ROMANOS 3

1¿Tzet cheyute heyalni yin̈ hune' tzet ẍwal ti'an? ¿tom comonaln̈e ye yic'al anma israel, b'oj hune' circuncisión tu'? 2Hajxa, caw ay tzet chaliloj, haxca tet anma israel b'ay xac'oj Comam Dios stzoti'. 3Yaja' ta ay anma israel mat yijyomoj, matoj yu haxca hactu', mach chij sb'a tzet halb'ilcan yu Comam tet con̈ob' israel. 4To yilal chij sb'a tzet chal Comam, waxan̈ca sunil anma ch'anicoj lek'ti'al. Haca' yalni Yum Comam: Mamin, yet ch'ocoj anma spich'nojiloj hej tzetet chawu, mach hunuj ta mataj ye chila', ẍhal-laxoj to stoholal chawala, . 5Yuxin ta ch'ixtan̈wi stoholal chu Comam Dios yu xtx'ojal ẍju, ¿chim heyala ta ay xtx'ojal Comam yet cha'ni sya'tajil jila' yin̈ hej xtx'ojal ẍju' tu'? (Ay mac hactu' yalni.) 6Yaja' ¡machoj! mat hacojtu' yeyi. K'inaloj ta mat stoholaloj chu Comam, mach mi chu yilnoj Comam tzet chon̈ tan̈oj yin̈ caw st'in̈anil. 7Ay mac ẍhalni: Yet ẍwanicoj lek'ti'alan, k'a' ẍto syeloj sb'a st'in̈anil chal Comam Dios. Yaja' ta k'a' ch'alaxcoj smay Comam yu hune' hin lek'ti'al tu'an, ¿tzet yuxin cha' Comam sya'tajil wet yu hune' hin mul tu'an? ẍi anma. 8Ta hactu', ¿tzet yuxin mataj hej tzetet tx'oj ẍju, haxin̈wal k'a' syeloj sb'a sc'ulal sc'ul Comam Dios? Mac hactu' yalni, yet ay ya'lax sya'tajil tet, waxan̈ca ay mac tx'oj nab'il yu, chalni to hactu' chu hin cuyni anmaan. 9Tzet cheyute heyalni, ¿tom k'a' c'ulon̈ hayon̈ israelon̈ ti' sataj anma mat israeloj? Hajxa, lahanon̈ co hunil. Xax wal teyetan, ta israel mato nancon̈ob'al, co hunil ayon̈coj yul sk'ab' mule. 10Hactu' yalni Yum Comam Dios: Mach hunuj mac c'ul, ni ta hunuj. 11Mach mac xtxumniloj tzetet choche Comam Dios, mach mac choche ocoj yetoj Comam. 12Sunil mac chetatoj sb'a, lahan ẍhuchatoj yul swi'. Mach hunuj mac chu b'aytet c'ul, ni ta hunuj. 13Haca' sam b'ay mujb'il camom yet ẍhajlaxi mat ch'uc'cha ju, hactu' ye tzoti' ch'eltij yul sti'. Lek'ti'aln̈etic'a ch'eltoj yul sti'. Haca' showal sti' no lab'ah, hacpaxtu' xtx'ojal tzet chala. 14Tz'acti'lojn̈etic'a chu. 15Caw lemb'il ẍpotx'wa yalni. 16Tzantic'a b'ay ch'apni, ch'etaxtoj tzetet yu, b'isc'ulaln̈e ch'ec' ya'a'canoj. 17Howaln̈e nab'il yu. 18Maẍtic'a ẍnanon tet Comam Dios. 19Johtaj to b'aytet tz'ib'n̈eb'il yin̈ ley, tet anma aycoj yalan̈ ley b'ay chala, yun̈e mach mac chu scolni sb'a, to xtxumuluj sunil anma ta ch'ilaxojtij cuenta yin̈ yu Comam Dios. 20Mach hunuj anma ẍcan c'ulal yul sat Comam Dios yu syijyen ley. To ha' smunil ley, ha' ẍyeniltoj to ahmulon̈ co hunil. 21Lan̈an syeniltoj sb'a tinan̈ tzet chu co can c'ulal yul sat Comam Dios. Matoj haxca ẍco yijye sley ya' Moisés c'ulon̈. Tz'ib'n̈eb'ilcan yu ya' b'oj yu heb'ya' schejab'lom Comam Dios tzet chu co can c'ulal yul sat Comam. 22Haxca lahan ahmulon̈, yuxin tzan macon̈ ẍja' yuluj co c'ul yin̈ Comam Jesucristo c'ul chon̈ elcoj yul sat Comam Dios. 23Co hunil ẍjacoj co mul, mach hunuj mac stzujchaapnoj sc'ulal yu haca' sc'ulal Comam. 24To yun̈e sc'ulch'anil sc'ul Comam chon̈ can c'ulal yul sat yu co colb'anil stohla Comam Cristo Jesús, 25haxca ab'ilcoj Comam xahanb'alil yu Comam Dios. Xmaltoj schiq'uil yu ya'ni tan̈oj co mul yet ẍja'ni yuluj co c'ul yin̈. Hactu' xu syeni Comam Dios to tohol yanma yet xa'ni nimanc'ulal yin̈ anma xacoj smul yet payxa. 26Hactu' chu syeni pax Comam to yehn̈e yuni stoholal yet chon̈ yalni c'ulal haxca ẍja' yuluj co c'ul yin̈ Comam Jesús. 27¿Tom chu jalni ta can̈ jeyi? Machoj, haxca mat yuuj co yijyen sley ya' Moisés yuxin chon̈ colchayi, to haxca ẍja' yuluj co c'ul yin̈ Comam Jesús. 28Haxca ẍja' yuluj co c'ul yin̈ Comam, yuxin chon̈ can c'ulal yul sat Comam Dios, matoj haxca ẍco yijye ley. 29Mat co Diosalojn̈e hayon̈ israelon̈ ti' ye Comam Dios, to sDiosal pax anma mat israeloj ye Comam. 30Haxca hune'n̈e Comam Dios aya, yuxin ta israelon̈ mato machoj, ta ẍja' yuluj co c'ul yin̈ Comam Jesús, c'ul chon̈ elcoj yul sat Comam Dios. 31Ay mi mac ẍhalni ta yu hune' cuywab'al ti' matxa tzet chaliloj ley jet, yaja' machoj. To ẍco yeloj tzet caw smunil ley.


Copyright
Learn More

will be added

X\