ROMANOS 7

1Hex wuẍtaj hex wanab', hex che txum ley, heyohtaj to ay schejb'anil ley jib'an̈ yin̈n̈e itzitzalto jeyi. 2Iwejiloj heyet yin̈ hunuj ix mohyinaj: Yulb'al itzitz yichamil ix, huninajcoj ix yin̈ naj yu ley. Ta ẍcam naj, matxa yoc naj yin̈ ix. 3Yuxin ta itzitzto yichamil ix, cat sto ix yin̈ hunujxa naj, chacoj ix smul yin̈ smohilal. Ta ẍcam naj, waxan̈ca ẍmohyi ix b'oj hunujxa naj, matxa xan̈b'a ix sleyal smohilal tu'. 4Hex wuẍtaj hex wanab', tinan̈ hunxa je yin̈ snimanil Comam Cristo. Haxca xcam Comam, yuxin camnajon̈xa tet sley ya' Moisés. Tinan̈ haca' ichamile ye Comam jet, Comam xpitzc'aotcan̈ xol hej camom. Hactu' je b'oj, yun̈e jocnicoj yin̈ c'ul tet Comam Dios. 5Yet xcon̈ ehc'oj yin̈ haca' tzet chal jec'najil yet yalan̈to, ha' sley ya' Moisés x'a'ni yoche'can̈ janma tzetet tx'oj, ha' x'iptzen co nimanil juni hej tx'ojal xcon̈ yinitoj yin̈ camical. 6Yet yalan̈to ayon̈coj yalan̈ ley, wal tinan̈ matxaon̈coj yul sk'ab', haxca camnajon̈xa tet. Yuxin chu co yijyen Comam Dios yu ac' k'inale ib'ilxa ju yu Yespíritu Comam, matxa yuuj ley tz'ib'n̈eb'ilcan yet payxa. 7Yaja', ¿tzet ẍjute jalni? ¿tom mule sley ya' Moisés? ¡Machoj! ¡mat muleoj! Haxca ta mach ley, mach xwohtajn̈ean tzetet mule. Mach mi xwohtajn̈epaxan ta tx'oj jochentoj tzet ay jetb'i ta mach hune' ley ẍhalni: Macha wochetoj tzet ay hawet-anmail. 8Yuxin yu hunk'aan mandamiento tu', hat xpitz'c'atij yin̈ wanma wuni sunil hej tx'ojalan. Haxca ta mach ley machmi hun nanoj ju ta ẍjacoj co mul. 9Yet maẍto wohtajoj leyan, itzitz hin yul sat Comam Dios walnian. Yaja' yet xwohtajn̈en leyan, xin txumnilojan ta ay hin tx'ojal yul sat Comaman, hactu' xu wohtajn̈enan ta camnajin yul sat Comam yu hin tx'ojalan. 10Ha' ley tu' x'a'lax jet yu ya'ni co k'inal, ha' x'initij camical wib'an̈an. 11Hatic'a ley x'ocnicoj yu mule, ha' xquin sub'nian, xquin ya'ni pax camojan. 12Yuxin chin napaxtijan ta sley ya' Moisés, yet Comam Dios yeyi, yet pax Comam ye hej mandamiento, caw tohol b'oj caw c'ul. 13¿Tzet ẍjute jalni tinan̈? ¿tom ha' hune' ley c'ul x'initij camical wib'an̈an? Machoj, to ton̈e xk'anot ley yu mule yu yinitij camical wib'an̈an, hactu' xu syeniloj sb'a ta tx'oj mule. Yuxin hune' ley tu' c'ul, ha' ẍyeniloj ta caw mach swalil mule. 14Johtaj chub'il ha' ley ay yoc yin̈ jespíritu, yaja' ijb'ab'ilinto yu hin nimanilan, haca' to txon̈b'ilin schejab'oj mulean. 15Caw machin txuman tzet ẍwa'le'an, ha' c'ul ẍwoche wub' walnian, mataj ẍwuan, to ha' tx'oj mach scha hin wi'an, ha' ẍwuan. 16Yuxin ta tx'oj ẍwab'e wuni hunk'aan tu'an, ha' ch'a'ni hin txumu'an ta yin̈ st'in̈anil aycoj ley. 17Yuxin mat hayinoj caw ẍwu hunk'aan tu'an, to ha' mule aycoj win̈an, ha' ch'uni. 18Wohtajan ta mach ninoj hin c'ulalan, haxca ẍwoche wub' hej tzetet c'ul walnian, yaja' machin c'ojian. 19Mach ẍwu tzetet c'ul haca' chal hin c'ulan, to ha' tzetet tx'oj machal hin c'ul wub'an, ha' ẍwuan. 20Yaja' ta ẍwu hej tzetet mach chal hin c'ulan, ha' xalni to mat hayinoj ẍwu hune' tu'an, to ha' mule aycoj win̈an, ha' schejni wub'an. 21Yuxin chin txumilojan ta yet ẍwuni hunuj tzet c'ul walnian, machin c'oji wunian, to han̈c'a tx'ojal chatij sb'a yin̈ hin satan. 22Yet chin t'an̈xicoj yin̈ sley Comam Diosan caw stzalacan̈ wanmaan. 23Yaja' ay hune'xa tzet ch'iplacoj yin̈ hin nimanil ti'an, ha' mule aycoj win̈an. Ha' hune' tu' ẍcachni hin yijyen hune' ley b'ay chin tzalacojan, yuxin haca' yahaw yecoj yin̈ hin nimanil ti'an. 24Yuxin c'antajinan, hune' hin nimanil ti' chin initoj yin̈ camical mach stan̈b'alan. ¿Mac chin colniloj yul sk'ab' hune' hin nimanil ti'an? 25Han̈c'a Comam Dios chu hin scolniloj yu Jahaw Jesucristoan. Yuxin tinan̈ ẍwa' yuch'antioẍ tet Comam Diosan. Chin napaxtij tzet wean, wanma ti'an choche syijye Comam Dios, yaja' hin nimanilan, ha' mule lan̈an syijyeni.


Copyright
Learn More

will be added

X\