ROMANOS 10

1Hex wuẍtaj hex wanab, ha' hune' chiwochehan yeb caw ayinicojan ink'annihan tet Comam Dios ta chischah wet con̈ob Israelan iscolbanil. 2Haninti'an chiwaco inbahan yin̈ walnihan tato caw yijem ebnaj tet Comam, cachann̈e xin mach haca'o yalni isyelal cuybanile. 3Wal xin mach yohtajo ebnaj yin̈ tzet chu iscan c'ulal sata Comam Dios, yuto ischuquil ebnaj chisayni yoc c'ulal yul sat Comam, mach chisje ebnaj yabeto yin̈ tzet halbilcano yu Comam yin̈ tzet chu iscan c'ulal. 4Yuto isley naj Moisés cachnacano ismunil yin̈ Comam Cristo, yuxin macxan̈etic'a chianayto Comam yul yanma chicancano c'ulal yul sat Comam Dios. 5Tz'ibn̈ebilcano yu naj Moisés yul Yum Comam yin̈ tzet chu cocan c'ulal yu ley, chalni: “Macn̈etic'a tz'ajan isyijen ley, chischah isk'inal yu ley tu',” ẍiayoj. 6Yaja' wal yin̈ cocan c'ulal yul sat Comam Dios yu janico janma yin̈ Comam Jesucristo, tz'ibn̈ebilcanayoj: “Machojab ch'ec' yin̈ heyanma haca' ti': ‘¿Mactaxca chito yul satcan̈?’ tajca quexchi. (Ha' chal yelapno tu' yun̈e yoc yinayti Comam Cristo.) 7Machojab chiec'paxo yul heyanma haca' ti': ‘¿Mactaxca chito yul cambal?’ tajca quexchi,” ẍihayoj. (Ha' chal yelapno tu', chioc yik'a'ti Comam Cristo xol camom yalni.) 8¿Tzet chute yalni chal tu'? Wal xin chal Yum Comam Dios: “Hecawilal ayco Istzoti' Comam Dios, chu heyalni yu heti', yul heyanma aycoj,” ẍi. Huntek'an tzoti' tu' xin ha' ton cuybanile yin̈ janico janma yin̈ Comam Dios, hune' chijalic'ojan̈. 9Ta chijal yu coti' tato ha' Comam Jesús ha' Jahawil, cat xin janayto yul janma tato yak' itzitzbocan̈ Comam Dios Comam xol camom, ay cocolbanil chal tu'. 10Wal xin chon̈can c'ulal yul sat Comam Dios yu chijayto yul janma yin̈ Comam Jesús, yeb yet chijalni yu coti' ta ha' Comam Jesús Jahawil, cat cocolchacanoj. 11Yuto chal yul Yum Comam Dios: “Sunil mac chianayto yul yanma yin̈ Comam Dios mach chican yin̈ tx'ixwilal,” ẍiayoj. 12Yuto chal yul Yum Comam Dios tato mach nano ye ebnaj Israel, mach nano yepaxo ebnaj mach Israeloj, wal xin lahann̈e anma sunil sata Comam Dios. Han̈e xin Comam Yahawil yin̈ sunil anma. Macxan̈etic'a chiawten Comam yin̈ chak' Comam isc'ulal tet yin̈ caw tx'i'al. 13Yuto chal yul Yum Comam Dios: “Sunil mac chiawten Comam Dios yin̈, chicolchahi,” ẍiayoj. 14¿Tzettaxca chu yawten anma Comam yin̈ tato maẍto chayto yul yanma yin̈ Comam? Yeb xin, ¿tzettaxca chu yanayto yul yanma tato maẍto bay chabe anma yin̈ Comam? ¿Tzettaxca xin chu yaben anma tato machi mac chihalni Istzoti' Comam tu' tet? 15¿Tzettaxca xin chu yallaxic'o Istzoti' Comam ta machi mac chichejni hallaxoj? Haca' yalni yul Yum Comam Dios bay chala: “Hanta sak'alil yet mac chiec' halnoc'o tzoti' yet ak'anc'ulal yeb Tzoti' c'ul yet colbanile,” ẍi. 16Yaja' mach sunilo mac choche yabe hune' Tzoti' c'ul yet colbanile, haca' yalni naj Isaías: “Mamin, mach chayto anma yul yanma yin̈ Hatzoti' chijalic'ojan̈,” ẍi naj. 17Wal xin hayet chijabeni chipitzc'ati janico janma yin̈ Comam Dios, ha' xin tzet chijabe tu' ha' ton Istzoti' Comam Cristo. 18Yaja', ¿tzet cheyute heyalni? ¿Tom mach yabe anma Israel hune' Tzoti' yet colbanile ti'? ¡Wal xin caw yabe! Haca' yalni yul Yum Comam Dios bay chala: Sunil yul sat yiban̈k'inal ti' bay ch'abelaxi masanta bay chicachnacan apno yul sat yiban̈k'inal ti', ẍiayoj. 19Chink'ambepaxojan: ¿Tom xin mach yohtan̈elo anma Israel hune' tu'? Wal xin ha' naj Moisés halni yin̈ babelal yin̈ tzet chute yalni Comam Dios: Chiwak' chiwahojan hec'ul yin̈ huntek'an con̈ob matzet chal yelapnoj cat wak'nitijan hehowal yu tzet chiwak'an tet hune' con̈ob ayco yin̈ sucal, ẍiayoj. 20Yalnipaxo naj Isaías yin̈ caw haban, yin̈ Tzoti' yak' Comam Dios: Ha' mac mach quinsaynihan, quinilchalojan yu. Inyenipaxo inbahan tet mac mach quink'ambenan, ẍi Comam, ẍi naj Isaías. 21Yaja' wal yin̈ anma Israel yal naj Isaías yin̈ tzet yal Comam Dios: “Caw sunilbal tz'ayic quinawihan tet anma Israel, yaja' maẍtic'a isyije tzet walan, yuto caw man̈c'omn̈etic'a,” ẍi Comam, ẍi naj Isaías.

will be added

X\