ROMANOS 12

1Yuxin hex wuẍtaj, hex wanab', yu hantaj sc'ulal sc'ul Comam Dios sye jet, chin k'an teyetan ta cheya' he b'a yin̈ huneln̈e yul sk'ab' Comam yin̈ itzitzal haxca yetn̈e Comam jeyi, haca' hunuj xahanb'al scha swi' Comam. Yet aya hactu' co hak'en Comam. 2Matxa haca'oj choche anma mat tzujanoj yin̈ Comam ẍjute co b'a, shelab' sb'a co nab'al haxin̈wal ch'ac'b'i co k'inal. Yin̈ hactu' chu co txumniloj tzet choche Comam Dios, ha' ch'elicoj, ha' hej tzetet c'ul, hej tzetet scha swi' Comam, hej tzetet tz'ajan lahan yeyi. 3Yu hune' munil xacoj Comam yul hin k'ab' ti'an, yuxin ẍwal pax teyetan ta mach hunuj hon̈ ẍjal co b'a can̈yeal. To chon̈ ay ni'anb'ail, ẍjohtajn̈eniloj hantaj chuapnoj ju, haca' chal sc'ul Comam cha' jet, yu scawxob'al co c'ul yin̈ Comam. 4Haxca haca' ye co nimanil ti', caw tx'ihal majan yeyi, nanan smunil hunun, 5hactu' jecoj yin̈ Comam Cristo. Waxan̈ca tx'ihalon̈, hune'n̈e nimanileal je yin̈ Comam, huninajon̈coj jin̈ hununon̈. 6Nanann̈e johtajb'al xa' Comam jet tzet chu co munlayi haca' x'el yin̈ sc'ul ya'ni jet. Yuxin mac b'ay xa' Comam shelanil yalnic'oj stzoti', yalab'c'oj hantaj chu yu haxca scawẍi sc'ul yin̈ Comam. 7Mac b'ay xa' Comam smunil scolwa yin̈ yetb'i, colwaojab' yin̈ c'ul. Mac b'ay xa' Comam smunil yin̈ scuyni yetb'i, ya'ab'coj yin̈ sc'ul scuywayi. 8Mac b'ay xa' Comam smunil yin̈ yiptzen yetb'i, yiptzeab' yetb'i tu'. Mac stz'ab'an yetb'i yin̈ tzet aya, sunil sc'ul cha'ni. Mac i'n̈e yin̈ yijb'an yetb'i yin̈ hunuj munil, sunil sc'ul ch'ijb'ali. Mac stz'a sc'ul yin̈ yet-anmail, colwaojab' yin̈ tzalalal. 9Yin̈ caw yeli, xahan ẍjil co b'a hununon̈. Co yaha' b'aytet tx'oj, ja'a'coj hej tzetet c'ul yin̈ janma. 10Yin̈ tzet chu jochen hej jetb'i yin̈ Comam, caw xahan ẍjil co b'a, yuxin k'a ẍjacoj smay hunujxa jetb'i co sataj. 11Ji'a'wejtij janma jin̈, mach ẍjutewej isail to sac'an ẍjutewej co b'a, sunil co c'ul chon̈ munlawej yin̈ smunil Comam Jahaw. 12Tzalalaln̈etic'a ẍjutewej co b'a, haxca yin̈ Comam Dios ẍcawxi co c'ul. Machon̈ meltzo jin̈taj yet ẍjilni sya'tajil, mach ẍco b'ejcan ja'ni joración 13Colwaojon̈ yin̈ heb'ya' jetb'i aycoj yin̈ sya'tajil. Co chab'wej mac ch'ec' co c'atan̈. 14Co k'ana' sc'ulal sc'ul Comam Dios yin̈ anma chon̈ cajni, mach ẍco tz'actin̈e, to sc'ulal ẍco k'an yin̈. 15Tzalaojon̈ b'oj mac tzalalal yeyi. Co b'isc'uln̈e' mac b'isc'ulal yeyi. 16Ehojon̈c'oj yin̈ sc'ulch'anil b'oj anma. Mach ẍjute lolo'al, jochewej co b'a b'oj anma scomonaln̈e yeyi. Mach ẍjala ta caw tz'ajan co c'ul. 17Machon̈ pajni yin̈ mac tx'oj chu jin̈. Ja'a' yilal juni tzetet c'ul yin̈ sat anma. 18Ja'a' yilal jehc'oj yin̈ ak'anc'ulal b'oj sunil anma. 19Hex xahan ay wu ti'an, machu co pajni yin̈ anma. Ja'a'can yul sk'ab' Comam Dios spajni yin̈ mac tx'oj chu jin̈. Haxca chal Yum Comam: Wetwanoj ay wuni stoholalan, hayin ẍwa'a spah selel tetan, xi comam Jahaw. 20Chalpaxayoj yin̈ hune'xa: Ta ẍn̈ohcha hunuj mac ẍchiwacoj sc'ul jin̈, ja'a' wa'oj. Ta ẍtaj sti', ja'a' tzet chuc'u, wal tu' ẍcajwasiloj sat tx'ixwilal. 21Mach ẍja'ayoj co b'a tet tzetet tx'oj. Ha' jet, ha' tzetet tx'oj tu' ch'ay yu hej tzetet c'ul ẍju.


Copyright
Learn More

will be added

X\