ROMANOS 1

1Hayin Pablo hin ti'an, chin tz'ib'n̈etoj hune' wum ti' teyetan hex ayex yul con̈ob' Roma. Schejab' Comam Cristo Jesús wean, awteb'ilin yu woc apóstolal yin̈ smunilan, b'oj xquin sic'leltoj Comam Dios yu hin pujb'anc'oj tzoti' c'ulan. 2Ha' hune' ti' halteb'il yu Comam yet caw payxa, stz'ib'n̈encan heb'ya' schejab'lom yul Yum Comam Dios yetn̈e yeyi. 3Hune' tzoti' c'ul tz'ib'n̈eb'ilcan ti', ha' Comam Jesucristo Jahaw, Sc'ahol Comam Dios chala: Caw yeli anma Comam, haxca yin̈ yic'al ya' rey David titnaj. 4Hacpaxtu' syeniltoj Comam Espíritu Santo ta Sc'ahol Comam Dios ye Comam b'oj caw ay scan̈il yeyi yet xpitzc'acan̈ xol hej camom. 5Yu Comam Jesucristo ti', xa' Comam Dios sc'ulch'anil sc'ul wetan, xquin yanicoj Comam apóstolalan yun̈e ay anma cha' yuluj sc'ul yin̈ Comam Dios yul hunun con̈ob', cat syijyen tzet chal Comam. 6Haquex tu', hantaj ex ayex yul con̈ob' Roma awteb'ilex yun̈e heyoc yetoj Comam Jesucristo b'oj anma cha' yuluj sc'ul yin̈ Comam haca' je pax hayon̈ ti'an. 7Yuxin chin tz'ib'n̈etoj hune' wum ti' teyetan, hex ocheb'il yu Comam Dios, b'oj awteb'ilex heyoccan yetoj. Tinan̈, ẍwochean ta cha' co Dios co Mamwej, b'oj Comam Jesucristo sc'ulch'anil sc'ul teyet b'oj ak'anc'ulal . 8Tinan̈ yin̈ sb'ih Comam Jesucristo ẍwa' yuch'antioẍ tet Comam Dios heyuan, haxca sunil yulaj hej con̈ob' ohtajb'il to cheya' yuluj he c'ul yin̈ Comam Jesucristo. 9Huntaj el ẍwa' woraciónan, chex hin natijan. Yohtaj Comam Dios, to sunil hin c'ulan chin yijyen wa'ni stzoti' c'ul yin̈ tzet ye Sc'aholan. 10Chin k'an tet Comaman, ta chal sc'ul Comam ay tzet chu wapni hex wilnojan, haxca ayxana ichi walnian ta chin toan. 11Caw ẍwochean ta yet chin apnian chin colwaoj teyin̈ yin̈ hej tzetet cha' Comam Dios jet, haxin̈wal ẍcam he cha heyip yin̈ Comam. 12Ẍwochean ta yet chin apnian, caw ẍjiptze co b'a hununon̈, haxca hune'n̈e Comam Jesucristo b'ay ẍja' yuluj co c'ul. 13Hex wuẍtaj, hex wanab', wocheb'alan cheyab'eloj ta tx'ihal el xwoche hin to hex wilnojan, yaja' maẍtic'a chu hin toan. Ẍwochean ta yet chin apni te xolan, tx'ihal mac cha' yuluj sc'ul wuan, haca' xu yul hunk'aanxa con̈ob' mat israeloj. 14Haxca wetwanoj ye walni stzoti' Comam Dios tet anmaan, ta ay stz'ajanil sc'ul mato matzet, ta cuywinaj, mato mat cuywinajoj. 15Yuxin chilanxaloj yin̈ hin c'ul hin to walnoj pax tzoti' c'ul yet colb'anil teyet hex ah Roma tu'an. 16Haxca machin tx'ixwi walnic'oj tzoti' c'ul yet colb'anil ti'an, haxca yu, cha' Comam Dios scolb'anil anma cha' yuluj sc'ul yin̈. B'ab'el xhal-lax jet hayon̈ israelon̈, lawitu' xhal-lax tet anma mat israeloj. 17Hune' tzoti' c'ul yet colb'anil ti', ha' ch'a'ni johtajn̈e' tzet chu co can c'ulal yul sat Comam Dios, yun̈e ja'ni yuluj co c'ul yin̈. Haca' yalni Yum Comam: Ha' mac ẍcawxi sc'ul yin̈ Comam Dios, xcan c'ulal yul sat Comam, ay sk'inal mach stan̈b'al. 18Ixtan̈xa yeyi to chatij Comam Dios hune' niman sya'tajil yib'an̈ anma chacoj smul yin̈ Comam, b'oj xtx'ojaln̈e chu yin̈ yetb'i. Yu xtx'ojal chu, mach scha ta ch'ohtajn̈elax tzet caw ye Comam. 19Yin̈ caw st'in̈anil, hantaj tzet chu johtajn̈en yin̈ Comam Dios mat ewanoj ye tet anma, haxca hatic'a Comam xyeniloj tet. 20Chu yohtajn̈elax tzet ye Comam yu hej tzetet swatx'e. Haxca yettax swatx'encan Comam satyib'an̈k'inal ti', ixtan̈ xucanoj to ay Comam Dios, b'oj aytic'a scan̈il ye Comam yalan̈to maẍto ch'ichitij satyib'an̈k'inal ti'. Yuxin mach b'ay ẍca scolni sb'a anma mach Dios sat. 21Waxan̈ca yohtaj anma ta ay Comam Dios, yaja' mach sje ya'a' yilal shak'en Comam haca' caw yub'anil, machca sje ya'a' yuch'antioẍ yu hej tzetet c'ul chu Comam. Yuxin matzet chaliloj tzet nab'il yu, yu sucal sc'ul tu' ẍcancan snab'al yin̈ xtx'ojal. 22Waxan̈ca chala ta tz'ajan sc'ul, yaja' ta'an caw suc sc'ul. 23Sb'ejcan shak'en Comam Dios, Comam maẍtic'a ẍcami. X'oc shak'enoj hej yechel anma camb'eal yeyi, b'oj hej yechel no' nok', no' ch'ic, no' lab'ah, hej no' nok' can̈eb' yoj. Ha' hunk'aan tu' x'oc anma tu' yala' sdiosoj. 24Yuxin ẍtin̈chaotcan anma tu' yu Comam, yuni hej tzetet tx'oj chal sc'ul yub'. Yuxin chu hej tzetet tx'ixwub'al yin̈ hunun. 25Haxca macha' yuluj sc'ul yin̈ st'in̈anil ye Comam Dios, yuxin yin̈ lek'ti'al cha' yuluj sc'ul. Ha' hej tzetet watx'eb'il yu Comam, ha' b'ay ch'ec' jahlayi, shak'eni. Wal Comam Dios swatx'eomal sunil tzetet, mach sje shak'e Comam, yaja' yin̈ caw yeli hatcachan Comam yet ay janicoj smay yin̈ stohb'alk'inal. Amén. 26Yu hej tzetet chu anma tu', ẍtin̈chaotcan yu Comam Dios ch'oc yunuj hej tzetet tx'ixwub'al chal sc'ul. Heb'ix ix sb'ejcan heb'ix yuni hej tzetet yet ay yuni b'oj yichamil, ch'oc heb'ix yunuj hej tzetet mat yetoj ay yuni yin̈ yet-ixal. 27Hactu' heb'naj winaj, sb'ejcan heb'naj yuni hej tzetet yet ay yuni b'oj yixal, yu spalc'on yochen heb'naj yuni xtx'ojal ch'oc heb'naj yunuj hej tzetet mat yetoj ay yuni b'oj yet-winajil, chuni heb'naj hej tzetet tx'ixwub'al. Yuxin yin̈tic'a snimanil heb'naj cha' sya'tajil hej tzetet tx'oj mat yetoj ay yuni. 28Haxca mach sje anma ya'a' yilal yanicoj Comam Dios yin̈ yanma, yuxin ẍtin̈chaotcan yu Comam ch'etaxtoj yul swi', ch'oc yunuj hej tzetet tx'oj mat yetoj ay yuni. 29K'aynaj yuni sunil hej tzet muleal, han̈c'a xtx'ojal nab'il yu. Han̈etic'a k'alomal aycoj yin̈ sc'ul sayni, caw stzala sc'ul swatx'en xtx'ojal, caw ẍchiwacoj sc'ul yin̈ hunuj yetb'i, potx'waom, a'om howal, sub'um anma, tx'ojn̈etic'a nab'il yu yin̈ yet-anmail, hob'omcan̈ tzoti'. 30Tx'oj chal yin̈ hunun, xa syah Comam Dios, ec'naj sc'ul, caw ahatoj stel chab'e, caw lolo' stzoteli, caw helan yichencan̈ hunujxa tzet tx'ojal, mach syijye tzet chal smam smi'. 31Mach swalil, lek'ti', mach syijye b'aytet chala, mach stz'a' sc'ul yin̈ yet-anmail. 32Yohtaj to chal sley Comam Dios, to anma ch'uni hej xtx'ojal ti', yet ay scami. Waxan̈ca yohtaj hune' ti', yaja' k'a' slahicoj yuni, hasta stzalayi yet ay anma chuten pax hactu'.


Copyright
Learn More

will be added

X\