APOCALIPSIS 4

1Lahwi tu', wilnihan hune' pulta hajan yul satcan̈, ha' xin hune' yul nuk'e wabehan yet babelal, hune' haca' yok' ch'en trompeta halni wetan: —Ahan̈ti bey ti' cat inyenihan huntek'an chiyub yintajilo ti', ẍi wetan. 2Yin̈n̈ena tu' wocan yalan̈ yip Comam Espíritu, wilnihan hune' tz'on̈obal yul satcan̈, yul hune' tz'on̈obal tu' tz'on̈an hune' mac. 3Comam tz'on̈an tu', lahan yilni istzejla haca' ch'en jaspe yeb haca' jilni ch'en cornalina. Yin̈ ishoyanil istz'on̈obal Comam tu' aycan̈ hune' no' ch'er chitzejla haca' ch'en esmeralda. 4Wilnipaxojan veinticuatro tz'on̈obal yin̈la ishoyanil istz'on̈obal Comam, yul huntek'an tz'on̈obal tu' tz'on̈anayo veinticuatro ebnaj anciano, saj xil isk'ap ayco yeb ayahto corona naba oro yin̈ iswi' ebnaj. 5Yul istz'on̈obal Comam tu' chielti jepla yoj c'uh, caw ay yip isn̈irlahi. Haxa sata tz'on̈obal tu' caw chiah xaj k'a' yin̈ hujeb antorcha, ha' ton hujeb Yespíritu Comam Dios. 6Sata tz'on̈obal tu' aypaxo hune' haca' ha' mar jilni, chik'axpon comujlubal yul haca' ch'en vidrio. Haxa yictabal bay ay tz'on̈obal tu' yeb yin̈ ishoyanil ay can̈wan̈ ebnaj querubín. Caw tx'i'alcano isbak'sat ebnaj, ay isbak'sat ayco sataj, aypaxo isbak'sat ebnaj yintaj. 7Naj babel querubín lahan jilni naj haca' no' balam, naj iscab haca' no' toro, naj yox haca' sat anma, hac tu' jilni sat naj, haxa naj iscan̈ haca' no' aguila leyanilto xic' chiec' satcan̈, hac tu' jilni naj. 8Ebnaj can̈wan̈ querubín tu' wajata xic' hunun ebnaj, nohnaco bak'sate yalan̈ yeb yiban̈ isxic' ebnaj. Tz'ayical yeb ak'balil maẍtic'a chisbej ebnaj yalni haca' ti': Mach istx'ojal Comam Dios Jahawil, mach istx'ojal, mach istx'ojal Comam; Comam caw ayco yip, Comam ayxatic'a yet yalan̈tocanoj, yeb ay tinan̈, yeb chihuli, ẍi ebnaj. 9Chalni ebnaj querubín tu' ta caw ay ismay, yeb ta caw ay yelapno Comam, Comam tz'on̈an yul yehobal, yeb xin chak'ni ebnaj yuch'andiosal tet Comam ayn̈etic'a yin̈ sunilbal tiempo. 10Hunta el yet chalni ebnaj haca' tu' chiay jahno ebnaj veinticuatro anciano sata Comam, chanayo ebnaj iscorona sata Comam, chalni ebnaj: 11Mam Dios Jahawil, hatzan yallaxi ta caw ay hamay, yeb ta caw ay yelapno hawehi, yeb ta caw ay hawip, yuto hach watx'en̈e sunil tzet ye tu', yuto hac tu' el yin̈ hac'ul yuxin aya; hach xin watx'en̈ecanoj, ẍi ebnaj.

will be added

X\