ROMANOS 6

1¿Tzet con̈ chi heyalni? ¿Tom ẍto sje janicoj yak'b'il co mul yun̈e cam ya'ni Comam Dios nimanc'ulal jin̈, cat cam syeni Comam sc'ulch'anil sc'ul jet? 2¡Machoj! ¡mat yetoj aya! Matxa yocb'al mule jin̈, haxca haca' camomon̈xa tet mule, yuxin matxa yetoj aya chon̈ ehcoj yin̈ mule'. 3Heyohtaj to yet xji'ni ha' hununon̈, syeloj sb'a to hune'xan̈e xjucan b'oj Comam Jesucristo. Yuxin yet xcam Comam xcon̈ cam pax b'oj. 4Yet xji'ni ha' syeniloj sb'a to xcon̈ cami, hunen̈e xcon̈ muji b'oj Comam. Yaja' spitzc'aotcan̈ Comam xol hej camom yu scan̈il ye Comam Dios, yuxin chu jehc'oj yin̈ hune' k'inal ac' yu scan̈il ye Comam. 5Haxca ta huninajon̈coj yin̈ Comam Cristo yin̈ scamical, xcon̈ hunipaxcoj yin̈ sk'inal yet xpitzc'aotcan̈. 6Johtaj to tzettic'a je yet yalan̈to, xax ah yin̈ culus b'oj Comam. Hactu' xu yilaxiloj yip hune' jec'najil ti', yun̈e matxa ẍco yijye juni tx'ojal. 7Haxca mac camnajxa, matxacoj yul sk'ab' tx'ojal. 8Haxca xax con̈ cam b'oj Comam, yuxin ẍcawxi co c'ul to chon̈ ehc'oj yin̈ Comam tinan̈. 9Johtaj to xpitzc'acan̈ Comam yin̈ camical, matxa b'ak'in̈ ẍcamoj, haxca matxa yoc camical yin̈. 10Yet xcam Comam Jesucristo, huneln̈e xcam Comam tet mule, yuxin matxa yoc mule yin̈. Tinan̈ itzitz yin̈ stohb'alk'inal yu yehic'oj b'oj Comam Dios. 11Hacon̈ tu', co nab'tij ta camnajon̈xa, matxa yocb'al mule jin̈, yaja' itzitzon̈ yuxan̈e co yijyen Comam, haxca huninajxatoj co k'inal b'oj Comam Cristo Jesús. 12Yuxin matxa ẍco chacoj mule yahawoj co nimanil camb'eal ye ti', yun̈e matxa chon̈ yijb'a juni xtx'ojal choche. 13Matxa sje ja'ni hanic'oj co nimanil ti' yul sk'ab' mule yu yocnicoj yin̈ tx'ojal. Ha' jet to tetn̈e Comam Dios yet ay ja'ni ocnojcoj co b'a, haxca pitzc'ab'ilon̈xacan̈. Yuxin tinan̈ ja'a'coj co nimanil ti' tet Comam yun̈e yocnicoj yu yin̈ hej tzetet c'ul. 14Matxa yalan̈oj sley ya' Moisés ayon̈coj, to yalan̈xa sc'ulch'anil sc'ul Comam Dios b'ay ayon̈coj tinan̈, yuxin matxa ẍja' ayoj co b'a tet tx'ojal. 15Tinan̈ sc'ulch'anil sc'ul Comam Dios b'ay ayon̈coj, matxa yalan̈oj ley. Yaja' ¿tzet ẍjute jalni? ¿tox haxca hactu', yehn̈e janicoj co mul? ¡Machoj! ¡mat yetoj aya! 16Ta ẍjacoj co b'a yalan̈ schejb'anil hunuj maca, chon̈ can yalan̈ schejb'anil hune' anma tu'. Ta ẍjacoj co b'a yul sk'ab' tx'ojal, chon̈ cami. Wal ta ẍjacoj co b'a yul sk'ab' Comam Dios, chon̈ can c'ulal yul sat Comam. 17Ẍwa' yuch'antioẍ tet Comam Dios heyuan, haxca yichotax heyalaxc'oj yul sk'ab' hune' cuyb'anile ti', sunilxa he c'ul che yijyeni, waxan̈ca yet yalan̈to tet mule xeyijye. 18Yet xquex colchacan yul sk'ab' mule tu' xquex occan schejab'oj Comam Dios yun̈e heyuni hej tzetet c'ul. 19Ha' hej tzetet heyohtaj, ha' ẍwacoj syeb'aniloj teyetan yun̈e he txumni. Yet yalan̈to squistalil xeyu xeyanicoj he nimanil schejab'oj tzetet tx'oj, yuxin x'ahcan̈ he tx'ojal. Hactu' tinan̈ awejcoj he nimanil yalan̈ schejb'anil hej tzetet c'ul yun̈e yetn̈e Comam Dios che yucanoj. 20Yet chejab'to je tet mule, machon̈coj yalan̈ schejb'anil hej tzetet c'ul. 21Yaja', ¿tox ay ninoj sc'ulal xji' yin̈ hune' xtx'ojal xju tu' xin? Machoj, han̈c'a xtx'ixwilalil ẍtit yin̈ co c'ul tinan̈, han̈c'a camical mach stan̈b'al b'ay lan̈an hon̈ yinitoj. 22Tinan̈ colb'ilon̈xa yalan̈ schejb'anil mule. Schejab'xa Comam Dios jeyi, yuxin yet-xan̈e Comam jeyi, ẍco chab' k'inal mach stan̈b'al. 23Ta ha' hej tzetet tx'oj ẍju, ẍco chab' camical mach stan̈b'al spajoj. Wal tzet sa Comam Dios jet, ha' k'inal mach stan̈b'al yu Jahaw Cristo Jesús.


Copyright
Learn More

will be added

X\