ROMANOS 2

1Yuxin matxa tzet tz'aj hawala' hach chachoc hawila' yin̈ tzet chiswatx'e hawet anmahil, mach chiyoc yin̈ mac anmahil hach, yet chachoc hawilno tzet chiswatx'e hawet anmahil tu', hach hunach chawiti' isya'tajil tawiban̈ yuto lahan tzet chawatx'epaxo yebi. 2Yaja' wal xin caw johtaj tato ha' Comam Dios chiilni yin̈ caw isyelal yin̈ tzet chielico mac chiwatx'en haca' tu', cat iscawxico ismul yiban̈ yu Comam. 3Walex chexoc heyila' istx'ojal chiswatx'e heyet anmahil, lahan xin chewatx'epaxo yebi. ¿Ham heyalni tato chexcolcha tet isya'tajil chati Comam Dios? 4¿Mato cheyah isc'ulch'anil isc'ul Comam caw ay yelapnoj? Ta hac tu' machi xin chenaloj tato ha' isc'ulch'anil isc'ul Comam yeb isnimanc'ulal Comam, ha' lan̈an quexyinito yin̈ heyanico heba yul isk'ab Comam. 5Yaja' yu iscawil heyanma yeb yu mach cheje heyak'aco heba yul isk'ab Comam Dios, cat hebejnicano istx'ojal, yu hune' tu' xin lan̈an hecutxbanico ishowal Comam Dios teyiban̈ yin̈ hune' istz'ayical isya'tajil, yet chilni Comam yin̈ caw isyelal yin̈ tzet chielico anma. 6Yin̈ hune' tz'ayic tu' chak' Comam ispaj selel tet hunun anma hatatic'a tzet iswatx'e. 7Chak'nipaxo Comam k'inale mach istan̈bal tet mac maẍtic'a isbej iswatx'en isc'ulal yuto choche ta c'ulch'ann̈etic'a yul sat Comam Dios, yeb ta ay yelapno yul sat Comam yeb yu issayni tzet ye tu' mach istan̈bal. 8Yaja' xin chitit ishowal Comam cat yanayo isya'tajil yiban̈ mac han̈etic'a tzet choche isc'ul chissayic'oj, mach choche isyije cuybanile caw yeli; han̈c'an̈etic'a yin̈ istx'ojal ayco yanma. 9Chitit isya'tajil yiban̈, cat yec'ya' yanma sunil anma chiwatx'en istx'ojal; yin̈ babelal yiban̈ anma Israel, lahwi tu' xin yiban̈ anma mach Israeloj. 10Wal xin chak' Comam issak'alil, yeb ismay yeb ak'anc'ulal tet mac chiwatx'en isc'ulal; yin̈ babelal tet anma Israel, tzujan tu' xin tet anma mach Israeloj. 11Yuto yul sat Comam Dios lahan anma sunil. 12Sunil mac mach ayoco yalan̈ isley naj Moisés yet yanico ismul, maẍtaj yin̈ ley tu' chiillaxi yin̈ tzet chielicoj. Wal mac ayco yalan̈ ley tu' xin yanico ismul, ha'tic'a yin̈ ley tu' chiillaxi yin̈ tzet chielicoj. 13Ha' anma chiaben ley machi xin chisyijepaxo tzet chala, ha' anma tu' mach c'ulo yul sat Comam Dios, walxinto ha' anma chiyijen yin̈ tzet chala, ha' anma tu' c'ul yul sat Comam Dios. 14Waxan̈ca mach ayocto anma mach Israelo yalan̈ isley naj Moisés, yaja' ta chiswatx'e yul yet ischuquil haca' chal ley tu', chalilo chal tu' tato aytic'aco hune' ley tu' yin̈ isnabal ebnaj. 15Yu isbeybal xin chisyeloj tato ayxaco hune' ley tu' yin̈ yanma, chisyenipaxilo yin̈ tzet chu istxumni. Ha'tic'a isnabal ebnaj chalni tet tato c'ul maca tx'oj tzet chiswatx'e. 16Haca' yalni hune' Tzoti' c'ul yet colbanile chiwalic'oti'an chihul istz'ayical yet chilni Comam Dios yu Comam Jesucristo ismul anma ewan yehi. 17Ayex cheyican̈ heba yuto Israel hex, yin̈ isley naj Moisés tzujanex, caw xin lolo' cheyute heba yuto iscon̈ob Comam Dios heyehi. 18Heyohtaj baytet choche Comam Dios chewatx'e, ha' xin ley tu' cheẍyeni hesayni isc'ulal. 19Caw chicawxi hec'ul teyin̈ tato chu heyijbanic'o mac maẍto ohtan̈e Comam Dios haca' mac mach chu yilni, yeb haca' issajilk'inal heyehico yin̈ anma ayco xol k'ejholo heyalni. 20Caw xin chicawxipaxo hec'ul teyin̈ ta chu hecuyni anma suc isc'ul, yeb ta ijbalomex yin̈ anma matzet yohtaj, yuto yu isley naj Moisés ayco yul hek'ab yuxin caw ay yitz'atil hewi' yeb heyohta isyelal, heyalni. 21Yuxin tato checuy hunuxa heyet anmahil, ¿tzet yin̈ xin maẍtajex checuy heba babel? Cheyala tato mach chu jelk'awi, yaja' xin chexelk'awipaxoj. 22Ayex cheyala ta mach chexixli, yaja' xin chexixlipaxoj. Cheyah ej tioẍ, yaja' xin cheyelk'apaxilti tzet ayicto yul yatut tioẍ tu'. 23Caw lolo' cheyute heba yin̈ isley naj Moisés ak'bil teyet, yaja' xin cheyilo ispixan Comam Dios yuto mach cheyije yin̈ tzet chala. 24Haca' tz'ibn̈ebilcano yul Yum Comam Dios bay chal haca' ti': “Anma mach Israeloj caw tx'oj istzotel yin̈ Comam Dios, yaja' heyu hex ti',” ẍiayoj. 25Caw yeli, hune' circuncisión ayco yin̈ henimanil, ha' chaliloj ta cheyije isley naj Moisés, yaja' ta mach cheyije xin, lahan chaliloj haca'tic'a mach hune' circuncisión tu' yin̈ henimanil. 26Wal ebnaj machi circuncisión yin̈ xin yaja' chiswatx'e ebnaj haca' chal ley tu', ebnaj tu' haca'tic'a ayxaco circuncisión yin̈. 27Ebnaj mach ayoco circuncisión yin̈ isnimanil, yaj chisyije tzet chal ley tu', ha' chihalnilo ismul ebnaj mach chiyijen ley tu' waxan̈ca ayco circuncisión yin̈, yeb waxan̈ca yohta hune' ley tz'ibn̈ebil tu'. 28Maẍtaj ha' mac chihallax Israel yu anma, maca yu ayxaco circuncisión yin̈ isnimanil, ha' caw yeli israelita yul sat Comam Dios. 29Wal xin ha' mac caw yeli Israel yul sat Comam Dios, ha' ton mac ayco yanma yin̈ Comam. Hune' yechel circuncisión tu' Yespíritu Comam chianico yin̈ janma, maẍtaj yu ley tz'ibn̈ebilcanoj. Mac haca' tu', maẍtaj yul sat anma caw c'ul, to ha' yul sat Comam Dios.

will be added

X\