ROMANOS 12

1Hex wuẍtaj hex wanab, caw chink'anan teyet yu isc'ulch'anil isc'ul Comam Dios xayak' jet, tato cheyaco heba yul isk'ab Comam haca' hunu xahanbal itzitz chi'ak'lax tet Comam. Ta chijaco coba yul isk'ab Comam haca' tu', yetxan̈e Comam chiju, caw chitzalapaxo Comam jin̈. Hac tu' chu jinayo coba tet Comam. 2Machojab chebeybaln̈e haca' isnabal anma yul sat yiban̈k'inal ti', wal xin helwe henabal haxinwal chiac'bilo sunil hebeybal. Hac tu' xin chu heyohtan̈enilo tzet choche Comam; huntek'an isc'ulal yeb huntek'an chitzala Comam yin̈, yeb huntek'an tz'ajan lahan yehi. 3Ha' Comam an̈eco hune' munil ti' yul ink'aban yuxin chiwalan teyet tato machojab hunujex chexec'banli hetxumnico teyin̈ yiban̈ tzet chak' Comam hetxumu'. Walxinto ha' heyet, txumwej tzet munilal xayak' Comam teyet hatatic'a yip heyanma chak' Comam. 4Haca'tic'a ye conimanil tinan̈, caw tx'i'al yik'ni isba, yaja' nananta ismunil hunun. 5Hac tu' xin je han̈on̈ ti' yin̈ Comam, waxan̈ca caw tx'i'alon̈, yaja' hune'n̈e nimanile je yin̈ Comam Jesucristo, yuxin jetbixa coba yuto hunxan̈e nimanile jehi. 6Nanantan̈e comunil yak' Comam Dios jet hununon̈, hatatic'a munil el yin̈ isc'ul Comam ha' yak' jet. Yuxin ha' mac bay yak' Comam ismunil yalnic'o Istzoti', yala'bic'oj hatatic'a yip yanma chak' Comam. 7Yeb ha' mac bay yak' Comam ismunil yin̈ iscolwahi, colwahojab yin̈ caw c'ul. Haxa mac ak'lax ismunil iscuywahi, yak'abico yin̈ isc'ul iscuywahi. 8Haxa mac ak'lax ismunil yin̈ yiptzeli, isyije'ab ismunil tu' yin̈ yiptzeli. Ha' mac chiak'ni hunu tzet ye tu' tet yet anmahil, yak'ab yin̈ sunil yanma. Haxa mac ak'lax ismunil yijbali, yin̈ojab sunil isc'ul chiijbali. Haxa mac chicolwa yin̈ mac matzet aya, yin̈ojab tzalahilal chicolwahi. 9Xahanojab cheyil heba hununex, yaja' yin̈ sunil heyanma. Yahwecano sunilal istx'ojal cat helahnico hewatx'en sunil isc'ulal. 10Xahanojab cheyil heba hununex, yuto yuninalxa Comam Dios heyehi, ec'balojab yelapno ye ebnaj juẍtaj yeb ebix janab yul hesat. 11Aweco yip heyanma, machojab isa cheyute heba, wal xin yijemojab cheyute heba tet Comam yin̈ sunil heyanma. 12Tzalahan̈we sunilbal tiempo yuto ay tzet ayco yipo heyanma. Ak'we techaho sunil isya'tajil chul teyiban̈ yeb xin mach chebej hetxahli tet Comam Dios. 13Colwahan̈we yin̈ macta yetxa Comam matzet aya. Ta ay mac chiec' tec'atan̈, c'ulojab chu hechahni. 14K'anwe isc'ulal Comam Dios yiban̈ mac chiak'ni ec'oya' heyanma, mach chetz'acti'n̈e, to ha' isc'ulal chek'an yiban̈. 15Ak'we tzalaho hec'ul yinta mac tzalahilal yehi, yeb xin ocan̈we yin̈ bisc'ulal yinta mac bisc'ulal yehi. 16Ayojab tzalahilal texol hununex. Mach cheyute heba lolo'al, wal xin utewe heba haca' anma machi yelapnoj, mach cheyute heba haca' mac chalni ta caw ay ishelanil. 17Mach cheyak' istx'ojal ispajo istx'ojal chiswatx'e anma teyin̈. Aweco yin̈ hec'ul hewatx'en isc'ulal sata sunil anma. 18Ak'we heyanma heyehic'o yin̈ ak'anc'ulal yeb sunil anma. 19Hex wuẍtaj hex wanab, hex xahan ay wuhan, machojab cheyak' istx'ojal ispaj selel tet mac chiwatx'en istx'ojal teyin̈, wal xin awecano yul isk'ab Comam Dios, ha' Comam chiak'ni ispaj selel tet mac chiwatx'en istx'ojal tu'. Yuto chal yul Yum Comam Dios: “Haninn̈ehan chu wanayojan isya'tajil yiban̈ mac chiwatx'en istx'ojal, haninn̈ehan chu inpajtzenan,” ẍi Comam Dios Jahawil, ẍiayoj. 20Chalnipaxo yul Yum Comam: “Tato chin̈ohcha hunu mac ayco ishowal tawin̈, ak' tzet chislo. Taca chitaj isti' xin, ak'paxo ha' yuc'u', haxinwal chitac isc'ul cat istx'ixwican̈,” ẍiayoj. 21Machojab chik'oji istx'ojal teyin̈, wal xin ha'ojab isc'ulal chewatx'e, haxinwal chexk'oji yin̈ istx'ojal.

will be added

X\