ROMANOS 16

1Caw chintak'etojan janab Febe teyet. Ix janab ti' diaconisa ix, caw munla ix xol anma ayxaco yul isk'ab Comam bey con̈ob Cencrea. 2Caw c'ulojab chu hechahni ix yuto janab ix yin̈ Comam, chahwe ix haca' chu cochahni hunu mac ayxaco yul isk'ab Comam. Colwahan̈we yin̈ tzet chiocnico yu ix yuto caw tx'i'al mac bay colwa ix, colwapaxo ix win̈an. 3Halwe tet janab Priscila yeb tet juẍta Aquila ta chil isba yin̈ iscawil, caw wet munlawomal inbahan yeb ix yebpaxo xin naj juẍta tu' yin̈ ismunil Comam Jesucristo. 4Ix janab Priscila yeb juẍta Aquila tu', caw ishin isba iscam yu quiniscolnihan, maẍn̈etajinan xin chiwak'an yuch'andiosal tet naj yeb tet ix, to ha' hunpaxo sunil mac ayxaco yul isk'ab Dios mach Israeloj ay yul hunun con̈ob chiak'nipaxo yuch'andiosal. 5Halwepaxo tet sunil mac ayxaco yul isk'ab Comam chiscutxba isba yul yatut janab yeb juẍta tu' ta chil isba. Halwepaxo tet juẍta Epeneto tato chil isba, naj juẍta tu' caw xahan ay naj wuhan. Ha' naj babel yaco isba yul isk'ab Comam Dios yul ismajul Asia. 6Halwepaxo tet ix janab María ta chil isba ix, ix janab tu' caw xamunla ix texol. 7Halwepaxo tet ebnaj wet con̈oban, naj juẍta Andrónico yeb juẍta Junias ta chil isba ebnaj. Ebnaj cawan̈ tu' hun yu wocan preso yeb ebnaj, caw xin ay yelapno ebnaj yul sat ebnaj ischejab Comam, babel xin yaco isba ebnaj yul isk'ab Comam Dios insatajan. 8Halwe tet juẍta Amplias tato chil isba naj, caw xahan ay naj wuhan yin̈ isbi Comam, 9Halwe tet juẍta Urbano ta chil isba, naj juẍta tu' caw munla naj jintajan̈ yin̈ ismunil Comam, cat heyalnipaxo tet juẍta Estaquis ta chilpaxo isba, caw xahan ay naj wuhan. 10Halwe tet naj juẍta Apeles ta chil isba, naj juẍta tu' caw xaec' ilwebal yiban̈ naj yu ayco yanma naj yin̈ Comam. Halwepaxo tet naj juẍta Aristóbulo yebpaxo tet sunil mac ay bey yatut naj ta chil isba. 11Halwepaxo tet naj wet con̈oban, naj juẍta Herodión ta chil isba. Halwepaxo tet juẍta Narciso yebpaxo tet sunil mac ay bey yatut naj ta chil isba yin̈ iscawil, yuto xayayto ebnaj yul yanma yin̈ Comam. 12Halwepaxo tet janab Trifena yeb janab Trifosa ta chil isba. Ebix janab tu' caw chimunla ebix yin̈ ismunil Comam Dios, cat heyalnipaxo tet ix janab Pérsida, ix caw xahan ay wuhan, ta chil isba ix. Ix janab tu' caw munlapaxo ix yin̈ ismunil Comam. 13Halwepaxo tet juẍta Rufo ta chil isba, naj juẍta tu' caw sic'bililo naj yu Comam. Halwepaxo tet ismi' juẍta tu' ta chil isba, janab tu' haca' inmi'an yepaxo ix. 14Halwe tet juẍta Asíncrito yeb juẍta Flegonte yeb juẍta Hermes yeb juẍta Patrobas yeb juẍta Hermas ta chil isba ebnaj yin̈ iscawil; yebpaxo ebnaj juẍta ay isc'atan̈ ebnaj. 15Halwe tet juẍta Filólogo yeb janab Julia yeb tet juẍta Nereo, yeb tet yanab naj, yeb tet janab Olimpas, ta chil isba yebpaxo tet sunil ebnaj juẍtaj yeb ebix janab ay isc'atan̈ ebnaj. 16K'ambele hanic' heye hununex yin̈ sunil heyanma yin̈ caw tzalahilal. Chalnipaxto sunil yuninal Comam Dios ay yul hunun con̈ob ay bey ti' ta cheyil heba yin̈ hecawil. 17Hex wuẍtaj hex wanab, caw cheyil heba tet ebnaj choche yak'aco pohlebahil texol, yeb choche quexyak'a ayc'ayoj. Ha' huntek'an chu ebnaj tu' mach chischah isba yeb cuybanile chabilxa heyu. Huntek'an ebnaj tu' mach chechah ebnaj texol. 18Yuto maẍtaj tet Comam Jesucristo chisyije ebnaj, walxinto ha' tzet choche isc'ul ebnaj ha' chissayic'oj. Caw c'ulch'an chute istzotel ebnaj yun̈e yak'ni subchaho ebnaj anma mach caw yitz'atil iswi'. 19Caw sunil mac ohtan̈e tato caw yijemex, yuxin caw chintzalahan teyin̈. Chiwochehan ta helan cheyute heba yin̈ isc'ulal, maẍtaj yin̈ istx'ojal. 20Ha' Comam Dios yahaw ak'anc'ulal, chicolwa teyin̈ hek'oji yin̈ naj matzwalil yin̈ an̈e, cat iscan naj yalan̈ heyoj. Ha'ojab Comam Jesucristo chianayo isc'ulal teyiban̈. 21Chalto naj juẍta Timoteo ta cheyil heba, naj juẍta ti' caw wet munlawomalan naj yin̈ ismunil Comam Dios. Chalnipaxto juẍta Lucio yeb juẍta Jasón yeb juẍta Sosípater ta cheyil heba; ebnaj juẍta ti' wet con̈ob inbahan ye ebnaj. 22Haquinpaxtu'an hanin Tercio inti'an, chink'ambepaxtojan hanic' heye yin̈ hecawil, yin̈ yet Comam. Haninan lan̈an intz'ibn̈entojan hune' carta ti' yu naj Pablo. 23Chalnipaxto juẍta Gayo ta cheyil heba, yul yatut juẍta ti' ayon̈an̈. Ha' bey ti' xin chicocutxbapaxo cobahan̈ yin̈ culto yeb sunil macta ayxaco yul isk'ab Comam Jesucristo. Chalnipaxto naj juẍta Erasto ta cheyil heba, naj juẍta ti' tesorero naj yul con̈ob ti'. Chalnipaxto juẍta Cuarto ta cheyil heba. 24Yak'abayo Comam Jesucristo isc'ulch'anil isc'ul teyiban̈. ¡Hacojab tu'! 25K'anweco ismay Comam Dios, Comam chu quexislin̈ban haca' yalni Tzoti' c'ul yet colbanile walic'ojan yin̈ Comam Jesucristo. Hune' cuybanile ti' ewantic'a yehi yettaxtic'a maẍto chiwatx'i yul sat yiban̈k'inal ti' yu Comam Dios. 26Yaja' wal tinan̈ xin xayak' Comam ohtan̈elaxoj yu tzet tz'ibn̈ebilcano yu ebnaj ischejab Comam yet payat, haca'tic'a yu yalni Comam, Comam ayn̈etic'a yin̈ sunilbal tiempo. Hune' Tzoti' yet colbanile ewantic'a ye ti', xaak'lax yohtan̈elo sunil anma yun̈e yanayto yul yanma cat isyijeni. 27Yu tzet iswatx'e Comam Jesucristo yuxin alaxojabico ismay Comam Dios yin̈ sunilbal tiempo, Comam hune'n̈ech'an yeb caw ay ishelanil. ¡Hacojab tu'!

will be added

X\