APOCALIPSIS 7

1Lahwi tu' xin, wilnihan can̈wan̈ ebnaj ángel lin̈ancan̈ yin̈la iscan̈ebal istxiquin tx'o tx'otx'. Chispahnito ebnaj jak'ek' yun̈e mach ch'ec' yiban̈ tx'o tx'otx' yeb yiban̈ ha' mar, yeb yiban̈ ej te' k'ebtaj. 2Wilnihan yahilo hune'xa naj ángel bay chiahilo tz'ayic, ik'bil xin issello Comam Dios yu naj, Comam itzitzn̈etic'a. Yawi naj yin̈ caw ip tet ebnaj can̈wan̈ ak'lax yip yetanto tzet ay sat tx'o tx'otx' yeb tzet ay xol ha' mar, yebej te' k'ebtaj, yalni naj haca' ti': 3¡Maẍton̈e cheyetato tzet ay sat tx'o tx'otx' yeb tzet ay xol ha' mar, yebej te' k'ebtaj masanto chioc yechel Comam Dios yin̈ ispalan̈ ebnaj ischejab coDiosal! ẍi naj. 4Wabenan ta xol ebnaj cablahon̈eb majan Israel ciento cuarenta y cuatro mil ebnaj alaxico yechel. 5Yin̈ ebnaj titna yin̈ yuninal naj Judá cablahon̈eb mil ebnaj alaxico yechel, yeb cablahon̈eb mil ebnaj titna yin̈ yuninal naj Rubén, yeb cablahon̈eb mil ebnaj titna yin̈ yuninal naj Gad. 6Cablahon̈eb milpaxo ebnaj titna yin̈ yuninal naj Aser, cablahon̈eb mil ebnaj titna yin̈ yuninal naj Neftalí, cablahon̈eb mil ebnaj titna yin̈ yuninal naj Manasés. 7Cablahon̈eb mil ebnaj titna yin̈ yuninal naj Simeón, cablahon̈eb mil ebnaj titna yin̈ yuninal naj Leví, cablahon̈eb mil ebnaj titna yin̈ yuninal naj Isacar. 8Cablahon̈eb mil ebnaj titna yin̈ yuninal naj Zabulón, cablahon̈eb mil ebnaj titna yin̈ yuninal naj José, yeb xin cablahon̈eb mil ebnaj titna yin̈ yuninal naj Benjamín. 9Lahwi tu', wilnihan caw hantan̈e anma ayco sata istz'on̈obal Comam Dios, yeb sata Comam oc xahanbalil. Xol anma tu' ay anma nananta con̈obal, nananta yichmam, nananta yabxubal, caw xin hantan̈ecano anma tu', machi mac chik'oji isbisni, caw saj xil isk'ap anma aycoj, ik'bil xin xaj te' ch'ib yu. 10Chalni anma tu' yin̈ caw yip: ¡Comam Dios tz'on̈an yul istz'on̈obal yeb Comam oc xahanbalil, ha' ak'ni cocolbanil! ẍi anma. 11Sunil ebnaj ángel lin̈ancan̈ yin̈ ishoyanil bay tz'on̈an Comam Dios, yeb yin̈ ebnaj anciano yeb yin̈ ebnaj can̈wan̈ querubín, ay jahno ebnaj, yay xulno sat tx'otx' sata Comam tz'on̈an yul istz'on̈obal; yalni ebnaj c'ulla tzoti' yin̈ Comam. 12Yalni ebnaj haca' ti': —¡Hacojab tu'! Ha'n̈ehojab yin̈ Comam Dios challax tzoti' c'ul, yeb ta caw ay ismay, yeb ta caw ay yitz'atil iswi'. Ha'n̈e'ojab tet Comam Dios chiak'lax yuch'andiosal, han̈e Comam caw ay yelapnoj yeb caw ay yip, yeb caw ay ishelanil yin̈ sunilbal tiempo. ¡Hacojab tu'! ẍi anma. 13Isk'amben hune' naj anciano wetan: —¿Mac anmahil huntek'an saj xil isk'ap ti' yeb bay titnacoj? ẍi naj wetan. 14Intak'wihan tet naj: —Mamin, hach hawohtaj, walinan mach wohtajojan, quinchiyan. Yalni naj wetan: —Ha' anma chawil ti' ispeto xol hune' niman isya'tajil, xatx'ahlaxilo ismul yu ischiq'uil Comam oc xahanbalil, haca' ta xaistx'ah anma xil isk'ap, caw xin saj elcanicoj. 15Yuxin ayco anma tu' sata Comam ayco yul istz'on̈obal, chi-xin-munla yul yatut Comam tz'ayical ak'balil. Ha' xin Comam tz'on̈an yul istz'on̈obal chitan̈en anma tu' yuto ayco Comam Dios yetbiho anma. 16Matxa xin chak'le anma wahil yeb tajinti'al, yeb matxa chak'le anma k'a' nitam chitz'ato yu yoj tz'ayic. 17Yuto Comam oc xahanbalil ayco yictabal bay tz'on̈an Comam Dios, ha' Comam chitan̈eni, haca' chu istan̈elax no' me' cat yilaxto no' uc'u' ha', hac tu' xin chu yinito Comam anma tu' yin̈ hune' ha ha' chiak'ni k'inale. Haxa Comam tu' chisunilo yal sat anma, ẍi naj.

will be added

X\