APOCALIPSIS 9

1Ha' xok'tzen sho' ángel strompeta, xwilni hune' tx'umel xtitc'ay satcan̈an, x'ayiloj sat tx'otx'otx'. X'a'lax slaweal xab' mach scachnab'al yich tet tx'umel tu'. 2Lemb'il xhajlo hune' xab' tu', x'ahiloj n̈ub' yul, haca'xan̈e yah sn̈ub'al horno yahi. Ha' hune' n̈ub' tu' x'a'ni k'ejholojiloj, yuxin matxa ẍmujli tz'ayic. 3Xol hune' n̈ub' tu' x'ahiloj hej no' nok' haca' no' k'ul, xpujnatoj no' sat tx'otx'otx'. X'a'lax schejb'anil no' schiwa haca' schiwa no' ixcab'. 4Yaja' xcachlax no' ta machetatoj no' hej telaj ni hunujxa tzet yax, ni hunuj te' te', to han̈c'a anma machcoj seyo Comam Dios yin̈ spalan̈. 5Yaja' mach xchaot spotx'o' no' anma, to ton̈e x'aot ec'oj ya' yanma yu sya'il yulb'al howeb' x'ahaw. Ha' sya'il chab'e tu' haca' sya'il b'ay ẍchiwa no' ixcab'. 6Yet chuuj hune' tu', slan̈a'camoj sb'a anma yu sya'il yalni, yaja' mach ẍcami, to ch'el camical tet. 7Hej no' haca' k'ul tu', haca' jilni no' cheh stohxa yin̈ howal jilni no'. Haca' corona oro ahatoj yin̈ swi' no'. Haca' sat anma sat no'. 8Ay pax xil swi' no' haca' xil swi' heb'ix ix, b'oj haca' yeh no' b'alam yeh no'. 9En̈leb'il snimanil no' yu hunk'aan haca' coraza nab'a' ch'en. Haca'xa sk'an̈ yec' tx'ihal ch'en carruaje ib'il yu no' cheh yet ẍto yin̈ howal, hactu' sk'an̈ yec' no'. 10Ay sn̈eh no' haca' no' ixcab', caw k'ak'e swi'. Yin̈ sn̈eh no' tu' aycoj scan̈il ye schiwa yin̈ anma yulb'al howeb' x'ahaw. 11No' haca' k'ul tu', ay hune' ángel aycoj swialoj yin̈ no', ha' yahaw yin̈ xab' mach scachnab'al yich. Yin̈ ab'xub'al hebreo Abadón sb'ih, yin̈ griego Apolión, et'aomtoj tzetet chaliloj. 12X'ec'toj hune' b'ab'el sya'tajil, yaja' ayto cab'xa. 13Ha' xok'tzen swaj ángel strompeta, xwab'en hune' tzoti' x'eliloj xolb'al can̈eb' uc'a' ay yin̈ xtxiquin altar nab'a' oro aycoj yin̈ sat Comam Dios. 14Xalni hune' stzoteliltij tu' tet swaj ángel i'n̈e ch'en trompeta: —B'ejtzo can̈wan̈ ángel c'alan scawilal sti' ha' niman Éufrates. 15Hactu' xu sb'ejtzolax can̈wan̈ ángel tu', etza yictaj anma spotx'iloj, haxca xax ya' itz'at Comam can̈wan̈ ángel tu' yin̈ hune' ora tu', yin̈ hune' tz'ayic, yin̈ hune' x'ahaw, yin̈ hune' hab'il. 16Xwab'en sb'isil hantaj soldado ahatoj yib'an̈ chehan, cab' ciento miyon̈ heb'naj. 17Hactu' xu wilni no' cheh tu'an, heb'naj ahatoj yib'an̈ no', aycoj ch'en coraza yin̈ xtxam sc'ul heb'naj, caj b'oj yax, b'oj k'an jilni ch'en. No' cheh aycoj yalan̈ heb'naj, haca' swi no' b'alam swi' no', ch'eltij k'a' yul sti' no' b'oj n̈ub' b'oj k'ol. 18Etza yictaj anma xcam yu oxeb' tzetet x'eltij yul sti' no' cheh tu'. 19Haxca yin̈ sti' no' cheh tu' aycoj scan̈il yeyi, b'oj yin̈ sn̈eh no'. Haxca sn̈eh no' tu' ay swi' haca' swi' no' lab'ah, ha' hune' tu' xin ch'etan anma. 20Hantajto anma mach xcam yu potx'wal xu tu', maẍtic'a sb'ejcan swatx'en stioẍ, b'oj maẍtic'a sb'ejcan shak'en yespíritu naj matzwalil b'oj hej tioẍ nab'a' oro, plata, bronce, ch'en ch'en b'oj te te', hunk'aan machu yilni, machu yab'eni, machca chu yeq'ui. 21Hunk'aan anma tu' mach sb'ejcan spotx'wayi, ẍcunli, ch'ehc'oj yin̈ xtx'ojal ye swi' b'oj ch'elk'ani.


Copyright
Learn More

will be added

X\