ROMANOS 11

1Ham heyalni ta xax yiloj Comam Dios scon̈ob' israel yin̈ yanma. Machoj. Ila' hayinti'an, Israelinan. Yic'al ya' Abraham we haca' heb'jetb'i tu'an. Yin̈ yic'al ya' Benjamín xquin elan. 2Yettax caw payxa xal Comam Dios to anma israel scon̈ob' Comam yeyi, yuxin tinan̈ mat yahb'iloj scon̈ob' tu' yu. Johtaj tzet ya'lenaj ya' Elías schejab'lom Comam Dios, yet xalni ya' tet Comam ta xacoj yetcon̈ob' ya' smul, chalni ya': 3Mamin, potx'b'il hej ha chejab'lom yu hej wetcon̈ob'an. Shuchanayoj hej altar b'ay ẍhaltelax xahanb'al tawet. Hayinxan̈e xquin canan, yaja' tinan̈ chin spotx' pax heb'naj yalnian. 4Hactu' xu sta'wi Comam: Machawal hune' tu', haxca xax hin pohiltoj hujeb' mil hawetcon̈ob' mach x'ay jahnoj yin̈ sat tioẍ Baal. 5Hactu' tinan̈. Yuxan̈e sc'ulch'anil sc'ul Comam xto syan̈ecan Comam haywan̈xa wetcon̈ob'an. 6Haxca yu sc'ulch'anil sc'ul Comam hactu' xu, yuxin mat yuuj sc'ulal anma tu'. Ta machoj, matxam tzet chaliloj sc'ulch'anil sc'ul Comam. 7¿Tzet xtan̈can anma israel heyalni? Yeli xacoj yin̈ sc'ul tzet chu scan c'ulal yul sat Comam Dios, yaja' mach stzujchaapnoj yu. Han̈c'a mac sic'leb'ilxa yu Comam scan c'ulal yul sat, yaja' yak'b'il anma israel, xa' Comam cawb'oj yanma. 8Haxca chal Yum Comam: Xa' Comam cawb'oj yanma heb'jetb'i, yuxin waxan̈ca chil scan̈il ye Comam, mach ẍc'oji xtxumni, waxan̈ca chab'e stzoti' Comam, mach xtxumu tzet chaliloj. Hactu' ye anma tu' tinan̈. 9Xalni pax ya' rey David: Hej k'in̈ chec'tze heb'jetb'i, slatz'ab'oj chuyuj yala', yun̈e ha' ch'a'ni lectaoj heb'jetb'i, haxin̈wal schab' sya'tajil. 10Machil hej tzetet yet Comam Dios, haca'tic'a ẍtan̈iloj smujlub'al. Haca' hune' anma c'on̈anxa ye yu yalil yijatz, hactu' chucan heb'jetb'i stohb'alk'inal, yala'. 11Chin k'amb'epaxan: Yet x'ayc'ay anma israel tu', ¿tom mak'b'il xu yayc'ayi? ¡Machoj! Ha' x'elicoj to yet x'ayc'ay heb'jetb'i tu' stzujcha scolb'anil anma mat israeloj yu, yun̈e ha' chilni heb'jetb'i hune' tu', ch'oc yochenojcoj. 12Haxca yet x'ayc'ay heb'jetb'i, stzujchaapnoj sc'ulal yu sunil anma ay satyib'an̈k'inal ti', anma mat israeloj. Ta hactu', k'a' ec'b'altom sc'ulal schab' anma tu' yet ẍmeltzoojcoj sunil heb'jetb'i israel yin̈ Comam Dios. 13Tinan̈ ay hune' tzet yilal walni teyet hex mat israeloj hex ti'an. Comam Dios xquin anitij te xolan, yuxin caw ẍwa' yilal hune' hin munil ti'an, 14yun̈e ta yu, chochecan̈ wetcon̈ob' hune' ti' teyin̈an, wal tu' ayto haywan̈ojxa wetcon̈ob' ẍcolchaojcanan. 15Haxca xiloj Comam Dios anma israel yin̈ sc'ul, yuxin xhitzicoj hunk'aanxa anma ay satyib'an̈k'inal ti' yin̈ Comam. Hajxam yet ẍchalaxoj pax anma israel tu' yu Comam, lahan mi b'oj yet ẍpitzc'acan̈ anma yin̈ camical. 16K'inaloj tinan̈, ta ixim b'ab'el pan ẍwatx'i yin̈ ixim harina yet Comam Dios yeyi, yet pax Comam ixim sunil chaltu'. B'oj hune' te' te' ta yet Comam yoj te', yet pax Comam sunil sk'ab' te'. 17Anma israel haca' sk'ab' hune' te' caw olivo yeyi. Yaja' ay te' sk'ab' tu' tzoc'b'ililoj yin̈ te' yoj. Walex, haca' sk'ab' te' xoltelajil olivo heyeyi, quex tzutzlaxcoj yin̈ yoj te' caw olivo tu'. Hactu' xu he chani he k'inal yin̈ te' yoj b'oj quex ch'ib'iloj yin̈ te'. 18Yuxin macheyala ta k'a' c'ulex sataj te' caw sk'ab'. Ta cheyala ta k'a' c'ulex, tijab' yin̈ he c'ul to mat hexoj che ya' sk'inal te' yoj, to ha' te' yoj ch'a'ni he k'inal. 19Yaja' chim heyala: Ho', yaja' stzoc'laxiloj te' sk'ab' tu' con̈ tzutzlaxcoj yin̈ te' yojan, quex chi mi. 20Ho', yeli, anma israel x'ilaxiloj haxca mach xa' yuluj sc'ul yin̈ Comam Dios. Walex yun̈e xeya' yuluj he c'ul, yuxin xquex oc seleloj heb'jetb'i. Yaja' nann̈e heyu, ayan̈wej ni'anb'ail. 21Haxca ta mach xa' Comam nimanc'ulal yin̈ heb'jetb'i israel haca' sk'ab' te' caw olivo yeyi, hajxam hexti' to haca' sk'ab' te' xoltelajil olivo heyeyi, macha'a' pax Comam nimanc'ulal teyin̈ ta che b'ejcanoj heya'ni yuluj he c'ul yin̈ Comam. 22Tinan̈ txumwejiloj to caw c'ul sc'ul Comam Dios, yaja' how paxoj. Mach xa' Comam nimanc'ulal yin̈ mac xetatoj sb'a. Walex, xa' Comam sc'ulal sc'ul teyet, yaja' tan̈e lin̈anex yin̈, haxca ta machoj, hex hun chex canoj yin̈tajiloj. 23Ta ẍmeltzoojcoj heb'jetb'i israel yin̈ ya'noj yuluj sc'ul yin̈ Comam, haca'tic'a stzutzlaxcoj heb'jetb'i yin̈ te' yoj olivo hunecxa, haxca ay scan̈il ye Comam smeltzoncoj heb'jetb'i b'aytic'a x'eli. 24Ta hex mat israeloj ti', haca' quex tzoc'laxiloj yin̈ te' xoltelajil olivo, quex tzutzlaxcoj yin̈ te' caw olivo, hajxam heb'jetb'i israel, to yin̈ te' caw olivo x'el heb'jetb'i, yuxin sje stzutzlaxcoj heb'jetb'i yin̈ te' yoj hunecxa. 25Hex wuẍtaj, hex wanab', ẍwochean ta cheyohtajn̈e hune' tzoti' mat halb'iloj tet sunil anma, yun̈e macheyal he b'a can̈yeal. Hej wetcon̈ob' israel tu'an, etza sunil mac xcawb'ican yanma, yaja' hactu' chub'can heb'jetb'i masanto ẍlahwojcoj anma mat israeloj yin̈ Comam Dios. 26Hato tu' ẍmeltzoojcoj wetcon̈ob' tu'an cat scolchaoj. Haxca chal Yum Comam: B'et Sión ch'eloj naj Scolomal yet anma, cat yinojiloj naj xtx'ojal yic'al naj Jacob. 27Ha' ti' hin lahc'ulal chin t'in̈b'a' b'ojan, yet chin tan̈tzenojcan smulan, ẍi Comam. 28Yin̈ tzet ye tzoti' c'ul yet colb'anil, ẍcajwacoj wetcon̈ob' tu' yin̈an, yun̈e sc'ulaloj heyet. Yaja' ẍtic'a yoche Comam heb'jetb'i haxca sic'leb'ilxatic'a yichmam heb'jetb'i yu Comam. 29Haxca b'aytet cha' Comam matxa chiloj, machca spahtoj Comam mac sic'leb'ilxa yu. 30Yet yalan̈to tu' xeye heyec'najil tet Comam Dios, yaja' xquex snatoj Comam, ẍquex yanicoj yin̈ sc'ulal, haxca heb'jetb'i israel mat yijyomoj xute sb'a heb'jetb'i. 31Hactu' cha'le heb'jetb'i tinan̈, sye heb'jetb'i yec'najil tet Comam Dios haxca xoche Comam ta yu yilnitoj heb'jetb'i tzet xu ya'ni teyet he can c'ulal b'oj, stzujchaoj yu heb'jetb'i yoc pax c'ulal b'oj Comam. 32Haxca xal Comam to co hunil xco man̈c'o tzet xala yun̈e lahan stz'a' sc'ul Comam jin̈ co hunil, xcon̈ yanicoj yin̈ sc'ulal b'oj, wal israelon̈, mato machoj. 33¡Mach sb'ih hantaj stz'ajanil sc'ul Comam Dios! Mach mac ẍc'oji xtxumni tzet nab'il yu Comam b'oj hantaj tzet chu Comam. 34Haca' yalni Yum Comam: Mach mac ohtajn̈e tzet nab'il yu Comam Jahaw. Mach mac ẍhalnitoj hunuj tzetet tet Comam. 35Mach mac x'a'ni hunuj tzetet tet Comam yun̈e chu ya'ni paxoj selel, ẍiayoj. 36Haxca sunil tzetet, tet Comam ẍtita, b'oj yu Comam yuxin aya, smayoj Comam ye sunil. Yuxin alaxojab'coj smay Comam stohb'alk'inal. Amén.


Copyright
Learn More

will be added

X\