APOCALIPSIS 6

1Haxa xwilnian, xiniloj Comam Canelu sb'ih tu' b'ab'el seyo, xwab'en yalni b'ab'el querubín yin̈ caw ipan, haca' sk'an̈ c'uh, hactu' sk'an̈i, xalni: —Cata. 2Yin̈n̈ena tu' xwilni swayican̈ hune' no' cheh saj in̈ yin̈an. Naj ahatoj yib'an̈ no' yetb'i naj stz'it te'. X'a'ot hune' corona tet naj, haxca ẍtic'a i'wa naj yin̈ howal, lahwi tu' ẍto i'waoj pax naj. 3Yet xiniloj Comam Canelu sb'ih scab' seyo, xwab'en yalni scab' querubínan: —Cata. 4X'eltoj hune'xa no' cheh caj in̈ yin̈, naj ahatoj yib'an̈ no', scha naj smunil yin̈ yiniloj ak'anc'ulal satyib'an̈k'inal ti', yun̈e spotx'b'en sb'a anma. X'alaxc'oj hune' espada caw nimejal tet naj. 5Yet xiniloj Comam Canelu sb'ih syox seyo, xwab'en yalni syox querubínan: —Cata. Xwilni swayipaxcan̈ hune'xa no' cheh k'ej in̈ yin̈an, naj ahatoj yib'an̈ no', ib'il hune' ch'en libra yu naj. 6Xol can̈wan̈ querubín tu' x'eliloj hune' tzoti', xalni yin̈ hacti': —Hunec'a denario yin̈ cab' libra yarinail trigo. Hunec'a denario yin̈ wajeb' libra yarinail cebada chub'. Macheyetatoj te' aceite b'oj vino. 7Yet xiniloj Comam Canelu sb'ih scan̈ seyo, xwab'en yalni scan̈ querubínan: —Cata. 8Xwilnipax swayican̈ hune'xa no' cheh k'an in̈ yin̈an, naj ahatoj yib'an̈ no', Camical sb'ih naj. Tzujancoj hune' mac i'n̈e yehob'al camom yin̈ naj. X'a'lax smunil heb'naj sc'ayniloj hune' scan̈ majan anma satyib'an̈k'inal ti' yu hej howal, wahil, hej yab'il, b'oj yu hej no' howla nok' ch'ec' sat tx'otx'otx' ti', ox majanxan̈e xcani. 9Yet xiniloj Comam Canelu sb'ih hune' sho' seyo, xwilni yalan̈ altaran ayictoj yanma heb'ya' potx'b'il xu scam yu yalnic'oj heb'ya' stzoti' Comam Dios, xa'ni sb'a heb'ya' yin̈. 10Chalni heb'ya' yin̈ caw ip: —Mam Wahaw, hachn̈e c'ulach, b'oj chij sb'a tzet halteb'il hawu. ¿Hantajto chawechma', yet cha winojcan̈ ha b'a yin̈, cat ha pajnoj yin̈ anma ay satyib'an̈k'inal ti' xmalnitoj co chiq'uilan?. 11Hactu' xu ya'lax xilk'ape caw saj tet hunun heb'ya'. Xhal-laxi ta ch'oc heb'ya' xewoj hanic'ojxa, masanto stz'ajna sb'isil heb'ya' yetb'i, heb'ya' ẍyijyen Comam ẍto potx'laxoj haca' xu spotx'ot heb'ya' ti'. 12Yet xiniloj Comam Canelu sb'ih swaj seyo, xwab'en ya'ni hune' niman chixcab'an. Xk'ejholiloj tz'ayic haca' jilni hune' k'ape caw k'ej, hactu' ẍjilni xuluj. Haca' scaj pan̈i chic' jilni xuluj x'ahaw. 13Xtitc'ay hej tx'umel satcan̈, haca' chu yay b'ulna sat te' higo yaxto yet caw ip yec' cak'e'. 14Xc'aycan̈ satcan̈ haca' chu schul-laxayoj te' hum. Sunil witz b'oj hej isla ẍ'ilaxiloj b'aytic'a aya. 15Sunil heb'naj rey ay satyib'an̈k'inal xto yeb'a' sb'a yulaj n̈ach'en b'oj yichlaj ch'en ay yin̈laj sc'ul witz. Hactu' xa'le pax heb'naj caw ayxa smay, heb'naj swial yin̈ heb'naj soldado, heb'naj k'alom, heb'naj caw ayxa scan̈il yeyi, sunil heb'naj chejab', b'oj heb'naj yet sb'a yin̈ smunil. 16X'oc heb'naj yalnoj: —Ayc'ayojab' witz b'oj nimejtaj ch'en jib'an̈, cat hon̈ yeb'an yin̈ sat Comam tz'on̈anayoj yul stz'on̈ob'al, b'oj tet hune' sya'tajil caw tx'oj cha' Comam Canelu sb'ih jet. 17Haxca xax hul stz'ayicalil b'ay chul yeyi yu ẍyelax showal Comam Dios, b'oj Comam Canelu sb'ih. ¿Mactaxca ẍtechaoj yu?.


Copyright
Learn More

will be added

X\