ROMANOS 16

1Chin tak'e ya' janab' Febe teyetan. Ya' ti' caw xmunla b'oj iglesia ay yul con̈ob' Cencrea. 2Xahan cheyil ya' haxca jetb'i ya' yin̈ Comam Jahaw, haca' yet ay juni hayon̈ ayon̈xacoj yin̈ Comam ti'. Colwaan̈wej yin̈ ya', haxca tx'ihal b'ay xcolwa ya' yin̈ heb'ya', b'oj win̈an. 3A'wej scawil ya' Priscila b'oj ya' Aquila, ẍwet munla yin̈ smunil Comam Cristo Jesúsan. 4Heb'ya' ti', shin sb'a heb'ya' scam yu hin scolnian, matn̈e hayinoj ẍwa' yuch'antioẍ tet heb'ya'an, to hasta heb'ya' ayxacoj yin̈ Comam mat israeloj ay yul hunun iglesia ch'ani pax yuch'antioẍ tet heb'ya'. 5Ẍwapaxtoj scawil heb'ya' jetb'i syamb'a sb'a yul yatut heb'ya' ẍwal ti'an. A'wejpax scawil ya' Epeneto caw xahan ay wuan, ya' ti' b'ab'el xa' yuluj sc'ul yin̈ Comam b'et Asia. 6A'wej scawil ya' María, ya' ti' caw xmunla te xol. 7A'wejpax scawil heb'ya' wetcon̈ob'an, ya' Andrónico b'oj ya' Junias. Heb'ya' ti' xwet oc presuan, caw c'ul x'elicoj heb'ya' xol heb'ya' apóstol. Ayxatic'acoj heb'ya' yin̈ Comam yet xquin ocan. 8A'wej scawil ya' Amplias. Ya' ti' caw xahan ay ya' wuan, ayxacoj ya' yin̈ Comam Jahaw. 9A'wej scawil ya' Urbano, ya' caw jetb'i yin̈ smunil Comam Cristo, b'oj ya' Estaquis caw xahan ay wuan. 10A'wej scawil ya' Apeles, ya' ti' xax ec' ya' yin̈ ilweb'al sya'iloj Comam Cristo. A'wej scawil ya' Aristóbulo b'oj heb'ya' ay yatut ya'. 11A'wej scawil ya' Herodión wetcon̈ob'an, b'oj ya' Narciso b'oj heb'ya' ay yatut ya'. 12A'wej scawil ya' Trifena b'oj ya' Trifosa, heb'ya' ti' caw ẍmunla yin̈ smunil Comam Jahaw, hactu' ya' Pérsida caw xahan ay wuan, ya' ti' caw xax munla yin̈ smunil Comam. 13A'wej scawil ya' Rufo, ya' sic'leb'il yu Comam Jahaw. Cheya'a' pax scawil smi' ya', haxca ya' ti' haca' hin mi' ye ya'an. 14A'wej scawil ya' Asíncrito, ya' Flegonte, ya' Hermes, ya' Patrobas, ya' Hermas b'oj heb'ya' jetb'i ay sc'atan̈ heb'ya'. 15A'wej pax scawil ya' Filólogo b'oj ya' Julia, ya' Nereo b'oj yanab', ya' Olimpas, b'oj sunil heb'ya' jetb'i ay sc'atan̈ heb'ya'. 16Yet che yamb'an he b'a a'wej scawil he c'ul hununex yin̈ tzalalal. Sunil yiglesia Comam Cristo ch'anitoj he cawil. 17Hex wuẍtaj, hex wanab', ẍwal teyetan ta nann̈e heyu tet mac chal hex pohnojtoj b'oj chex lectantoj yalni, chex scuyni yin̈ hune' cuywab'al mat lahanoj b'oj cuywab'al xax a'lax teyet. Mache chacoj hunk'aan anma tu' te xol. 18Haxca mataj Comam Jahaw Cristo lan̈an syijyeni, to ha' b'aytet choche snimanil ha' syijye. Caw ay smon stzoteli, caw c'ulch'an yalni yun̈e sub'cha anma hacn̈eti' ye sc'ul yu. 19Sunil mac ohtajn̈e ta caw yijyomex, yuxin caw chin tzala teyin̈an. Ẍwochean ta ay he helanil heyuni hej tzetet c'ul, yaja' mache yu hej tzetet tx'oj. 20Ha' Comam Dios ch'a'ni ak'anc'ulal, ha' ch'anojayoj naj matzwalil yin̈ lemb'il yalan̈ heyoj. Ya'ab' Jahaw Jesús sc'ulch'anil sc'ul teyet. 21Chatoj ya' Timoteo he cawil, ya' ẍwet munlaan, b'oj ya' Lucio, ya' Jasón, ya' Sosípater. Wetcon̈ob' heb'ya' ti'an. 22Hayin Tercio hin ti', lan̈an hin tz'ib'n̈en hune' carta ti' yu ya' Pabloan, ẍwapaxtoj he cawil yin̈ Comam Jahawan. 23Chatoj ya' Gayo he cawil. Yatut ya' ti' ayinan, b'oj hat ẍco yamb'a co b'a b'oj hantaj heb'ya' ayxacoj yin̈ Comam. Chapaxtoj ya' Erasto he cawil, ya' c'ub'aom melyu ay yul con̈ob' ti', b'oj ya' juẍtaj Cuarto. 24- 25Jala' tzoti' c'ul smayoj Comam Dios, haxca chu hex slin̈b'an Comam haca' yalni cuywab'al yet tzoti' c'ul ẍwalic'oj yalb'aniloj Comam Jesucristoan. Hune' ti' ewantic'a ye yu Comam Dios yalan̈to maxto ẍwatx'i satyib'an̈k'inal ti'. 26Yaja' tinan̈ xax alaxiltij yin̈ hab'an, yu hej tzetet tz'ib'n̈eb'ilcan yu heb'ya' schejab'lom Comam Dios. Yu schejb'anil Comam mach stan̈b'al, ch'a'lax tzoti' c'ul yohtajn̈e' sunil hej con̈ob', yun̈e ya'ni yuluj sc'ul cat syijyeni. 27Yu Comam Jesucristo hal-laxojab' tzoti' c'ul yin̈ stohb'alk'inal yin̈ Comam Dios, han̈c'a Dios b'oj caw tz'ajan sc'ul. Amén.


Copyright
Learn More

will be added

X\