ROMANOS 5

1Xcon̈ can c'ulal yul sat Comam Dios, haxca xja' yuluj co c'ul yin̈ Comam. Tinan̈ ayon̈xacoj yin̈ ak'anc'ulal b'oj Comam, yu Comam Jahaw Jesucristo. 2Yu Comam ay joc yin̈ sc'ulal Comam Dios haxca ẍcawxi co c'ul yin̈. Yuxin caw chon̈ tzalayi haxca t'in̈anxa ye stzujchaapnoj joc c'ulal, haca' sc'ulal Comam. 3Matoj yun̈e tu' ẍcawxi co c'ul, to chon̈ tzalayi ta ay b'ay ch'ec' ya' janma, haxca yu hunk'aan sya'tajil tu' k'a' ẍto co lin̈b'a co b'a. 4Yet ẍco lin̈b'an co b'a, chon̈ yihlani, yuxin k'a' ẍto cawxi co c'ul yin̈ Comam. 5Machu co tx'ixwi yet ẍcawxi co c'ul yin̈ Comam, haxca Comam Espíritu Santo ab'il jet syeni hantaj chon̈ yoche Comam. 6Yet yalan̈to mach mac xc'oji scolni sb'a, yaja' yet xhul stz'ayical, xhul Comam Cristo xa'ni camoj sb'a yu anma mach Dios sat. 7Co xol hayon̈ ti' mat sub'utajoj ta ay hunuj mac sje' sc'ul ya'a' camoj sb'a yu hunuj mac tohol yanma. Han̈c'a ti' ta ẍpalc'on sc'ulal sc'ul hune' mac tu', waltu' ay mi mac shin sb'a scam yu. 8Yaja' ixtan̈ yeyi to caw chon̈ yoche Comam Dios, haxca yet ahmulon̈to xa' camoj sb'a Comam Cristo ju. 9Hajxam tinan̈ to xax con̈ can c'ulal yul sat Comam Dios haxca xcam Comam Jesucristo ju, k'a' t'in̈an to co colcha yu Comam tet showal Comam Dios chuluj. 10Yet yalan̈to tu' waxan̈ca chon̈ cajwa yin̈ Comam Dios yu hej co mul, yaja' xcon̈ alaxcoj c'ulal yu scamical Sc'ahol. Hajxam tinan̈ to ayon̈xacoj yin̈ sc'ulal b'oj Comam, k'a' t'in̈an to co colcha yu sk'inal Sc'ahol tu'. 11Yaja' mat han̈c'aoj hunk'aan tzetet ti' b'ay chon̈ tzalayi, to ẍcawxi pax co c'ul yin̈ Comam Dios, haxca ha' Comam Jesucristo xcon̈ anicoj yin̈ sc'ulal b'oj Comam. 12Hune'n̈e winajil naj b'ay x'ichitij mule satyib'an̈k'inal ti', naj Adán. Yu hune' mule tu' x'ichican̈ camical. Hune' camical tu' xhul jib'an̈ co hunil, haxca co hunil ahmulon̈. 13Yet maẍto ch'a'lax sley ya' Moisés tet anma, ayxatic'a mule satyib'an̈k'inal ti', yaja' mach oclelaxtoj haxca maẍto ley. 14Waxan̈cami hactu' yeyi, yettax x'ichitij mule yin̈ naj Adán masanto xhul stz'ayical b'ay x'a'lax ley tet ya' Moisés, ẍtic'a cam anma, waxan̈ca smul anma tu' mat lahanoj b'oj yet naj Adán, haxca naj tu' man̈c'ob'il hune' schejb'anil Comam Dios yu naj. Naj Adán yechel hune' mac xhulc'uj yin̈ tzujanilxa ye naj. 15Ha' x'elicoj smul naj Adán mat lahanoj b'oj tzet ton̈e cha' Comam Dios jet. Hunen̈e winajil naj x'anicoj mule, hactu' xu yul camical jib'an̈ co hunil. Wal Comam Jesucristo han̈c'a x'initij sc'ulch'anil sc'ul Comam Dios jet, yuxin tzet ton̈e sa Comam jet co hunil, k'a' c'ulto x'elicoj. 16Smul naj Adán tu' mat lahanoj b'oj sc'ulch'anil sc'ul Comam sa jet. Yun̈e hune' mule xacoj naj, xcawxicoj mule jib'an̈ co hunil, yaja' yuxa sc'ulch'anil sc'ul Comam, sunil co mul x'elcantoj jib'an̈ waxan̈ca caw tx'ihal. 17Han̈c'a naj x'anicoj smul, yuxin x'oc camical jahawoj jib'an̈ co hunil. Wal Comam Jesucristo han̈c'a x'initij sc'ulal Comam Dios jet, yuxin chon̈ can c'ulal yul sat Comam. Yu Comam Jesucristo caw tx'ihalon̈ ẍco chacan k'inal mach stan̈b'al cat jocoj yahawoj b'oj Comam. 18Hune'n̈e mule x'initij sya'tajil jib'an̈ co hunil. Yaja' yu hune' st'in̈anil xu Comam Jesucristo, yuxin chal Comam Dios to sunil anma chu scolcha yul sk'ab' sya'tajil, ẍchanican k'inal mach stan̈b'al. 19Han̈c'a naj Adán tu' xman̈c'oni, yaja' ahmul xjucan co hunil yu naj. Wal Comam Jesucristo, caw yijyom xute sb'a. Yu syijyomal Comam, yuxin chu co can c'ulal yul sat Comam Dios co hunil. 20Tzujanto x'a'lax sley ya' Moisés yun̈e yahcan̈ mule, yaja' yet x'ahcan̈ mule, k'a' xto ahcan̈ sc'ulch'anil sc'ul Comam Dios. 21Haca' xu syeni sb'a yip mule xanicanoj camical jib'an̈, hactu' xu syeni sb'a yip sc'ulch'anil sc'ul Comam Dios, haxca yu Comam Jahaw Jesucristo chu co can c'ulal yul sat Comam, yuxin ẍco cha k'inal mach stan̈b'al.


Copyright
Learn More

will be added

X\