ROMANOS 13

1Yijyom ẍjute co b'a co hunil tet heb'naj ab'ilcoj yahawoj aycoj co xol ti'. Haxca mach hunuj heb'naj ta mataj Comam Dios an̈ecoj, yuxin sunil heb'naj tu' ha' Comam an̈ecanoj heb'naj. 2Mac ẍpaq'uic'oj yin̈ heb'naj, lan̈an spaq'uic'oj yin̈ Comam Dios chaltu'. Mac ẍpaq'uic'oj tu' ch'a'laxoj sya'tajil tet, 3haxca heb'naj yahaw ab'ilcoj co xol ti', mat yuuj ya'ni xiwoj anma c'ul, yuxin aycoj heb'naj, to yu ya'ni heb'naj tz'aoj sat anma tx'oj, yuxin aycoj heb'naj. Yuxin ta mach sje co c'ul chon̈ ya' xiwoj heb'naj, c'ul ẍjute co b'a, waltu' c'ul chala' heb'naj jin̈. 4Aycoj heb'naj yin̈ smunil Comam Dios yu sc'ulaloj jet. Yaja' ta tx'oj ẍju, yet ay co xiwi, haxca ab'il schejb'anil heb'naj ya'ni tz'aoj sat anma tx'oj chu. 5Yuxin co yijye' tzet chal heb'naj tu'. Matoj yun̈e chon̈ xiw ya'ni heb'naj tz'aoj co sat, machoj, to hactu' choche Comam Dios ta chu co yijyeni. 6Yuxin chon̈ tohlawi tet heb'naj aycoj yahawoj tu' haxca ab'ilcoj heb'naj yu Comam Dios yun̈e stan̈en heb'naj con̈ob'. 7Yet sk'anni heb'naj ch'en melyu jet haca' yalni ley, yilal ja'ni ch'en, wal co tohlan co tohlab'al, mato hunuj tzetet ẍco tohla' haca' yalni ley, co tohla'. Ta yet ay co yijyen tzet chal heb'naj, co yijye' chaltu', mac yet ay janicoj smay, ja'a'coj smay. 8Machu co can c'as tet hunuj maca. Yaja' ay hune' co c'as mach stan̈b'al yin̈ tzet chu co xahann̈en co b'a hununon̈. Ta hactu' ẍjute co b'a lan̈an co yijyen sunil sley Comam Dios, chaltu'. 9Hej mandamiento ẍhalni: Machex ixli, mache say he winaj, machex potx'wayi, machex elk'ani, machca cheyochetoj tzet ay heyet-anmail, ẍi. Hunk'aan mandamiento ti' b'oj hunk'aanxa hune'xan̈e ch'elicoj chalni: Haca' he yan̈en he b'a, hactu' he xahann̈en mactaj aycoj he cawilal. 10Mac yeli xahann̈en mactaj ay scawilal haca' syan̈en sb'a, mach tx'oj chu yin̈. Yuxin yet xahan ẍjil mactaj ay co cawilal, stz'ajan ẍco yijye ley. 11Ilwejc'anab' tzet jewejcoj tinan̈. Yetwanojxa snani sb'a co c'ul, haca' yel co wayan̈ yin̈ co sat. Haxca b'elay k'a' cawilxa yetij b'ay chul Scolomal jet sataj yet ichi ja'ni yuluj co c'ul. 12Tinan̈ haca' xol sk'ejholo ayon̈coj, yaja' yet chuluj Comam haca' tz'ayicalil chub'. Yaja' tinan̈ sutanon̈xacoj, haxca toxa chuluj Comam. Yuxin co b'eja'can juni hej tzetet tx'oj chu anma aytocoj xol sk'ejalholo, cat ja'ni itz'at co b'a jec' yin̈ sajilk'inal haca' hune' naj soldado ch'a'ni itz'at sch'en yet ẍto yin̈ howal. 13C'ul chu jehc'oj haca' anma ch'ec' yet tz'ayicalil. Machon̈ ec' yin̈ uc'u te', ni ec'tze' nimej k'in̈, mach'ec' heb'naj winaj ixloj, ni sayni pax heb'ix ix swinaj, mach ẍjutewej tzetet tx'ixwub'al. Mach jacoj howal co xol ni ẍchiwacoj co c'ul yin̈ jetb'i. 14To ha' jet, yilal co colni co b'a yin̈ Comam Jahaw Jesucristo, haca' scolni sb'a hune' naj soldado yu hune' pajb'al ch'en chacoj yin̈, matxa ẍjacoj janma yin̈ hej tzetet tx'oj chochetoj co nimanil.


Copyright
Learn More

will be added

X\