APOCALIPSIS 8

1Haxa yet istzilnilo Comam oc xahanbalil ishuj sello ayco yin̈ te' hum tu', aymi yictajo hora matxa tzet bili yul satcan̈. 2Lahwi tu' wilnihan hujwan̈ ebnaj ángel lin̈ancan̈ sata Comam Dios, yak'lax hujeb ch'en trompeta tet ebnaj. 3Lahwi tu' yul hune'xa naj ángel ik'bil hune' ch'en lesen naba oro yu naj, yoc lin̈no naj sata meẍa ayco sata istz'on̈obal Comam Dios, caw xin tx'i'al pom ak'lax tet naj. Yoc naj isn̈usno yiban̈ meẍa naba oro, yalten naj tet Comam Dios yeb istxah anma yetxa Comam yehi. 4Chi-xin-ah topton isn̈ubal pom yul isk'ab naj, yapni isxuk'al sam sata Comam Dios yeb istxah anma yetxa Comam. 5Lahwi tu', isnotzen naj ángel ch'en lesen yu tzak'ak' ayato yiban̈ meẍa, isk'ojnayti naj yul sat yiban̈k'inal ti'; yin̈n̈ena tu' xin isbili c'uh, isn̈irlahi isjepla c'uh yec'paxo chixcab. 6Iswatx'en isba ebnaj hujwan̈ ángel yun̈e yok'tzen ebnaj istrompeta. 7Hayet yok'tzen naj babel ángel istrompeta, yalaxti ch'en sajbat yeb k'a k'a' soman ye yeb chic' yiban̈ tx'o tx'otx', istz'ato hune' isyox majan tx'o tx'otx' yeb hune' isyox majan te te', istz'apaxcanto sunilej te' telaj caw yax. 8Haxa yet yok'tzen naj iscab ángel istrompeta, isk'ojlaxayto hune' haca' witz ayco k'a' yin̈ xol ha' mar; hac tu' xin hune' yox majan ha' mar tu' meltzoco chic'al. 9Hanic'xan̈e mach yictajo no nok' ay xol ha' mar tu' camiloj. Hanic'xan̈epaxo mach yictajo te' barco etaxtoj. 10Haxa yet yok'tzen naj yox ángel istrompeta, yayc'ayti hune' niman tx'umel yul satcan̈, ayco k'a' yin̈ haca' hunu antorcha. Hune' tx'umel tu', hanic'xan̈e mach yictajo ha ha' bay ayc'ayi yebpaxo yiban̈ isnuk' ha ha'. 11Hune' tx'umel tu' C'ah isbi, hanic'xan̈e mach yictajo ha' c'ahbilo yu, caw xin hantan̈e anma camilo yu ha' yuto c'ahbilo ha'. 12Haxa yet yok'tzen naj iscan̈ ángel istrompeta, caw etza hanic'xan̈e mach yictajo ismujlubal tz'ayic tan̈iloj yebpaxo xin ixahaw yebej tx'umel. Hac tu' xin hanic'xan̈e mach yictajo tz'ayical mujli tz'ayic, yebpaxo xin etza yictaxan̈e ak'balil mujli ixahaw yebej tx'umel. 13Lahwi tu' wilnihan yec' hune' naj ángel haca' no' t'iw satcan̈, wabenan yel yaw yin̈ caw ip: —¡C'anch'an anma ay yul sat yiban̈k'inal yuto oxebto isya'tajil chihuli yet chiyok'tzen ebnaj oxwan̈ ángel istrompeta! ẍi.

will be added

X\