1 Chahwe mac maẍto yip yanma yin̈ Comam texol. Mach chebuch heba yebi. 2 Yuto ay mac yohtaj tato chu coloni sunil tzettaj ye tu', aypaxo xin ebnaj juẍta chito cabcon yanma isloni sunil tzettaj ye tu', yuxin itahn̈e chislo. 3 Wal xin ha' mac chiloni sunil tzettaj ye tu' machojab chisyah mac mach chiloni sunil tzettaj ye tu'. Haxa mac mach chiloni sunil tzettaj ye tu', machojab chal isk'umal mac chiloni sunil tzettaj ye tu', yuto ha' hune' mac tu' chabilxa Comam yu. 4 K'inalo tinan̈ ta ay hunu naj chimunla yinta ispatrón, ¿tom ay joc jalni isk'umal naj munlawom tu'? ¡Machoj! Wal xin han̈c'an̈e naj ispatrón naj tu' chalni ta c'ul naj maca machoj. Hac tu' je yul sat Comam Dios, c'ul chon̈elicoj yuto ay yip Comam con̈iswatx'enico yin̈ isc'ulal. 5 Aypaxo xin mac ti' chalni tato ay tz'ayic ec'bal yelapno yiban̈ hunuxa tz'ayic, aypaxo mac chalni tato lahann̈e yelapno sunil tz'ayic; wal xin t'in̈anojab jecoj yin̈ tzet chicowatx'e. 6 Yuxin ha' mac chiyijen hunu tz'ayic ha' tet Comam chisyije, hacpax tu' mac mach chiyijen hunu tz'ayic, yu Comam yuxin mach chisyije. Hacpax tu' xin mac chiloni sunil tzet ye tu', yu yanico ismay Comam yuxin chislo, chak'ni yuch'andiosal tet Comam Dios yin̈ tzet chislo. Hacpax tu' mac mach chiloni sunil tzet ye tu', yu yanico ismay Comam yuxin mach chislo, chak'nipaxo yuch'andiosal tet Comam. 7 Yulbal yet itzitzon̈, mach jeto coba cochuquil, hacpax tu' yet chon̈cami mach jeto coba. 8 Ta itzitzon̈ yul sat yiban̈k'inal ti' to yu coyijen tzet chal Comam; taca chon̈cam xin yettic'apaxo Comam jehi. Yuxin waxan̈ca itzitzon̈ maca chon̈cami, yet Comam jehi. 9 Yuxin cam Comam Jesucristo, yitzitzibican̈ hunelxa yu yoc Comam Yahawil yin̈ anma camom yeb anma itzitz. 10 Yuxin mach chu jalni isk'umal maca coyahni hunu juẍtaj maca hunu janab, yuto cosunil chon̈oc sata Comam cat yilni Comam yin̈ tzet chon̈elicoj. 11 Chal yul Yum Comam Dios: Hanin yahaw inti'an, chiwak' binaho inbihan yin̈ tzet chiwalti'an tato sunil anma chihul insatajan, yeb sunil mac yilal yalni yu isti' ta haninn̈ech'anan Dios hinan, ẍiayoj. 12 Yuxin sunilon̈ chon̈oc sata Comam Dios cat jalni yin̈ tzet chicowatx'e hununon̈. 13 Yuxin mach chu heyalni hek'umal hununex, wal xin aweco yin̈ hec'ul hewatx'en isc'ulal, haxinwal machi hunu mac cheyak' ayc'ayoj, cat issomchacanto isnabal heyu. 14 Haninti'an caw wohtajan tato machi hunu tzet chilolax ti' ayco istx'ojal yin̈, caw t'in̈an wehan yin̈ hune' ti' yuto yuninalxa Comam Jesucristo wehan. Yaja' tato ay hunu mac chitxumni tato ayco istx'ojal yin̈ hunu tzet ye tu', tx'oj isloni chal tu'. 15 Yuxin ta yu tzet chelo cheyak' taco isc'ul hunu ebnaj juẍtaj, ha' chal yelapno tu' mach xahano cheyil heba. ¡Machojab taj yu tzet chelo cheyak' ayc'ayo hunu maca, yuto ha' hune' mac tu' bay yak' camo isba Comam Jesús! 16 Machojab cheyak' yub anma istzotel teyin̈ yu tzet chewatx'e. 17 Han̈on̈ ayon̈xaco yul isk'ab Comam Dios mach chiyoc yin̈ tzet chicolo maca tzet chijuc'u, wal xin ha' jec' yin̈ istoholal, yeb jec' yin̈ ak'anc'ulal, yeb yin̈ tzalahilal yu Comam Espíritu Santo. 18 Ha' mac chiyijen tet Comam Cristo haca' tu', chitzala Comam Dios yin̈, caw c'ulpaxo hune' mac tu' yul sat anma. 19 Yuxin colahaweco cowatx'en tzet chon̈anico yin̈ ak'anc'ulal, hac tu' chu cocolwa jin̈ hununon̈ yin̈ coch'ib yin̈ yet Comam. 20 Machojab cheyak' etaxoto ismunil Comam Dios yu tzet chelo. Yin̈ caw isyelal sunil tzet chilolaxi mach istx'ojal ayco yin̈. Ha' istx'ojal, ha' coloni hunu tzet ye tu' chiak'ni cabconocan̈ yanma hunu mac yin̈ Comam. 21 Ec'balto c'ul ta mach chicoc'ux no' chibe maca juc'ni vino maca hunuxa tzet ye tu' sata jak'ni ayc'ayo hunuxa juẍtaj. 22 Ha' tzet cheyayto yul heyanma, t'in̈anojab heye yin̈ yul sat Comam Dios. ¡Sak'al yet mac mach chicabcon isc'ul yin̈ tzet chiswatxe'! 23 Yaja' wal mac chicabcon yanma isloni hunu tzet ye tu', hayet chisloni chaco ismul, yuto mach yin̈ sunilo yanma chisloni. Yuxin ta mach t'in̈ano jeco yin̈ tzet chicowatx'e, chijaco comul.
