ROMANOS 8

1Yuxin hayon̈ hunxa je b'oj Comam Cristo Jesús matxacoj sya'tajil mule jin̈. 2Ha' Yespíritu Comam Dios ch'a'ni k'inal mach stan̈b'al jet, haxca hunxa je b'oj Comam Cristo Jesús. Yu Comam Espíritu, yuxin chon̈ colcha yul sk'ab' mule b'oj tet camical. 3Haxca yu ec'najil aycoj jin̈ machu co yijyen sley ya' Moisés, yuxin hune' ley tu' mach hunuj b'ay xu hon̈ scolni yul sk'ab' mule. Yaja' wal Comam Dios xcon̈ scol Comam. Xatij Comam Sc'ahol yin̈ hune' nimanile haca' jet b'ay aycoj jec'najil ti'. Ha' Comam Jesús xhul camoj yu hej co mul. Yet xcami sunil sya'tajil mule xtan̈coj yin̈ snimanil. 4Hactu' xute Comam yun̈e tz'ajan chu co yijyen st'in̈anil haca' yalni ley tu', haxca matxa ẍco yijye haca' choche jec'najil, to haca' choche Comam Espíritu. 5- 6Haxca mac ẍto syijyen haca' chal yec'najil, t'in̈an yeyi ta yin̈ hune' tu' aycoj yanma, yuxin ẍto yin̈ camical mach stan̈b'al. Wal hayon̈ ẍco yijye haca' chal Comam Espíritu, yin̈n̈e aycoj janma chaltu', ẍco chab' k'inal mach stan̈b'al b'oj ak'anc'ulalxa ẍjucan b'oj Comam Dios. 7Mac han̈c'a ec'najil choche, ẍcajwa yin̈ Comam Dios; mach syijye sley Comam, machca ẍc'oji syijyeni. 8Yuxin mac han̈c'a yec'najil syijye, mach stzala Comam Dios yin̈. 9Haxca aycoj Yespíritu Comam jin̈, yuxin matxa chon̈ ehc'oj haca' chal jec'najil, to chon̈ ehc'oj haca' chal Comam Espíritu. Mac machcoj Yespíritu Comam Cristo yin̈, mat yetoj Comam. 10Wal ta aycoj Comam Cristo jin̈, waxan̈ca camb'eal ye co nimanil yu mule, wal janma ay sk'inal mach stan̈b'al haxca, xax con̈ can c'ulal yul sat Comam Dios. 11Yuxin ta aycoj Yespíritu Comam Dios jin̈, Comam xpitzc'ancan̈ Comam Jesucristo xol hej camom, hatic'a Comam ẍpitzc'anojcan̈ co nimanil camb'eal ye ti' yu Yespíritu aycoj jin̈. 12Yuxin, hex wuẍtaj, hex wanab', ha' yet ay juni, ha' jehc'oj haca' chal Comam Espíritu, mat haca'oj chal jec'najil. 13Ta ẍto hon̈ ehc'oj haca' chal jec'najil, t'in̈an co camoj yin̈ huneln̈e, yaja' ta yu yip Comam Espíritu ẍco b'ejcan juni hej tzetet tx'oj chal jec'najil, chon̈ ehojc'oj stohb'alk'inal. 14Mactaj ch'ehc'oj haca' chal Yespíritu Comam Dios, ha' caw yeli yuninal Comam. 15Haxca Comam Espíritu xa' Comam Dios jet, machon̈ yacoj chejab'oj, cat co xiw tet Comam haca' yet yalan̈to. Machoj, to ha' yet Comam chon̈ yacoj yuninaloj yu Yespíritu, yuxin sunil co c'ul ẍjalni Mam tet Comam Dios. 16Yohtaj janma ta caw yeli hon̈ yuninal Comam Dios, hatic'a Yespíritu Comam ẍhalni jet ta hactu' jeyi. 17Haxca hon̈ yuninalxa Comam, yuxin ẍco chab' tzetet c'ul c'uan yu Comam. Hune' tu' hun chu co chanoj b'oj Comam Cristo. Ta yeli ẍjil sya'tajil b'oj Comam, hun ẍco chab' sc'ulch'anil b'oj. 18Yin̈ caw yeli, hantaj hej sya'tajil lan̈an jilni tinan̈, mat ninoj lahanoj b'oj sc'ulch'anil cha'a' Comam jila' yet ẍtoj co sataj ti'. 19Sunil hej tzetet watx'eb'il yu Comam Dios ti' echmab'il yu b'ak'in̈ cha'a' Comam ohtajn̈elaxoj to yuninal Comam jeyi. 20Haxca sunil hej tzetet watx'eb'il yu Comam xcan yin̈ quewail. Yaja' matoj yultic'a sc'ul, to hatic'a Comam xchani canoj yin̈ quewail. Yaja' ayto scawxob'al sc'ul 21to ẍto scolchaoj hunk'aan tu' tet squewail, matxa ch'etaxojtoj. To stzujchaojapnoj hune' yeltich'anil co colb'anil hayon̈ hon̈ yuninalxa Comam Dios ti' yu. 22Johtaj ta yettax caw payxa xcan tzetet watx'eb'il yu Comam Dios ti' yin̈ sya'tajil, haca' hune' ix ix lan̈an swatx'i sc'ul. 23Matn̈etaj hunk'aan tu' lan̈an yab'en sya'il, to hayon̈ hun lan̈an jab'enpaxoj. Waltu' yeli, ab'ilxa Comam Espíritu jet haca' yichob'anil hej tzetet ẍto co chab'. Waxan̈ca hactu', ayto tzet ẍco na sya'il, masanto ch'apnoj stz'ayical b'ay ch'ohtajn̈elaxoj to hon̈ yuninalxa Comam Dios, hato tu' caw ẍcolchaojcan co nimanil ti'. 24Yettax xco chani co colb'anil, ichi scawxi co c'ul ta chon̈ colchaojcan yin̈ sunil. K'inaloj ta xax co cha hune' tu', ¿tzetto ch'oc ẍjechma yuli? haxca b'aytet xa jilicoj yin̈, mach ẍjala ta ẍto jechma. 25Wal b'aytet ẍjechmac'oj mach ẍjil yu sb'ak' co sat. Yuxin niman co c'ul jechmani. 26B'oj hunxa, ẍcolwa Yespíritu Comam jin̈ yin̈ hej tzetet machon̈ c'oji co txumni, haxca mach ẍnacha ju tzet ẍco k'ana yet ẍja'ni joración tet Comam haca' yet ay co k'anni. Yuxin ha' Yespíritu Comam ẍk'anni ju yin̈ co tz'ab'alc'uleal mach stzoteb'anil. 27Haxca yohtaj Comam tzet ib'il yu co c'ul hununon̈, yuxin xtxum Comam tzet chal Espíritu, haxca haca' chal sc'ul Comam, hactu' sk'anni Espíritu jin̈ hayon̈ hon̈ yet-xa ti'. 28Johtaj ta sunil hej tzetet ẍmunla yu Comam Dios yu sc'ulaloj jet hayon̈ ẍjoche Comam, hayon̈ awteb'ilon̈ yu, yun̈e c'ul chon̈ elcoj haca' ch'el yin̈ sc'ul. 29Yohtajxatic'a Comam mactaj yet yettax caw payxa, hatax tu' xcon̈ sic'leni yun̈e haca' Sc'ahol chon̈ elcoj. Hactu' xcon̈ yute Comam, yun̈e ha' Sc'ahol tu' ha' ch'oc b'ab'el uninaleal co xol hayon̈ on̈ yuninalxa Comam Dios ti'. 30Hayon̈ sic'leb'ilon̈ yu Comam ti' awteb'ilon̈ pax yu. Hayon̈ awteb'ilon̈ ti', xal Comam ta c'ulon̈ yul sat, xa'ni pax sc'ulch'anil jet. 31Yin̈ hunk'aan ẍwal ti'an, matxa tzet sje jalni. Ta aycoj Comam jin̈, ¿tox ayto mac chu hon̈ yetantoj? 32Mach xechemn̈e sb'a Comam Dios yanicoj Sc'ahol yul sk'ab' camical ju co hunil, hatoc'anab' hej tzetet c'ul macha'a' Comam jet b'oj Sc'ahol tu' xin. 33Hayon̈ sic'leb'ilon̈xa yu Comam ti', ¿tox ayto hunuj mac chu ya'wic'ule jin̈ tet? Xax yal Comam ta c'ulon̈xa yul sat. 34Tox ay mac chu scawxencoj hunuj co mul jib'an̈. ¡Machoj! Haxca xcam Comam Cristo Jesús ju, xpitzc'acan̈, ayxacoj yin̈ swatx' Comam Dios, lan̈an stzotel jin̈ tet Comam. 35Matzet ẍcachni hon̈ yochen Comam Cristo. Ocheb'ilon̈ yu Comam, waxan̈ca ay sya'tajil ẍjila, tacb'alc'ule, mato hej mac chon̈ cajni, mato wahil, mato man̈ xilk'apeal, mato huchan, mato camical. 36Haca' yalni Yum Comam Dios: Hunun tz'ayic ayon̈coj yul sk'ab' camical ha ya'ilojan. Haca' ch'uteot no' canelu stohxa camoj, hactu' chon̈ utelaxan. 37Waxan̈ca chul hunk'aan ti' jib'an̈, ẍtic'a huhuj ju yu hune' mac xcon̈ ocheni. 38Yuxin caw wohtajan, waxan̈ca ay tzet ẍja'le', ocheb'ilon̈ yu Comam Dios. Yuxin ni camical, ni k'inal, ni hej ángel, ni yespíritu naj matzwalil ay schejb'anil b'oj scan̈il yeyi, ni tzetet ay tinan̈, mato tzet ẍto huluj, 39ni tzetet ay satcan̈, ni tzet ay sat tx'otx' ti', ni hunujxa tzet watx'eb'il yu Comam, machu hon̈ spohniloj yin̈, haxca ocheb'ilon̈n̈etic'a yu Comam haxca ayon̈xacoj yin̈ Jahaw Cristo Jesús.


Copyright
Learn More

will be added

X\