ROMANOS 1

1Hanin Pablo inti'an ismunlawom Comam Jesucristo wehan, awtebilinan yu Comam Dios yu wocan ischejabo Comam Jesucristo, yeb xin saybilinan yu walnic'ojan Tzoti' c'ul yet colbanile. 2Hune' Tzoti' c'ul yet colbanile tu', halbilcano yu Comam Dios yet payat, tz'ibn̈ebilcano yul Yum Comam yu ebnaj ischejab. 3Ha' huntek'an cuybanile tz'ibn̈ebilcano tu', yin̈ Comam Jesucristo Jahawil chitzoteli, Comam Isc'ahol Comam Dios. Comam Jesucristo tu' yin̈ yuninal yuninal naj rey David titna Comam yet yulic'o yul sat yiban̈k'inal ti'. 4Yaja' yu Yespíritu Comam Dios ayco yin̈, yeb yu itzitzbican̈ Comam xol camom, hac tu' xin yu isyeni isba tato Isc'ahol Comam Dios yehi yeb xin caw ay yip. 5Yu Comam Jesucristo yuxin xainchahan isc'ulal. Quinyanicojan Comam Dios ischejabo Comam Jesucristo yu walnic'ojan Istzoti', haxinwal ay mac chichahnayto Comam yul yanma yul hunun con̈ob, cat isyijen yin̈ tzet chala. 6Xol huntek'an mac tu' ayexico hex ti', awtebilex yu heyoc yul isk'ab Comam Jesucristo. 7Chintz'ibn̈etojan hune' carta ti' teyet hex ayex bey yul con̈ob Roma. Caw xahan ayex yu Comam Dios, awtebilexpaxo yu heyoc iscon̈obo Comam. Yak'ab Comam Dios Mame yeb Comam Jesucristo isc'ulch'anil isc'ul yeb ak'anc'ulal teyet. 8Tinan̈ xin, yin̈ isbi Comam Jesucristo chiwak'an yuch'andiosal teyin̈ tet Comam Dios yuto sunil yulaj con̈ob chihallaxi tato caw ayco heyanma yin̈ Comam Dios. 9Caw yohta Comam tato hunta el chintxahlihan chexinnatijan yin̈ intxahan. Yin̈ sunil wanmahan chinyijehan walnic'ojan Istzoti' Isc'ahol Comam. 10Chink'annihan tet Comam Dios tato chiel yin̈ isc'ul Comam chinapnihan quexwila'an. 11Yuto caw chiwochehan quexwila'an yu incolwahan hanic'o teyin̈ yin̈ yet Comam, haxinwal chiyik' yip heyanma yin̈ Comam. 12Hac tu' xin chu jiptzelen coba hununon̈, yuto hun lahanxa yeco janma yin̈ Comam. 13Hex wuẍtaj hex wanab, chiwochehan cheyohtan̈eloj tato tx'i'alxa el chiwochehan chintohan quexwila'an, yaja' maẍtotic'a chij isba intohan. Chiwochehan ta hayet chinapnihan texol, tx'i'al mac chioc yul isk'ab Comam wuhan, haca'tic'a chiwuhan yulaj hunun con̈ob bay chinec'an xol anma mach Israeloj. 14Yuto inc'asan ye walnilojan Istzoti' Comam Dios tet macxan̈etic'a anmahil, tet anma ay iscuyu maca tet anma mach iscuyu, tet anma ay yitz'atil iswi' maca tet anma machi yitz'atil iswi'. 15Yuxin ayco yin̈ inc'ulan intohan walnoc'ojan Tzoti' c'ul yet colbanile texol bey Roma tu'. 16Wal haninti'an, mach chintx'ixwilojan yin̈ Tzoti' c'ul yet colbanile, yuto yip Comam Dios yehi; ha' ch'ak'ni colbanile tet sunil mac chianayto yul yanma. Yin̈ babelal hallax jet han̈on̈ Israel hon̈ ti', tzujan tu' xin yallax tet anma mach Israeloj. 17Hune' Tzoti' c'ul yet colbanile ti', ha' chiak'ni johtan̈elo yin̈ tzet chu joc c'ulal yul sat Comam Dios, cachann̈e yu cochahni Comam Jesucristo yul janma, haca' yalni yul Yum Comam Dios: “Ha' mac caw c'ul yul sat Comam Dios yin̈xan̈e Comam ayco yanma, yuxin ay isk'inal mach istan̈bal,” ẍiayoj. 18Wal xin chati Comam Dios isya'tajil yul satcan̈ yiban̈ anma tx'oj, anma maẍtic'a chiwatx'en istoholal. Yu istx'ojal anma tu' yuxin mach chiohtan̈elaxilo isyelal. 19Yin̈ tzet chu johtan̈enilo Comam Dios caw yohtaxa anma; mach ewano ye yul sat yuto ha'tic'a Comam yenilo tet. 20Waxan̈ca mach chijilico yin̈ Comam Dios, yaja' chu johtan̈enilo Comam yu tzet ye tu' watx'ebilxa yu. Yuto yettaxtic'a iswatx'encano Comam hune' yul sat yiban̈k'inal ti' isyenilo isba yin̈ caw haban tato caw Dios Comam, yeb ta caw machi bak'in chitan̈ yip. Yuxin huntek'an anma tu' matxa tzet tz'aj yala' yun̈e iscolni isba. 21Waxan̈ca caw yohta anma tato ay Comam Dios, yaja' maẍtic'a yiyo isba anma tet Comam haca' caw yehi. Maẍtic'a xin yak'paxo anma yuch'andiosal tet Comam, wal xin han̈c'an̈etic'a issucal chiec' yin̈ isnabal yu k'ejholo ayco yin̈ isnabal. 22Caw tz'ajan isc'ul anma tu' yalni, yaja' caw suc, 23yuto xaisbejcano anma Comam Dios caw aycano ismay isk'ak'al yip, Comam maẍtic'a chicami. Haxa yechel anma cambehal yehi, yeb no' ch'ic, yeb no' laba yeb yechel no nok' can̈eb yoj, ha' yaco anma isdiosaloj. 24Yuxin alaxcanico huntek'an anma tu' xol istx'ojal yu Comam Dios, chiswatx'en anma tzet chal isc'ul, caw xin tx'ixobal tzet chiswatx'e anma yin̈ hunun. 25Maẍtaj isyelal Comam Dios yayto anma yul yanma, walxinto ha' lek'ti'al yayto anma yul yanma. Ha' xin tet huntek'an tzet watx'ebil yu Comam Dios ha' bay chiyo isba anma yeb ha' chaco anma ismay; maẍtaj tet Comam watx'en̈e sunil tzet ye tu', Comam yet ay yanico anma ismay yin̈ sunilbal tiempo, ¡hacojab tu'! 26Yu hune' tu' yuxin bejbilcano anma yu Comam Dios, chiswatx'en tzet choche isc'ul, huntek'an caw tx'ixobal. Ebix ix xaisbejcano ebix huntek'an ik'biltic'a yu yin̈ yochen isba yeb yichamil, chiswatx'en ebix huntek'an tzet ye tu' yeb yet ixal mach yeto ay iswatx'eni. 27Hacpax tu' ebnaj winaj xaisbejcano ebnaj huntek'an tzet ik'biltic'a yu yin̈ yochen isba yeb yixal, caw chipalc'on ebnaj iswatx'en istx'ojal yin̈ hunun haca' tzet chal yanma, caw xin tx'ixobal tzet chiswatx'e ebnaj yin̈ yet winajil. Ha'tic'a xin isnimanil ebnaj chichahni isya'tajil ispajo istx'ojal chiswatx'e tu'. 28Yaja' yu machi yelapno Comam Dios yul sat anma, yuxin bejbilcano anma yu Comam yin̈ sunil istx'ojal chiec' yin̈ isnabal. Chiswatx'en anma tzet ye tu' mach yeto ay iswatx'eni. 29Caw nohnaco sunil tzet ye tu' mach c'ulo yin̈ huntek'an anma tu', han̈c'an̈etic'a istx'ojal nabil yu iswatx'eni, han̈etic'a k'alomal ayco yin̈ isc'ul issayni, caw chitzala isc'ul iswatx'en istx'ojal. Ton̈etic'a chichiwa isc'ul yin̈ yet anmahil cat ispotxwahi, ak'om howal, cat yak'ni subchaho anma, tx'ojn̈etic'a nabil yu yin̈ yet anmahil, yeb halom k'umal. 30Chishobcan̈ lek'ti'al yin̈ yet anmahil, ayco ishowal yin̈ Comam Dios, chisyah yet anmahil, caw chican̈ isba, caw lolo', chisnacan̈ istx'ojal, mach chisyije yin̈ tzet chal ismam ismi'. 31Caw lut' chute isba, tzet haltebil yu mach chisyije, matxa isc'ulch'anil isc'ul yin̈ yet anmahil, mach chak' nimanc'ulal, yeb mach chitz'ay isc'ul yin̈ yet anmahil. 32Caw yohta huntek'an anma tu' ta halbilcano yu Comam Dios tato ha' mac chiwatx'en huntek'an istx'ojal tu' chitocano yin̈ camical mach istan̈bal, yaja' wal anma tu' caw chislahico iswatx'en istx'ojal, chitzalapaxoj tato ay mac chiwatx'en istx'ojal.

will be added

X\