ROMANOS 4

1Haca' jichmam Abraham, ¿tzet yu yoc icham c'ulal yul sat Comam Dios heyalni? 2Tato yu tzet iswatx'e icham yuxin oc icham c'ulal yul sat Comam Dios, yimican̈ isba icham, wal xin machoj. 3Chal yul Yum Comam Dios: “Yayto icham Abraham yul yanma yin̈ Comam Dios, yu hune' tu' yuxin oc icham c'ulal yul sat Comam,” ẍiayoj. 4K'inalo tato ay hunu naj chimunla yinta hunu naj yahaw munil, chak'lax istohol naj. Ha' istohol naj tu' xin, mach matanilo yehi, to c'asxa ye tet naj. 5Yaja' mac mach yin̈o tzet chiswatx'e chicawxi isc'ul, to chayto yul yanma yin̈ Comam, Comam chiak'ni nimanc'ulal yin̈ ismul anma. Yu ayco yanma hune' mac tu' yin̈ Comam Dios, ha' chianico c'ulal yul sat Comam. 6Ha' caw naj rey David halni tato caw sak'al yet mac chal Comam Dios c'ulal, maẍtaj yu tzet chiswatx'e, 7yet yalni naj haca' ti': Sak'al yet mac ch'ak'lax nimanc'ulal yin̈ ismul yu Comam Dios, cat isnahuln̈encanto Comam ismul tu'. 8Sak'al yet mac matxa bak'inal chisnati Comam ismul, ẍi naj David tu'. 9¿Mac xin caw sak'al yet? ¿Tom han̈e mac ayco circuncisión yin̈, mato hapaxo mac machi circuncisión yin̈? Wal xin xajalan̈ tato occano icham Abraham c'ulal yul sat Comam Dios yu yaco yanma icham yin̈ Comam. 10¿Bak'in xin oc icham c'ulal yul sat Comam Dios? ¿Tom yet ayxaco circuncisión yin̈ icham? ¡Machoj! To yet maẍto chioc circuncisión yin̈ icham. 11Wal xin tzujanilxa yoc hune' circuncisión tu' yin̈ icham, ha' xin oc yecheloj tato oc icham c'ulal yul sat Comam Dios yuto yayto icham yul yanma yin̈ Comam. Yuxin occano icham mamehal yin̈ huntek'an mac maẍto circuncisión yin̈, yaj chayto yul yanma yin̈ Comam; hac tu' xin chu yoccano c'ulal yul sat Comam, haca' icham Abraham tu'. 12Mamepaxo icham yin̈ sunil mac ayxaco circuncisión yin̈, yaja' maẍtaj yin̈ hune' yechel tu' chicawxi isc'ul, to chayto yul yanma yin̈ Comam, haca' yu yanayto icham Abraham yul yanma yin̈ Comam yet yalan̈to maẍto chioc hune' yechel circuncisión yin̈ icham. 13Yaltecano Comam Dios tet icham Abraham yeb tetej yuninal icham, tato chischah icham ismajul yul sat yiban̈k'inal ti', yaja' maẍtaj yu yijem icham yin̈ ley, walxinto yu yayto icham yul yanma yin̈ Comam. 14K'inalo tato han̈e tet mac chiyijen ley chak' Comam Dios tzet haltebilcanoj, ta hac tu' machim tzet chal yelapno janico janma yin̈ Comam Dios chal tu', machimpaxo tzet haltebilcano yu Comam. 15Yuto ha' ismunil ley ha' yanico isya'tajil yiban̈ anma. K'inalo ta machi ley, machim mac chaco ismul yin̈ ley tu'. 16Yuxin yaltecano Comam Dios hune' tu' tet icham Abraham yu yaco yanma icham yin̈ Comam. Yuxin matanil chak' Comam tzet haltebilcano yu, mach xin chishel isba to hactic'apax tu' tet yuninal icham yin̈ tzujanilxa. Ha' chal yelapno tu' to maẍn̈etaj tet mac chiyijen ley bay chak' Comam tzet yalte tu', to jetpaxo han̈on̈ chijayto yul janma yin̈ Comam Dios haca' yu yanayto icham Abraham yul yanma yin̈ Comam; yuxin occano icham mamehal jin̈ han̈on̈ ti'. 17Haca' yalni yul Yum Comam Dios bay chala: “Caw tzetc'a anma chipohchacan̈ yin̈ej hawuninal,” ẍi Comam tet icham. Yaja' icham Abraham tu' yaco yanma icham yin̈ Comam, Comam chiak'ni itzitzbocan̈ camom yeb chiwatx'en tzet ye tu' maẍto watx'ebiloj. 18Icham Abraham caw yayto icham yul yanma yin̈ Comam Dios, yoc icham yechmano yin̈ tzet yalte Comam, waxan̈ca xin maẍto ixtan̈o yijni isba. Hac tu' xin yu yoc icham mamehal yin̈ tx'i'al ej con̈ob, haca'tic'a yu yalni Comam tet icham yet yalni haca' ti': “Haca' isbisil tx'umel, hac tu' isbisil anma chipohchacan̈ yin̈ ej hawuninal,” ẍi Comam. 19Maẍtic'a xin cabconcan̈ yanma icham Abraham yin̈ Comam, waxan̈ca caw ichamxa icham, caw etza cien habilxa icham, hacpax tu' ix Sara, caw ixnamxa ix, matxa istiempohalo yuninwi ix. 20Yaja' xin maẍtic'a cabconcan̈ isc'ul icham yin̈ tzet yalcano Comam, caw machi yilo yanma icham yin̈ Comam. Walxinto ip yanayto icham yul yanma yin̈ tzet yal Comam, yak'ni tzalaho isc'ul icham yin̈ Comam. 21Caw yohta icham tato ay yip Comam iswatx'en tzet yalte tet icham. 22Yu hune' tu' yuxin oc icham c'ulal yul sat Comam Dios, yuto yayto icham yul yanma yin̈ Comam. 23Yaj maẍn̈etaj yin̈ icham Abraham tu' tz'ibn̈ebilcanoj ta oc icham c'ulal yul sat Comam Dios yet yanico yanma icham yin̈ Comam, 24walxinto tz'ibn̈ebilpaxcano jin̈ han̈on̈ xacon̈oc c'ulal yu xajaco janma yin̈ Comam, Comam ak'ni itzitzbocan̈ Comam Jesucristo Jahawil. 25Comam alaxico yul isk'ab camical yu comul, lahwi tu' ispitzc'alaxcan̈ xol camom, yun̈e joccano c'ulal yul sat Comam Dios.

will be added

X\