ROMANOS 3

1Yuxin, ¿tzet cheyute heyalni yin̈ hune' chiwalti'an? ¿Tom mach yelapno anma Israel yeb hune' circuncisión ayco yin̈ tu' cheyute hetxumni? 2Wal xin caw ay chaliloj yuto cawxi isc'ul Comam Dios yak'ni Istzoti' tet anma Israel. 3Yaja', ¿tzet xin chielicoj tato ay anma Israel mach chiswatx'e yin̈ tzet chal Comam Dios? ¿Tom yu hune' tu' yuxin mach chisyijepaxo Comam Istzoti' halbilcano yu? 4¡Machoj! Walxinto ha'n̈e isyelal chal Comam chij isba yin̈ tzet chala waxan̈ca sunil anma caw lek'ti', haca' yalni yul Yum Comam bay chala: Yuxin chaẍhallax c'ulal yu anma yu tzet chawala, hayet chaẍyilwen anma machi nino istx'ojal chiilchalo tawin̈, ẍiayoj. 5Wal xin ay mac chihalni haca' ti': “Ta yu istx'ojal chicowatx'e chiixtan̈wiloj tato han̈e istoholal chiswatx'e Comam,” ẍi anma. Yuxin ¿tzet cheyute heyalni hex ti'? ¿Tom istx'ojal chiswatx'e Comam yet chiyanayo isya'tajil jiban̈ yu istx'ojal chicowatx'e? ¡Machoj! 6Caw istoholal chiswatx'e Comam. K'inaloj, ta maẍtaj istoholal chiswatx'e Comam, machim chu yoc Comam yilni yin̈ tzet chielico anma yul sat yiban̈k'inal ti'. 7Ay mac chitxumni haca' ti': “Yet chiwanicojan lek'ti'al caw ec'balto chisyelo isba isyelal yip Comam Dios, yaja' ¿tzet yin̈ xin chiillaxi yin̈ tzet chinwatx'ehan cat wallaxan mulumal?” ẍi anma tu'. 8Ay mac chalni tato hac tu' walnihan. Tato hac tu', ¿tzet yin̈ xin maẍtaj istx'ojal chicowatx'e yun̈e caw yixtan̈wilo isc'ulch'anil isc'ul Comam Dios? Ay anma tx'oj isnabal chalni ta hac tu' incuynihan anma. Ha' mac chihalni haca' tu', ha' ay yet yay isya'tajil yiban̈ yu Comam Dios. 9Wal xin, ¿tom ec'bal c'ulon̈ han̈on̈ Israel hon̈ ti' sata anma mach Israeloj? ¡Machoj! Wal xin lahanon̈ cosunil. Xawalan teyet tato sunil anma Israel yeb anma mach Israeloj ayicto yalan̈ yip mule. 10Haca' yalni yul Yum Comam Dios, bay chala: Machi hunu mac c'ul, nitam hunuj. 11Machi hunu mac chitxumchalo yu, machi hunu mac chisaynilo Comam Dios. 12Sunil mac chic'ayic'oj, sunil mac xayetato isba. Machi hunu mac chiwatx'en isc'ulal nitam hunuj. 13Caw han̈etic'a istx'ojal chielti yul isti' anma, lahan haca' hunu bay mujan camom elna ismajil. Caw xin chak' subchaho yet anmahil yin̈ lek'ti'al chala. Haca' veneno ayicto yul isti' no' laba, hac tu' ismachiswalilal tzet chielti yul isti' anma. 14Han̈etic'a tz'acti' chielti yul isti' anma, yeb tzoti' caw tx'oj. 15Caw xin yin̈ an̈e chito potx'wal yin̈ yet anmahil. 16Bajxan̈etu'wal cheq'ui chietaxto tzet ye tu' yu, bisc'ulaln̈etic'a chiec' yak'a'canoj. 17Mach yohtajo isbelal yet ak'anc'ulal. 18Maẍtic'a yelapno Comam Dios yul sat, ẍiayo yul Yum Comam. 19Caw johtaj tato sunil tzet tz'ibn̈ebilcano yin̈ ley yet payat tu', ha' tet mac ayicto yalan̈ ley tu' ha' tet chitzoteli, yun̈e sunil mac chiscach isti', cat istak'wenico ismul yiban̈ tet Comam Dios. 20Yuto machi huno mac chioc c'ulal yul sat Comam Dios yu isyijen yin̈ tzet chal ley, wal xin cachann̈e ismunil hune' ley tu' ha' isyeniloj tato caw mulumon̈. 21Tinan̈ xin, xaisyelo Comam Dios yin̈ tzet chu joc c'ulal yul sat Comam, maẍtaj yu coyijen ley. Wal xin halbilcano yu naj Moisés yeb yu ebnaj ischejab Comam yet payat yin̈ tzet chu joc c'ulal yul sat Comam. 22Yu janico janma yin̈ Comam Jesucristo yuxin chon̈oc c'ulal yul sat Comam Dios, hacpax tu' xin sunil mac chianayto yul yanma yin̈ Comam chioccano c'ulal yuto lahan anma sunil. 23Mulumon̈ cosunil yul sat Comam, yuxin maẍto hunu mac xatzujcha apno isc'ulch'anil Comam yu. Sunil mac yacanico ismul, yuxin nahat yehilo yin̈ iscolbanil chak' Comam Dios. 24Yu isc'ulch'anil isc'ul Comam yuxin chon̈oc c'ulal yul sat, yaj yu colbilon̈xa yu Comam Jesucristo, sunil ti' ak'bil matanil jet yu Comam Dios. 25Comam Jesucristo oc xahanbalil yu Comam Dios. Ismalto ischiq'uil yu yak'ni nimanc'ulal yin̈ ismul anma. Chischah anma hune' nimanc'ulal yu yanico yanma yin̈ Comam. Hac tu' chu isyeni Comam tato ha' istoholal chiswatx'e yet yak'ni nimanc'ulal yin̈ ismul anma yet payat tiempo tu'. 26Hacpax tu' tinan̈, chisyelo Comam Dios tato ha' istoholal chiswatx'e, yeb ta yexn̈eto iswatx'en istoholal yet chon̈yalni Comam c'ulal yu chijayto yul janma yin̈ Comam Jesucristo. 27Ta hac tu' chal tu', ¿tzettaxca xin chielico hune' helolo'al? Chitan̈canoj yuto maẍtaj yu coyijen isley naj Moisés yuxin chon̈colchahi, walxinto yu janico janma yin̈ Comam Jesucristo. 28Hacpax tu' xin chu johtan̈encaniloj ta yu janico janma yin̈ Comam Jesucristo yuxin chon̈oc c'ulal yul sat Comam, maẍtaj yu coyijen ley. 29¿Tom han̈c'an̈e han̈on̈ Israel hon̈ ti' coDiosal ye Comam Dios? ¿Tom mach isDiosalopaxo anma mach Israelo ye Comam? Wal xin caw yeli isDiosalpaxo anma mach Israelo ye Comam. 30Yuto hune'n̈ech'an Comam Dios, yuxin macta ayco circuncisión yin̈, yeb macta machi circuncisión yin̈, chioc c'ulal yul sat Comam Dios, yaj yu yanico yanma yin̈ Comam Jesucristo. 31Yet chijanico janma yin̈ Comam, ¿tom lan̈an jalni tato matxa tzet chal yelapno ley? ¡Machoj! Wal xin chicoyelo yin̈ tzet chal yelapno ley tu'.

will be added

X\