APOCALIPSIS 7

1Lawi wilni hunk'aan tu'an, xwilni pax can̈wan̈ ángel lin̈ancan̈ yin̈ can̈eb' ẍtxiquinb'al tx'otx'otx'an, yun̈e spahni cak'e' xtit yin̈ scan̈eb'al xtxiquin tx'otx', yun̈e mach'ec' yib'an̈ tx'otx' b'oj yib'an̈ ha' mar b'oj yib'an̈ hej te' te'. 2Xwilni hune'xa ángel speto yetc'ulal b'ay ch'ahiloj tz'ayican, yetb'i seyo Comam Dios itzitz. X'awi yin̈ ip tet can̈wan̈ ángel xi'ni schejb'anil yetlicoj yin̈ tx'otx'otx' b'oj ha' mar: 3—Mache yeta tx'otx'otx' b'oj ha' mar b'oj hej te' te', to masanto ẍja'a'coj yechel hantaj schejab' co Dios yu hune' seyo ch'ocoj yin̈ spalan̈. 4Lawitu' xwab'en hantaj sb'isil mac xwatx'i seyar yin̈ sunil hej ic'ale yet con̈ob' Israelan: 144 mil mac x'oc yechel. 5- 812 mil mac x'oc yechel yin̈ hunun ic'ale: Yet naj Judá, yet naj Rubén, yet naj Gad, yet naj Aser, yet naj Neftalí, yet naj Manasés, yet naj Simeón, yet naj Leví, yet naj Isacar, yet naj Zabulón, yet naj José, b'oj yet naj Benjamín. 9Lawitu' caw tx'ihal anma xwilan, hasta mach sb'ischa ju. Sunil yulaj nación, sunil hej ic'ale, sunil hej ab'xub'ale, b'oj sunil hej con̈ob' b'ay ẍtita. Lapan lin̈ancan̈ yin̈ sataj stz'on̈ob'al Comam Dios b'oj yin̈ sat Comam Canelu sb'ih. Saj jilni xil sk'ap heb'ya' aycoj yin̈, ib'il xaj te' palma yu heb'ya'. 10Lapan ẍlah awi heb'ya' yin̈ ip chalni: Xtit co colb'anil tet Comam tz'on̈an yul stz'on̈ob'al, b'oj tet Comam Canelu sb'ih. 11Sunil hej ángel lin̈ancan̈ yin̈ shoyanil tz'on̈ob'al b'oj shoyanil heb'ya' anciano b'oj shoyanil can̈wan̈ querubín, x'ay jahnoj, b'oj x'ay n̈ohnoj shak'en Comam Dios, 12ẍb'itni chalni: ¡Hactu' yeyi! Hal-laxojab' tzoti' c'ul yin̈ co Dios. Hal-laxojab'i to caw ay smay b'oj stz'ajanil sc'ul. A'laxojab' yuch'antioẍ tet. Hal-laxojab'i to caw ay yelapnoj yeyi, b'oj scan̈il yeyi, b'oj caw ay yip yin̈ stohb'alk'inal. ¡Hactu' yeyi! 13Lawitu' sk'amb'en hune' ya' anciano wetan: —¿Mactaj hunk'aan saj xil sk'ap ti', b'oj b'ay speto?. 14—Hachti' hawohtaj mamin, hayinti'an mat wohtajojan, quin chian. Xalni ya' wetan: —Heb'ya' ti' xax eq'uiloj yin̈ hune' niman sya'tajil halb'ilcanoj ta chuuj, xax xtx'ah heb'ya' xil sk'ap, sajn̈en heb'ya' yu schiq'uil Comam Canelu sb'ih. 15Yuxin aycoj heb'ya' sataj stz'on̈ob'al Comam Dios, tz'ayic ak'b'al shak'e heb'ya' Comam tz'on̈an yul stz'on̈ob'al tu'. Ha' Comam ẍtan̈en heb'ya' haxca aycoj Comam yetb'ioj heb'ya'. 16Matxa chab'e' heb'ya' n̈ohchalal ni tajin̈ti'al, matxa stz'a'oj heb'ya' yu sk'ak'al tz'ayic, 17haxca haxa Comam Canelu sb'ih aycan̈ scawilal stz'on̈ob'al Comam Dios ẍtan̈en heb'ya', ha' ch'inojtoj heb'ya' sti' ha' ha' ch'a'ni k'inale, cat sunujiloj Comam Dios hantaj yal sat heb'ya' ch'el yu sya'tajil xila.


Copyright
Learn More

will be added

X\