ROMANOS 6

1¿Tzet con̈chi yin̈ hune' ti'? ¿Tom chicolahico janico comul yun̈e cam chisyelo Comam Dios isc'ulch'anil isc'ul? 2Wal xin machoj, han̈on̈ ti' camnajon̈xalo yin̈ mule, matxa jeto ay janico comul. 3¿Tom mach heyohtajo xin tato yet yah ha' cowi' hununon̈, hunxan̈e jucano yeb Comam Jesucristo? Hac tu' xin yu isyenilo isba tato hayet iscam Comam, cocampaxo yintaj. 4Yet yah ha' cowi' isyenilo isba tato con̈muji yinta Comam Jesucristo, hac tu' yu cocamleloj. Yuxin haca'tic'a yu yitzitzbican̈ Comam Jesucristo xol camom yu isc'ulch'anil yip Comam Dios, hacxa tu' chu jec' yin̈ hune' ac' k'inale. 5Yuto yet iscam Comam Jesucristo cocampaxo yintaj, yuxin haca'tic'a yu yitzitzbican̈ Comam tu', hac tu' chu jitzitzbican̈. 6Caw johtaj tato hune' coicham beybal ahcano yin̈ culus yinta Comam yun̈e yelcano yip hune' cobeybal caw mulum tu', hac tu' xin yu jelcanti yalan̈ yip mule matxa chicowatx'e. 7Yuto ha' mac xacami, matxa ayocto yalan̈ yip mule. 8Han̈on̈ ti' xacon̈cam yinta Comam Jesucristo, yuxin chicawxi coc'ul tato chon̈eh isc'atan̈ Comam yin̈ huneln̈e. 9Caw johtaj tato itzitzbican̈ Comam Jesucristo, matxa xin bak'inal chicami. Hune' camical tu' matxa yip yiban̈ Comam. 10Yet iscam Comam Jesucristo, cam Comam huneln̈e yin̈ mule, matxa bak'inal chicami. Tinan̈ xin itzitz Comam yin̈ huneln̈e yu iswatx'en tzet chal isc'ul Comam Dios. 11Hacon̈ojab tu' conabawetij tato camnajon̈xa yin̈ mule, yaja' itzitzon̈xa yu coyijen tet Comam Dios, yuto hunxa je yeb Comam Jesucristo Jahawil. 12Yuxin matxa chijak' hamanil tet mule islahnico yik'ni yip yin̈ conimanil yet camical ye ti', hac tu' xin matxa chon̈oc cowatx'e' tzettaj istx'ojal choche coc'ul cowatx'e'. 13Matxa chijak' hune' conimanil ti' yin̈ mule, haca' hunu tzet ye tu' chiocnico yin̈ istx'ojal. Wal xin jak'aweco coba cowatx'en yin̈ tzet choche Comam Dios, yuto camnajon̈ yaja' pitzc'abilon̈xacan̈. Yuxin tinan̈ jak'aweco sunil conimanil yul isk'ab Comam Dios, haca' tzet ye tu' chiocnico yin̈ isc'ulal. 14Yuxin matxa yoc mule jin̈ yuto matxa ayon̈ico yalan̈ isley naj Moisés, walxinto yalan̈xa isc'ulch'anil isc'ul Comam Dios ayon̈icoj. 15¿Tzet xin cheyute heyalni? ¿Tom chon̈oc jak'a'paxico comul yu matxataj yalan̈ ley ayon̈icoj, to yalan̈xa isc'ulch'anil isc'ul Comam Dios? ¡Wal xin machoj! 16Caw heyohtaj tato hayet chijanico coba yalan̈ yip hunu maca, caw chon̈occano ischejabo hune' mac tu', cat coyijen tzet chala. Hac ton tu' xin tato ha' tet mule chijak' cheja' coba, chon̈occano ischejabo mule tu', hune' chon̈inito yin̈ camical. Yaja' ta ha' tet Comam Dios chicoyije chon̈occano ischejabo Comam, cat joccano c'ulal yul sat. 17Yet yalan̈tocanoj caw chejab heyehico yin̈ mule, yaja' yuch'andios tet Comam Dios yuto tinan̈ yin̈ caw sunil heyanma cheyijen cuybanile ak'bilcano teyet. 18Yet heyelcanti yalan̈ yip mule tu' heyoccano yijemal yin̈ istoholal. 19Ha' huntek'an tzet chiwaltojan teyet ti' caw comonn̈e chu walnitojan yun̈e mach ya'tajo istxumchalo heyu. Haca'tic'a yu janico conimanil yijemal yin̈ sunil istx'ojal, cowatx'en isyahbetajil yeb ismachiswalilal yet yalan̈tocanoj, hacojab tu' xin chu janico conimanil yijemal yin̈ isc'ulal, hac tu' xin han̈c'an̈e tet Comam Dios chicoyije. 20Hayet ayon̈toco yalan̈ yip mule mach yijemojon̈ yin̈ istoholal. 21Yaja', ¿tzet isc'ulal jik' yin̈ huntek'an istx'ojal cowatx'e tu', huntek'an bay chon̈tx'ixwi tinan̈? Wal xin han̈c'an̈e yin̈ camical mach istan̈bal chon̈yitoj. 22Yaja' tinan̈ xin colbilon̈xa yalan̈ ischejbanil mule, ischejabxa Comam Dios jehi. Ha' hune' isc'ulal chak' jet xin, ha' ton joc cowatx'en sunil tzet choche Comam Dios, cat yak'nipaxo Comam cok'inal mach istan̈bal. 23Yuto ha' ispaj selel mule, ha' ton camical mach istan̈bal, wal issabehal Comam Dios xayak' jet xin, ha' ton k'inale mach istan̈bal, yuto hunxan̈e je yeb Comam Jesucristo Jahawil.

will be added

X\