APOCALIPSIS 6

1Lahwi tu', wilnihan istzilnilo Comam oc xahanbalil hune' babel sello, wabenan yalni naj babel querubín yin̈ caw ip haca' isbili c'uh, yalni naj: —¡Cata! ẍi naj. 2Hayet inhacxitojan wilnihan hune' no' cheh sajin̈ ayato hune' naj yiban̈ no', ik'bil xin hune' te' lit' yu naj, yak'lax hune' corona tet naj. Isto naj yin̈ howal, chilann̈etic'a xin isk'oji naj. 3Haxa yet istzilnilo Comam oc xahanbalil iscab sello, wabenan yalni naj iscab querubín: —¡Cata! ẍi naj. 4Wilnipaxojan hune' no' cheh cajin̈, yak'lax yip naj ayahto yiban̈ no' yinilo ak'anc'ulal yul sat yiban̈k'inal ti'. Yun̈e yoc anma ispotx'leno isba; yak'lax hune' niman espada tet naj. 5Haxa yet istzilnilo Comam oc xahanbalil isyox sello, wabenan yalni naj yox querubín haca' ti': —¡Cata! ẍi naj. Wilnihan hune' no' cheh k'ejin̈, ha' naj ayahto yiban̈ no' ik'bil hune' ch'en libra malbal yu naj. 6Xol ebnaj can̈wan̈ querubín tu' wabenan hune' yul nuk'e halni: —Cabn̈e libra trigo maca wajeb libra cebada chik' naj munlawom yin̈ tz'ayic. Mach xin cheyetato te' aceite yeb te' vino, ẍi. 7Haxa yet istzilnilo Comam oc xahanbalil iscan̈ sello, wabenan yalni naj iscan̈ querubín: —¡Cata! ẍi naj. 8Wilnipaxojan hune' no' cheh k'anin̈, ha' xin naj ayahto yiban̈ no', camical isbi naj, yinta naj xin tzujan naj yahawil bay ay camom. Yak'lax yip ebnaj istan̈tzenilo hune' iscan̈ majan anma ay yul sat yiban̈k'inal ti' yu ej howal, wahil, yebej yabil yebpaxo yu ej no' howla nok' ay sat tx'o tx'otx' ti'. 9Haxa yet istzilnilo Comam oc xahanbalil isho' sello, wilnihan hune' meẍa bay chak'lax xahanbal, yalan̈ hune' meẍa tu' wilan yanma ebnaj potx'bil camo yu yalnic'o Istzoti' Comam Dios, yeb yu yak' isba ebnaj testigohal yin̈. 10Chalni ebnaj yin̈ caw ip: —Mam Jahawil, Mam mach istx'ojal ayco tawin̈, wal xin isyelaln̈etic'a chawala. ¿Bak'in chawil yin̈ tzet ch'elico anma ay yul sat yiban̈k'inal cat hawak'ni ispaj tet mac con̈potx'nicamojan̈? ẍi. 11Yak'lax huntek'an xil isk'ap ebnaj caw saj jilni, yallax tet ebnaj ta chi-to-xew ebnaj hanic'oxa tiempo masanto chitz'ajna isbisil ebnaj juẍta yilal yak'lax camoj, yu chak' cheja' isba tet Comam Cristo. 12Haxa yet istzilnilo Comam oc xahanbalil iswaj sello, yec' hune' nimam chixcab, isk'ejholilo tz'ayic haca' hunu k'ap k'ap k'ej, iscajpon̈ilo ixahaw haca' chic'. 13Yayc'ayejti tx'umel satcan̈ haca' yay hona sat te' higuera yu hunu niman jak'ek' yet yaxto te'. 14Isc'aycan̈ satcan̈, haca' chu ischullaxayo hunu xaj hum. Sunil witz yebej tx'o tx'otx' ay xol ha' mar isheq'uilo isba yul yehobal. 15Sunil ebnaj rey yul yiban̈k'inal ti' yeb ebnaj winaj caw ay yelapnoj, yeb ebnaj k'alom, yeb ebnaj yahawil soldado, yeb ebnaj caw aycano yip, yeb ebnaj chejab, yeb ebnaj yet isba ischuquil, yebato isba ebnaj yulaj n̈ach'en yeb yichla ch'en ch'en ay iswi'la witz. 16Chalni ebnaj tet ej witz yeb tet ch'en nimeta ch'en haca' ti': —¡Titan̈we wuyna jiban̈an̈, cat con̈heyebantojan̈ yin̈ sat Comam tz'on̈an yul yehobal, yeb tet ishowal Comam oc xahanbalil, 17yuto mahul istz'ayical bay chihul isya'tajil yu Comam Dios, mach xin mac chik'oji istecha hune' isya'tajil ti' yu! ẍi ebnaj.

will be added

X\