ROMANOS 8

1Wal tinan̈ xin hunxa je yeb Comam Jesucristo, yuxin matxa isya'tajil chayo Comam Dios jiban̈ yin̈ islahobal tz'ayic yuto matxa chicowatx'e tzet choche conimanil, to ha' tzet choche Comam Espíritu Santo. 2Ha' Comam Espíritu Santo tu' chiak'ni cok'inal mach istan̈bal yuto hunxa je yeb Comam Jesucristo. Yu yip Comam Espíritu yuxin colbilon̈xa yul isk'ab mule yeb tet camical. 3Yu mule ayco yin̈ conimanil machi yu coyijen isley naj Moisés, yuxin mach k'oji ley tu' con̈iscolni yalan̈ mule. Yaja' wal Comam Dios yati Comam Isc'ahol yul sat yiban̈k'inal ti', ha' xin isnimanil Comam Jesús lahan haca' hune' conimanil yet yul sat yiban̈k'inal ti'. Iscam Comam yin̈ comul, hac tu' xin yu yak'nicano tan̈o Comam comul yin̈ isnimanil. 4Iswatx'e Comam haca' tu' yun̈e cowatx'en istoholal haca' yalni ley. Yuto matxataj tzet chal hune' conimanil yet yul sat yiban̈k'inal ti' chicowatx'e, to haxa tzet choche Comam Espíritu Santo, ha'xa chicowatx'e. 5Yuto ha' mac chibeybaln̈en yin̈ tzet choche isnimanil, han̈ech'an yin̈ tu' bay chiyaco isnabal. Wal mac chibeybaln̈en yin̈ tzet choche Comam Espíritu Santo, ha' yin̈ tzet choche Comam tu' bay ayco isnabal. 6Wal xin ta han̈e tzet choche conimanil ayco yin̈ conabal cowatx'eni, hune' tu' chon̈yito yin̈ camical mach istan̈bal, wal ta ha' tzet choche Comam Espíritu Santo ayco yin̈ conabal cowatx'eni, chicochah cok'inal mach istan̈bal, cat con̈yanico yin̈ ak'anc'ulal yeb Comam Dios. 7Mac han̈c'an̈e tzet choche isnimanil ayco yin̈ yanma iswatx'eni, caw ayco ishowal yin̈ Comam Dios, yuto mach chisje isc'ul isyije ischejbanil Comam, yeb xin mach chik'oji isyijeni. 8Yuxin ha' mac han̈e tzet choche isnimanil chisbeybaln̈e, mach chu iswatx'en tzet choche Comam Dios. 9Yaja' wal hex ti', matxa chebeybaln̈e haca' tzet choche henimanil, to haxa hune' ac' nabale chak' Comam Espíritu Santo teyet ha' chebeybaln̈e. Tato ay mac mach ayayto Comam Espíritu Santo yul yanma mach yeto Comam Jesucristo yehi. 10Ta ayxayto Comam Cristo yul heyanma, waxan̈ca cambehal ye henimanil yu mule, wal heyanma xin ay isk'inal mach istan̈bal, yuto xaquexcan c'ulal yul sat Comam. 11Tato ayco Yespíritu Comam Dios teyin̈, Comam pitzc'ancan̈ Comam Jesucristo xol camom, ha' Comam chiak'ni hune' ac' nimanile tet henimanil cambehal yehi yu Yespíritu ayco teyin̈. 12Wal tinan̈ xin hex wuẍtaj hex wanab, yilal cobeybaln̈en tzet choche Comam Espíritu, machojabtaj istx'ojal tzet chal conimanil. 13Yuto ta ha' tzet choche henimanil ha' chewatx'e, chexcam yul sat Comam Dios, yaja' tato yu yip Comam Espíritu Santo chebej hewatx'en tzettaj choche henimanil, ay hek'inal mach istan̈bal. 14Sunil mac ha' Comam Espíritu Santo chiijbani, ha' huntek'an mac tu' yuninal Comam Dios yehi. 15Yuto Comam Espíritu Santo chabilxa ju mach chon̈yaco yalan̈ ischejbanil ley hunelxa cat coxiwpaxoj haca' yet yalan̈tocanoj. Wal xin ha' Comam Espíritu tu' chon̈anico yuninalo Comam Dios, yuxin yin̈ sunil janma chijal tet Comam Dios haca' ti': “Hach Inmaman,” con̈chi. 16Ha'tic'a Comam Espíritu Santo chalni tet janma tato yuninalxa Comam Dios jehi. 17Yu yuninalon̈xa Comam Dios yuxin chicochah comajul tet Comam. Hune' comajul tu' hun chu cochahni yeb Comam Jesucristo tato ha' hunon̈ chijak'le isya'tajil yinta Comam; ta hac tu' hun chu cochahni isc'ulal yeb Comam. 18Yin̈ caw yeli sunil isya'tajil lan̈an jilni tinan̈ caw matzet chaliloj yuto mach chu colahban yeb isc'ulch'anil chak' Comam jet yin̈ hune' tiempohal chul cosataj. 19Sunil tzet watx'ebil yu Comam Dios mach chitecha yu yilni bak'in chak' Comam Dios ohtan̈elaxoj tato yuninalxa Comam Dios jehi. 20Yuto sunil tzet watx'ebil yu Comam Dios etaxcantoj, yaja' maẍtaj yu hac tu' yoche, wal xin ha' Comam Dios chahni etaxotoj. Yaja' ayco yipo janma, 21ta chicolcha tzet watx'ebil yu Comam yalan̈ yip isya'tajil bay aycoj, haca' chu cocolcha han̈on̈ yuninalon̈xa Comam Dios ti', cat cochahni isc'ulch'anil isc'ul Comam. 22Johtaj tato sunil tzet watx'ebil yu Comam Dios ayco yin̈ isya'tajil. Caw xin chiel yaw haca' hunu ix ix chiaben isya'il yet chiwatx'i isc'ul, hac tu' ye sunil tzet iswatx'e Comam tu' tinan̈. 23Maẍn̈etaj huntek'an tu' lan̈an yaben isya'tajil, walxinto ha' hunon̈ han̈on̈ chabilxa Comam Espíritu Santo ju lan̈an jabenpaxoj isya'tajil. Ak'bilxa Comam Espíritu Santo jet haca' babel sabehal xol sunil tzet ch'ak'lax jet, yaj waxan̈ca hac tu' ayto isya'tajil chijak'le masanto yet chiapni istiempohal bay chon̈ohtan̈elaxi tato con̈yuninalxa Comam Dios. Ha' to tu' xin chicolcha hune' conimanil ti' tet mule. 24Yettax cochahni cocolbanil yichico iscawxi coc'ul ta chon̈collax yin̈ sunil. K'inalo tato xacochah tzet ayco yipo janma tu', ¿tom chito jechma yuli? ¡Machoj! Yuto baytet chijilico yin̈ matxa chijechma. 25Wal xin caw niman chijute coc'ul jechman tzet ayco yipo janma tu', yuto maẍto chijilico yin̈. 26Ha'tic'apaxo xin Comam Espíritu Santo chicolwa jin̈ yin̈ tzet mach chon̈k'oji cotxumni, yuto yet chon̈txahli mach johtajo yin̈ tzet chu cok'anni haca' chal isc'ul Comam Dios, yaja' xin Comam Espíritu chitzotel jin̈ tet Comam Dios. Ha' huntek'an tzoti' chal Comam Espíritu tu', machi tzoti' ti' chihalni jet tzet yoqui. 27Yaj wal Comam Dios yohtan̈e tzet chiec' yin̈ conabal, chistxum Comam tzet chal Comam Espíritu tu', yuto ha' tzet choche isc'ul Comam ha' chisk'an Comam Espíritu yin̈ istxah jin̈ han̈on̈ yeton̈xa Comam ti'. 28Johtaj tato sunil tzet ye tu' chihul jiban̈ han̈on̈ chijoche Comam Dios, to yu isc'ulal jin̈ yuxin chul jiban̈ han̈on̈ awtebilon̈xa yu Comam yun̈e yijni isba tzet choche Comam jin̈. 29Yuto yohtaxa Comam macta yet Comam yettaxtic'a payat, hatax tu' con̈issic'lencano Comam joc yuninaloj, yun̈e haca' Isc'ahol Comam chon̈elcanicoj. Hac tu' yute Comam yun̈e ha' Isc'ahol Comam tu' ha' chioc babel C'ahole xol tx'i'al mac yuninal Comam Dios. 30Han̈on̈ con̈issayilo Comam yet payat tu', han̈on̈ con̈yawtepaxo Comam. Han̈on̈ awtebilon̈ yu Comam tu' con̈cancano c'ulal sata Comam Dios, yak'nipaxo Comam isc'ulch'anil jet. 31¿Tzet xin chijute jalni yin̈ huntek'an ti'? Tato ayco Comam Dios jetbihoj, ¿mactaxca chu isk'oji jin̈? 32Mach isman̈c'o Comam yak'ni Isc'ahol yul isk'ab camical jin̈ cosunil, ¿hatoc'anab xin isc'ulal mach chak' Comam jet yinta Isc'ahol tu'? Wal xin chak' Comam. 33Han̈on̈ saybilon̈xa yu Comam ti'. ¿Tom ayto hunu mac chu yoc ak'oc'ule jin̈ tet Comam Dios xin? Machi hunu maca yuto xacon̈can c'ulal yul sat Comam Dios. 34¿Mactaxca chu iscawxenico hunu comul jiban̈? Machi maca, yuto cam Comam Jesús yu comul, yitzitzbipaxocan̈ Comam. Tinan̈ xin ayco Comam yin̈ iswatx'k'ab Comam Dios, lan̈an istzotel jin̈ tet Comam. 35Caw xahan ayon̈ yu Comam Cristo, ¿mac xin chu con̈ispohnilo yin̈ isc'ulch'anil isc'ul Comam tu'? ¿Chimyu con̈ispohnilo isya'tajil, maca bisc'ulal, maca yu chon̈cajlax yu Istzoti' Comam, maca yu wahil, maca yu man̈xilk'apehal, maca hunu il, maca yu camical? 36Haca' yalni Istzoti' Comam Dios bay tz'ibn̈ebilcanoj: Hawu yuxin ayon̈n̈etic'acojan̈ yul isk'ab camical hunun tz'ayic. Haca' chiutelax no' me' chiilaxto camoj, hac tu' chon̈utelaxan̈, ẍiayoj. 37Yaja' waxan̈ca chihul huntek'an isya'tajil tu' jiban̈, chon̈k'oji yin̈ yu iscolwal Comam xahan chon̈ilni. 38Yuxin caw wohtajan tato machi hunu ti' chu con̈ispohnilo yin̈ isc'ulch'anil isc'ul Comam Dios; mach yuho camical, mach yuho k'inale, mach yuho ebnaj ángel, mach yuho huntek'an espíritu matzwalil ay yip chieq'ui, mach yuho tzet chijilico yin̈, mach yuho tzet maẍto chihuli. 39Mach yuho tzet ay yul satcan̈, mach yuho tzet ay sat yiban̈k'inal ti'. Machi hunu tzet watx'ebil yu Comam Dios chu con̈ispohnilo yin̈ isc'ulch'anil isc'ul Comam, yuto ayon̈xaco yul isk'ab Comam Jesucristo Jahawil.

will be added

X\