ROMANOS 2

1Hayon̈ti', yet ẍco cawxencoj smul anma yib'an̈, mach ẍjala ta chon̈ elojcoj yin̈. Mach yoc yin̈ mac anmailon̈ haxca yet ẍco cawxencoj smul anma tu' yib'an̈, lan̈an jawtentij showal sc'ul Comam Dios jib'an̈. Ẍco cawxecoj smul anma yib'an̈ c'ajam hactu' ẍjute paxoj. 2Johtaj ta yet chilnoj Comam tzet ẍtan̈oj anma hactu' ch'uteni, yin̈ st'in̈anil ẍcawxojcoj smul anma tu' yib'an̈ yu Comam. 3Yuxin hexti', ta che cawxecoj smul anma ch'uten xtx'ojal yib'an̈, ¿tom chex elojcoj tet sya'tajil cha' Comam Dios heyalni? Haxca hatic'a chu anma ha' cheyu paxoj. 4¿Mato cheyin̈tajn̈e hantaj sc'ulal sc'ul Comam Dios, b'oj snimanil sc'ul, mat lemb'iloj ẍtit showal? Ohtajn̈ewejiloj to yu sc'ulal sc'ul Comam lan̈an hex yijb'antij yun̈e he b'ejnican xtx'ojal cheyu. 5Yaja' ayex k'a' ẍcawb'iloj heyanma, mach sje he c'ul he hela'toj he b'a. Yuxin lan̈an yak'i sya'tajil cha' Comam Dios teyib'an̈, yet ch'apnoj stz'ayical yet chila' Comam tzet ẍtan̈oj anma yin̈ stoholal. 6Hato tu' schanoj anma yet, haca' tzet xhul yub'c'uj. 7Ay mac ẍchanoj k'inal mach stan̈b'al tet Comam haxca lin̈ann̈etic'a yuni hej tzetet c'ul, choche ta ch'oc smay yul sat Comam, cat schanoj sk'inal mach stan̈b'al tet Comam. 8Yaja' ay mac ch'a'laxoj sya'tajil yila' yu showal Comam Dios, haxca han̈c'a tzetet ch'ocnicoj yu sayc'oj, mach syijye scuywab'al Comam, to xtx'ojaln̈e nab'il yu. 9Sunil mac saynic'oj xtx'ojal caw ch'ec'oj ya' yanma; b'ab'el chuluj sya'tajil yib'an̈ anma israel, lawitu' cat yuluj yib'an̈ anma mat israeloj. 10Yaja' sunil mac ẍyijyen yuni hej tzetet c'ul, schab' smay Comam Dios, b'oj ak'anc'ulal. B'ab'el chila' anma israel sc'ulch'anil, lawitu' anma mat israeloj, 11haxca sunil anma lahan yul sat Comam. 12Mactaj mat yalan̈oj schejb'anil sley ya' Moisés chacoj smul, ch'a'laxoj sya'tajil tet, mat yeẍtooj ley tu' ẍcawxenojcoj smul yib'an̈. Yaja' anma aycoj yalan̈ schejb'anil sley ya' Moisés tu', ta chacoj smul, hatic'a ley tu' ẍcawxenojcoj smul yib'an̈. 13Haxca mataj anma yohtaj ley, ha' c'ul yul sat Comam Dios, to anma ẍyijyen ley, ha' c'ul yul sat Comam. 14Waxan̈ca mach sley ya' Moisés yul sk'ab' anma mat israeloj, yaja' ta ch'ehc'oj yin̈ c'ul haca' chal hune' ley tu', syeloj to aytic'acoj hune' ley tu' yin̈ yanma. 15Hab'an syeniloj sb'a to aycoj hune' ley tu' yin̈ yanma, haxca yanmatic'a ẍhalni tet ta c'ul chu, mato tx'oj chu. 16Ha' ch'apnoj tz'ayical b'ay chila' Comam Dios tzet ẍtan̈oj anma haca' tzet nab'il yu yanma, yu Comam Jesucristo chub' Comam Dios hunk'aan ti', haca' yalni hune' tzoti' c'ul yet colb'anil chin pujb'ac'oj ti'an. 17Ay anma chal sb'a c'ulal haxca yic'al ya' israel yeyi, yin̈ sley ya' Moisés ẍcawxi sc'ul, can̈ ye chab'e haxca ha' hun yin̈ scon̈ob' Comam Dios. 18Yohtajxa b'aytet chal sc'ul Comam Dios ta ẍju. Yohtaj paxoj b'aytet k'a' c'ul juni haxca cuyb'il sley ya' Moisés yu. 19Chala ta chu swab'antoj anma mat ohtajn̈eoj Comam Dios, chu ya'ni sajilk'inal tet anma aycoj sk'ejalholo yin̈ yanma yalni. 20Ham yalni ta chu scuynitoj anma matzet yohtaj, cat scuynitoj mac mat cuywinajoj, haxca yu sley ya' Moisés aycoj yul sk'ab' xtxumlax sunil cuywab'al st'in̈anil yeyi. 21Cuywaom yin̈ anma yalni, yaja' ¿tzet yuxin mat b'ab'eloj scuy sb'a? Chala ta machu jelk'awi, yaja' ch'elk'anpaxoj. 22Chala ta machon̈ ixli, yaja' ch'ixlipaxoj. Syah tioẍ, yaja' ch'elk'ancoj yin̈ templo. 23Haxca yohtaj sley ya' Moisés, yuxin caw lolo' chute sb'a, yaja' mach syijye tzet chal ley tu'. Yu xtx'ojal chu, chiloj anma spixan Comam Dios. 24Chalayoj yul Yum Comam: Chiloj anma mat israeloj spixan Comam Dios heyu hex israelex ti'. 25C'ul hune' yechel ch'oc yin̈ co nimanil ẍhal-lax circuncisional, ta ẍco yijye tzet chal sley ya' Moisés. Yaja' ta mach ẍco yijye, lahantic'a b'oj mach ch'oc yin̈ co nimanil. 26Ay anma machcoj hune' yechel tu' yin̈, yaja' syijye tzet chal ley, hacatic'a aycoj hune' yechel tu' yin̈. 27Ha' anma machcoj circuncisión tu' yin̈, ẍyijyen hune' ley tu', ha' ẍyenojiltoj smul mac mach ẍyijyen hune' ley tu', waxan̈ca aycoj circuncisión tu' yin̈, b'oj yohtaj hune' ley tz'ib'n̈eb'il. 28Matoj haxca yic'al anma israel ye hunuj anma, yeli israel yul sat Comam Dios. Matoj haxca aycoj yechel tu' yin̈, yuxin yeli scon̈ob' Comam. 29Ha' mac aycoj yanma yin̈ Comam, ha' caw yeli israel yul sat Comam; ha' hune' circuncisión caw st'in̈anil, yin̈ janma ch'oc yu Comam Espíritu, matoj yin̈n̈e co nimanil ch'oqui. Yuxin mac i'n̈e hune' circuncisión tu' yin̈ yanma, mat anmaoj ch'anicoj smay to ha' caw Comam Dios cha'ni.


Copyright
Learn More

will be added

X\