ROMANOS 15

1Hayon̈ xax con̈ yihlan yin̈ johtajn̈en Comam Dios, mat hayon̈ojn̈e ẍjacoj co b'a yin̈ co c'ul, yilal co colwa yin̈ mac maxto ẍyihlan yin̈ yohtajn̈en Comam. 2Ha' jet, jub' b'aytet choche heb'ya' jetb'i yu sc'ulaloj yet, yun̈e cam syihlan yohtajn̈en Comam Dios. 3Haxca hactu' xa'le Comam Cristo, mataj b'aytet chal sc'ul ha' xu. Ha' yet, to xij sb'a yin̈ tzet chal Yum Comam Dios chalni: Yet xalni anma tx'oj tawin̈ Mamin, hayin xwab'e sya'ilan. 4Sunil tzet stz'ib'n̈elaxcan yul Yum Comam Dios yet payxa, co cuyb'aniloj xu stz'ib'n̈elaxi. Yun̈e yet ẍjab'en tzet xu stecha yu anma yet payxa b'oj tzet xu scolwa Comam Dios yin̈ heb'jetb'i, ha' ch'a'ni scawxob'al co c'ul yin̈ Comam Dios to hactu' scolwaoj Comam jin̈. 5Comam Dios ch'a'ni snimanil co c'ul b'oj yak'lob'al co c'ul. Chin k'an tet Comaman ta ẍcolwa teyin̈ yun̈e lahan heyalni he hunil, chex ec' heyi'noj tzet xu Comam Cristo Jesús, 6haxin̈wal hune'xan̈e ẍjute co b'a ẍjalni tzoti' c'ul tet Comam Dios, Smam Jahaw Jesucristo. 7Yuxin nawejtoj heb'ya' heyetb'i' haca' xu hon̈ snanitoj Comam Cristo smayoj Comam Dios. 8Ha' hune' ti' ẍwal teyetan, to Comam Cristo xhul colwaoj yin̈ anma israel yun̈e syeni Comam to chij sb'a tzet halteb'ilcan yu Comam Dios tet heb'ya' jichmam. 9B'oj xhul Comam Cristo yun̈e chu yanicoj anma mat israeloj smay Comam Dios haxca stz'a' sc'ul Comam yin̈ heb'jetb'i. Hactu' yalni Yum Comam: Ẍwala' tzoti' c'ul ha mayoj xol anma mat israelojan, chach hin b'itn̈enojtojan. 10Chalayoj yin̈ hune'xa: Tzalaan̈wej hex mat hex israeloj, hunb'awejcoj he b'a yin̈ scon̈ob' Comam Dios yin̈ tzalalal. 11Ay hune'xa b'ay chalayoj: Te hunilex hex mat israeloj ti', halwej tzoti' c'ul smayoj Comam Jahaw, sunil hej con̈ob' ya'ab'coj smay Comam. 12Ay hune'xa stz'ib'n̈e ya' Isaías schejab'lom Comam Dios, chalni: Ẍpitzc'aoj hune' yic'al ya' Isaí, cat yocoj Yahawoj yin̈ anma mat israeloj. Yin̈ hune' tu' ẍcawxoj sc'ul anma mat israeloj tu'. 13Chin k'an tet Comam Dios ch'a'ni scawxob'al co c'ulan ta cha' hune' niman tzalalal yin̈ heyanma. Machca ninoj ẍcab'con he c'ul hex cheya' yuluj he c'ul yin̈ Comam, yun̈e ẍcam ya' Comam Espíritu Santo scawxob'al he c'ul. 14Hex wuẍtaj, hex wanab', wohtajan ta caw ay sc'ulal he c'ul, caw heyohtajxa scuywab'al Comam b'oj helan hex he cuyquentoj he b'a hununex. 15Yin̈ hune' wum ẍwatoj ti'an, mach hin nanon walni st'in̈anil teyet yin̈ hej tzetet chin tz'ib'n̈ean, yun̈e mache nahuln̈etoj. Ẍwal hunk'aan ti' teyet yu hin chejb'anil xa' Comam wet yu sc'ulal sc'ulan. 16Hune' chejb'anil xa' Comam wet ti'an, yu woc schejab'oj Comam Cristo Jesús xol anma mat israelojan, yin̈ walnic'oj hune' tzoti' yet colb'anil chalte Comam. Choche Comam ta ẍwalte anma mat israeloj tet Comam, haca' xu yalten heb'naj sacerdote xahanb'al. Ha' hune' tzet xwalte ti'an, scha Comam Dios haxca Comam Espíritu Santo ch'anicoj yetoj Comam. 17Haxca ayinxacoj yin̈ Comam Cristo Jesúsan, sunil hin c'ulan ẍwalnian to ay yelapnoj ye hune' munil xa' Comam Dios wub' ti'an. 18Mach hin ti'n̈e hin b'a walnian tzet xu smunla hunujxa anma yin̈ smunil Comam Dios, to han̈c'a tzet xu hin sk'anni Comam Cristo yin̈ hune' munil x'initij anma mat israeloj yin̈ syijyen tzet chal Comam Dios, ha' ẍwalan. Xij sb'a hune' ti' yu tzet xwalan, 19b'oj yu hunk'aan c'ayb'alc'ule xyeniloj scan̈il ye Comam Espíritu xwu xol anmaan. Tz'ajan xu winitij tzoti' c'ul yet colb'anil xa' Comam Cristoan. Xquin ichitij yul con̈ob' Jerusalénan sunil b'ay xquin ec'an masanto xquin apni b'et Iliriaan. 20Hactu' xu wa'ni yilal winitoj tzoti' yet colb'anil b'ay maẍtic'a ninoj xhal-lax stzoti'al Comam Cristo, yun̈e mach ẍhal-laxi ta b'ay xax munla hunuj anma toxan̈e chin to wa'acoj hin b'a yahawojan. 21Haxca chal Yum Comam: Mactaj maẍto ch'ab'en sk'umal ẍto yila', mactaj maẍto ch'ab'en stzoti'al, xtxumu'can̈ 22- 23Shab'ilalxa aycoj yin̈ hin c'ul hin to hex wilnojan, yaja' yu munil lan̈an walni teyet ti'an, mach xu hin toan. Yaja' wal tinan̈ xax lahwi hin munil yul hunk'aan con̈ob' ti'an, 24yuxin ya' mi ta chu wec'oj te c'atan̈an yet chin toj Españaan. Lawi wehojc'oj hun cab'oj tz'ayic yin̈ tzalalal b'oj hexan, ẍwochean ta chex colwa hanic'oj yin̈ yet hin b'ehan. 25Yaja' wal tinan̈ chin to Jerusalénan, ay ch'en yam melyu xcutxi yu heb'ya' jetb'i ay b'eti' chin to wa'a' tet heb'ya' ay Jerusalén tu'an. 26Haxca heb'ya' jetb'i ay b'et Macedonia ti' b'oj Acaya, x'el yin̈ sc'ul heb'ya' syamni chub'il ch'en melyu ẍto tet heb'ya' jetb'i meb'a' ay yul con̈ob' Jerusalén. 27X'el yin̈ sc'ul heb'ya' scolwayi. K'a' c'ul ta hactu' xute heb'ya', haxca haca' xu ya'ni heb'ya' israel hej tzetet yet Comam Dios tet heb'ya', hactu' chu ya'ni pax heb'ya' mat israeloj tu' hej tzetet ch'ocnicoj yu heb'ya' jetb'i israel. 28Yuxin lawi yijnojcan sb'a wanojc'oj sunil ch'en yam melyu tu'an, lawitu' cat hin toj Españaan, ha' tu' chin ec'oj hex wilnojan. 29Ẍcawxi hin c'ul yin̈ Comaman, to yet chin ec'oj tu'an tz'ajan cha'a' Comam sc'ulch'anil sc'ul teyet. 30Hex wuẍtaj, hex wanab', haxca hun je b'oj Jahaw Jesucristo, b'oj yu ẍjoche co b'a yu Comam Espíritu, yuxin chin k'an teyetan ta chex colwa win̈an, caw sunil he c'ul cheya'ni heyoración tet Comam Dios wuan. 31K'anwej tet Comam Dios ta chin scol Comam tet heb'naj ah Judea paq'uinajc'oj yin̈ Comam, b'oj ya' mi ta schab' swi' heb'ya' jetb'i ay Jerusalén hune' yam melyu ẍwitoj ti'an. 32Ta hactu', chin apni te c'atan̈an ta ch'el yin̈ sc'ul Comam, haxin̈wal yin̈ tzalalal chin xew te c'atan̈an. 33Comam Dios Yahaw ak'anc'ulal, aycoj teyin̈ te hunil yala'. Amén.


Copyright
Learn More

will be added

X\