ROMANOS 15

1Han̈on̈ ayxa yip janma yin̈ Comam machojabn̈etaj han̈on̈ chijaco coba yin̈ coc'ul, wal xin yilal cocolwa yin̈ mac maẍto caw t'in̈ano yecoj. 2Hununon̈ ti' ha'ojab isc'ulal chicowatx'e yin̈ macta ayxaco yul isk'ab Comam Dios, hac tu' xin chitzala isc'ul yin̈ Comam yeb yun̈e yik'ni yip yanma yin̈ yet Comam. 3Haca' Comam Jesucristo, maẍtaj tzet yoche Comam iswatx'e, walxinto yij isba yin̈ Comam tzet tz'ibn̈ebilcanoj bay chala: “Hayet habuchlaxi, haninan wabenan isya'il,” ẍiayoj. 4Sunil tzet tz'ibn̈ebilcano yul Yum Comam Dios yet payat, cocuybanil yu istz'ibn̈elaxcanoj, chak'ni isnimanil coc'ul yeb yak'lobal janma, yun̈e janico Comam yipo janma. 5Ha'ojab Comam Dios, Comam chiak'ni isnimanil coc'ul yeb yak'lobal janma chicolwa teyin̈, haxinwal hunxan̈e tzet chiec' yin̈ henabal haca' Comam Jesucristo. 6Hac tu' xin hunxan̈e cheyute heba cat hebitn̈en isbi Comam Dios, Ismam Comam Jesucristo Jahawil. 7Yuxin macta ayxaco yul isk'ab Comam Dios chahwe texol, haca' yu quexischahni Comam Cristo yu heyanico ismay Comam Dios. 8Chiwalan hune' ti' teyet tato hul Comam Jesucristo yak'aco isba ischejabo anma Israel, yun̈e yijni isba tzet haltebilcano yu Comam Dios tet jichmaman̈. Hac tu' yu isyenipaxilo Comam Cristo tato caw chij isba tzet chalte Comam Dios. 9Yeb xin hulpaxo Comam Cristo, yun̈e yanipaxico anma mach Israelo ismay Comam Dios yu isc'ulch'anil isc'ul Comam, haca' yalni yul Yum Comam bay chala: Yuxin chiwalan c'ulla tzoti' tawin̈ yu yoc hamay yulaj con̈ob yu anma mach Israeloj, cat inbitn̈enan habi, ẍiayoj. 10Ay hune' bay chalpaxo yul Yum Comam Dios: Tzalahan̈we hex mach Israelo hex ti' yinta iscon̈ob Comam Dios, ẍiayoj. 11Ay hune'xa bay chalpaxoj: Sunil nimeta con̈ob yeb niẍte con̈ob bay ay anma mach Israeloj, bitn̈elaxojab Comam Dios yu, ẍi. 12Tz'ibn̈ebilpaxcanayo yu naj Isaías: Chipitzc'a hune' naj chitit yin̈ yuninal naj Isaí, cat yoc yahawo yin̈ anma mach Israeloj. Yin̈ naj xin chicawxi isc'ul anma tu', ẍi. 13Ha'ojab Comam Dios, Comam ch'ak'ni iscawxobal janma, ha' ch'ak'ni tzalahilal yeb ak'anc'ulal teyet, hex cheyayto yul heyanma yin̈ Comam; cat cam yak'nipaxo Comam Espíritu Santo iscawxobal hec'ul. 14Hex wuẍtaj hex wanab caw wohtajan sic'lebil ta caw c'ulch'an hec'ul teyin̈ hununex, yeb xin caw aypaxo hehelanil, caw xin heyohtapaxo hecuyni heba hununex. 15Yaja' yin̈ hune' carta ti' ay huntek'an tzet ye tu' ayayo wuhan chiwaltojan teyet yin̈ sunil wanmahan yun̈e mach chenahuln̈etoj. Chiwaltojan huntek'an ti' teyet yuto ha' Comam Dios ak'n̈e hune' inmunilti'an yu isc'ulch'anil isc'ul. 16Ischejab Comam Jesucristo wecojan xol anma mach Israeloj, ha' inmunilan xin ha' ton walnic'ojan Tzoti' c'ul yet colbanile chalte Comam Dios, yun̈e yaltelax anma mach Israelo tet Comam haca' hunu xahanbal caw chitzala Comam yin̈, sajn̈ebilxa yu Comam Espíritu Santo. 17Wal xin yu caw ayinxacojan yul isk'ab Comam Jesucristo yuxin caw chintzalahan yin̈ inmunilan ak'bil yu Comam Dios. 18Mach chu walnihan yin̈ tzet chu ismunla hunuxa mac yin̈ ismunil Comam, to han̈c'an̈e yin̈ tzet chu quinisk'annihan Comam Cristo yin̈ inmunilan chiiniti anma mach Israelo yin̈ isyijen tzet chal Comam Dios, han̈e chiwalan. Hune' ti' yij isba yin̈ tzet walan yeb yin̈ tzet inwatx'ehan, 19yeb yu yip tzettaj inyehan, yeb yu yip c'aybalc'ule, yeb yu yip Comam Espíritu Santo; hac tu' yu inyijenan yin̈ caw c'ul walnic'ojan Tzoti' yet colbanile yin̈ Comam Cristo. Hata bey yul con̈ob Jerusalén quinichicojan walnic'ojan; caw sunil bay quinec'an wala'c'ojan masanta quinapnihan yul ismajul tx'otx' Iliria. 20Hac tu' yu wanico yin̈ inc'ulan winitojan Tzoti' yet colbanile bay maẍtotic'a chiabelax isbina isbi Comam Jesucristo, yun̈e machi hunu mac chihalni ta toxan̈e quinec'an inlaha'an munil tzabilxacoj. 21Yul Yum Comam Dios tz'ibn̈ebilcanoj: Chiyila' anma hune' mac maẍtotic'a bay chiabelax isk'umal. Mac maẍtotic'a bay chabe istzoti'al chitxumchalo yu, ẍiayoj. 22Yuxin maẍtotic'a chu intohan quexwila'an, waxan̈ca xin tx'i'alxa el chiwochehan intohan. 23Yaja' wal tinan̈ xin xalahwi inmunilan yul huntek'an con̈ob ti'. Caw tx'i'alxa habil yichi wochenan intohan quexwilnojan. 24Yuxin hayet chintohan yin̈ inbelan bey España cat wec'an quexwilnojan, lahwi istzala wanmahan quexwilnihan yin̈ hayebo tz'ayic xin, chiwochehan tato chexcolwa win̈an inlahnihan inbeltu'an. 25Yaja' wal tinan̈ xin chintohan bey Jerusalén wak'a'canojan hanic' ch'en melyu chicolwa yin̈ ebnaj juẍta ay bey Jerusalén tu'. 26Yuto ebnaj juẍta yeb ebix janab ay bey Macedonia yeb ay bey Acaya ti', el yin̈ isc'ul iscutxbanayo hanic' ch'en melyu, cat yilaxto ch'en tet anma meba' ayxaco yul isk'ab Comam bey Jerusalén. 27Caw el yin̈ yanma ebnaj iscutxbanayo ch'en; hune' ti' caw c'ul yuto haca'tic'a yu yak'ni ebnaj juẍta Israel isc'ulal Comam tet ebnaj mach Israeloj, hac tu' xin chu ispajtzen ebnaj yin̈ tzet ay tet ebnaj juẍta Israel tu'. 28Yuxin chito yijcano isba hune' inchejbanilti'an intohan wak'nocanojan ch'en melyu chicolwa yin̈ ebnaj juẍta tu', lahwi tu' cat wec'an quexwilnojan yet chintohan bey España. 29Ayco yin̈ wanmahan ta hayet chinec'an texol, tx'i'al isc'ulal Comam Cristo chiyak'cano jet. 30Hex wuẍtaj hex wanab, caw chink'anan teyet yin̈ isbi Comam Jesucristo yeb yu isc'ulch'anil isc'ul Comam Espíritu Santo tato cheyaco yin̈ hec'ul hecolwa hetxahli win̈an tet Comam Dios. 31K'anwe tet Comam Dios, haxinwal chiniscolan Comam tet ebnaj ah Judea mach chayto yul yanma yin̈ Comam, yebpaxo xin yun̈e c'ul chu ischahni ebnaj juẍta ay bey Jerusalén hune' colwal chiwitoti'an. 32K'anwepaxo tet Comam haxinwal ta hac tu' chiel yin̈ isc'ul Comam chinapnihan quexwila'an cat inxewninojan texol yin̈ tzalahilal. 33Ha'ojab Comam yahaw ak'anc'ulal chioc heyetbihoj. ¡Hacojab tu'!

will be added

X\