya'ni yuluj sc'ul yin̈ Comam Jesucristo, to ham yalni heb'jetb'i ta yu syijyen hej tzetet chal sley ya' Moisés ẍcan c'ulal yul sat Comam Dios. Yuxin haca' hunuj ch'en ch'en b'ay chon̈ txak'moyi hactu' ye Comam Jesucristo tet heb'jetb'i. 33Hactu' yalni Yum Comam Dios: Yul con̈ob' Sión, ẍwa'a'coj xol anma israel hune' mac haca' ch'en ch'en b'ay xtxak'moyi cat yayc'ayi, wal mac cha'a' yuluj sc'ul yin̈ hune' mac tu', mach ẍcanoj yin̈ hacn̈e ti', to ẍchab' b'aytet xalte Comam.


Copyright
Learn More

will be added

X\