ROMANOS 4

1¿Tzet xu scan ya' jichmam Abraham c'ulal yul sat Comam Dios heyalni? 2Xcan ya' c'ulal yul sat Comam, matoj ha' caw ya' ay sc'ulal. Ta ha' ya' ay sc'ulal, xmam yal sb'a ya' can̈yeal. Wal xin, machoj. 3Haxca chal Yum Comam Dios: Xa' ya' Abraham yuluj sc'ul yin̈ Comam, yuxin xal Comam to c'ul ya' yul sat. 4K'inaloj ta chon̈ munla yin̈ hunuj anma, ẍco cha co tohol, hune' co tohol tu' mat sab'ealoj ye jet, to sc'as naj yahaw munil yeyi. 5Wal mactaj mat yin̈oj syijyen ley ẍcawxi sc'ul, to yin̈ Comam Dios cha' yuluj sc'ul, c'ul ch'elicoj yul sat Comam. 6Hactu' yalni ya' rey David ta caw sak'al yet anma halb'ilxa yu Comam ta c'ul ch'elicoj yul sat, mataj yu tzet sc'ulal xu, yuxin xal Comam hactu'. 7Chalni: Sak'al yet mac sb'ut'cantan̈oj Comam Dios smul, snahuln̈entoj Comam xtx'ojal. 8Sak'al yet mac chal Comam ta matxa b'ak'in̈ ẍnalaxtij smul. 9¿Mac sak'al yet tu'? ¿tom han̈c'a anma aycoj circuncisión yin̈? Machoj, to ha'hun anma machcoj hune' yechel tu' yin̈. Xax wal teyetan ta chal Yum Comam Dios to yun̈e xa' ya' Abraham yuluj sc'ul, yuxin xal Comam ta ẍcan ya' c'ulal yul sat, ẍiayoj. 10Yaja' tijab' yin̈ he c'ul, ¿b'ak'in̈tax xal Comam hune' tu' heyalni? ¿Tom ayxacoj hune' yechel tu' yin̈ ya' yet xalni Comam? Machoj, maẍtocoj. 11Xax can ya' c'ulal yul sat Comam yu ya'ni yuluj sc'ul yin̈ Comam, xto schani ya' circuncisión. Hune' scha' ya' tu' ha' ẍyeniloj to xax can ya' c'ulal yul sat Comam. Yu hune' tu', mame ya' yin̈ mactaj cha' yuluj sc'ul yin̈ Comam Dios, waxan̈ca machcoj hune' yechel tu' yin̈. Hunk'aan tu' c'ul x'elicoj yul sat Comam, haca' ya' tu'. 12Mame pax ya' yin̈ mac aycoj hune' yechel tu' yin̈, yaja' tan̈e mat yin̈ojn̈e hune' yechel tu' ẍcawxi sc'ul, to cha' yuluj sc'ul yin̈ Comam Dios haca' xu ya'ni ya' Abraham yuluj sc'ul yet maẍto ch'oc circuncisión tu' yin̈ ya'. 13Xaltecan Comam Dios satyib'an̈k'inal ti' tet ya' Abraham b'oj tet yic'al. Yaja' matoj haxca syijye ya' ley yuxin xalte Comam tet ya'. Machoj, xa' Comam tet ya' haxca c'ul x'elicoj ya' yul sat Comam yu ya'ni ya' yuluj sc'ul yin̈. 14K'inaloj ta han̈c'a anma syijyen ley b'ay cha' Comam tzet halteb'il yu, nab'an̈em ẍja' yuluj co c'ul. Yin̈ hactu', matxam tzet chaliloj tzet halteb'il yu Comam. 15Hune' ley tu' chitij showal Comam Dios yib'an̈ anma. K'inaloj ta mach ley, mach mi mac chacoj smul yin̈ ley. 16Xaltecan Comam Dios satyib'an̈k'inal ti' tet ya' haxca xa' ya' yuluj sc'ul yin̈ Comam. Yuxin ixtan̈ yeyi to yun̈e sc'ulal sa Comam tzet halteb'il yu tet sunil yic'al ya'. Matn̈etaj tet mac syijyen ley sa Comam hune' ti', to jet pax hayon̈ ẍja' yuluj co c'ul ti', haca' xu ya'ni ya' Abraham yuluj sc'ul. Hactu' ch'elicoj ta smameal ye ya' yin̈ mactaj cha' yuluj sc'ul yin̈ Comam Dios, 17haca' yalni Yum Comam: Caw tx'ihal con̈ob' ch'elojcoj hawic'al wuan, ẍi Comam tet ya'. Yuxin co mam ye ya' yul sat Comam Dios haxca xa' ya' yuluj sc'ul yin̈ Comam, Comam ch'a'ni sk'inal hej camom. Yet stzotel Comam, lemb'il ẍwaycan̈ hunuj tzetet yu. 18Haxca caw cha' ya' Abraham yuluj sc'ul yin̈ Comam Dios, yuxin xechmac'oj ya' yijni sb'a tzet matxa smaja ta ẍto yij sb'a. Yu hune' tu' x'aotcoj ya' yu Comam smamealoj tx'ihal hej con̈ob'. Hactu' xu yijni sb'a tzet xal Comam, yet xalni yin̈ hacti': Haca' sb'isil hej tx'umel hactu' chub' sb'isil hawic'al. 19Maẍtic'a xcab'con ya' waxan̈ca yohtaj ya' ta caw ichamxa ya', matxa yip snimanil ya', lan̈an stz'ajna ya' 100 hab'il. B'oj ya' Sara yixal ya', matxa yetoj ay yilni ya' yin̈ hunuj yunin. 20Matoj haxca hactu', xcab'con sc'ul ya' Abraham, to xto cam ya' ya' yuluj sc'ul yin̈ tzet xal Comam Dios tet. Xcawxi sc'ul ya' yin̈ Comam, xa' ya' yuch'antioẍ tet Comam yu tzet xalte tet, 21haxca yohtaj ya' to chu yuni Comam tzet xalte tet ya'. 22Yuxin xal Comam to c'ul ya' yul sat, haxca xa' ya' yuluj sc'ul yin̈ Comam. 23Tz'ib'n̈eb'il to xcan ya' Abraham c'ulal yul sat Comam Dios haxca xa' ya' yuluj sc'ul yin̈ Comam. Yaja' mat yun̈eoj schani ya' yak'lob'al sc'ul yuxin stz'ib'n̈elaxi, 24to yun̈e hayon̈ hun ẍco cha yak'lob'al co c'ul, hayon̈ b'ay chal Comam ta xax con̈ can c'ulal yul sat haxca ẍja' yuluj co c'ul yin̈ Comam xpitzc'ancan̈ Comam Jahaw Jesús xol hej camom. 25Comam Jesús x'aotcoj yul sk'ab' camical yu hej co mul, xpitzc'aotcan̈, yun̈e co can c'ulal yul sat Comam Dios.


Copyright
Learn More

will be added

X\