APOCALIPSIS 3

1Tz'ib'n̈etoj tet hin chejab' ay b'et iglesia ay yul con̈ob' Sárdisan: Ha' ti' ẍwal hayin i'n̈e hujwan̈ Yespíritu Comam Dios b'oj hujeb' tx'umelan: Wohtaj hej tzetet cheyuan, waxan̈ca ẍhalot ta caw itzitz hex, yaja' camomex xa. 2Itz'at che yute he b'a cat he watx'enpaxcan̈ hej tzetet etza ẍtan̈iloj heyu, haxca ẍwilan ta hej tzetet cheyu mat tz'ajanoj ye yul sat hin Diosan. 3Tijab' yin̈ he c'ul yin̈ hej cuyb'anil chab'il heyu, mache b'ejcan heyuni. Meltzowej he nab'al, haxca ta machoj, chin toj hex wila'an haca' yapni naj elk'om yin̈ hunuj anma yet nahul yeyi. Hactu' chu wapnojan, mat heyohtajoj hanic' chin apni lemnaan. 4Waltu' yeli ayto haywan̈ mac te xol, mach stz'iln̈etoj xil sk'ap. Hunk'aan saj jilni xil sk'ap tu', ha' ch'ec'oj tzujtzun win̈an, haxca ha' ay yetwanoj yeyi. 5Mactic'a mach ẍtib'ay yu, saj jilni xil sk'ap ch'ocoj yin̈, mach chin hob'can̈ sb'ih yul te' hum b'ay ahayoj sb'ih mactaj ayxa sk'inal mach stan̈b'alan. Ẍwalnoj yin̈ sat hin Maman b'oj yin̈ sat hej yángelan to wetan. 6Maquex cheyab'e hune' ti', a'wej heyanma he txumniloj tzet chal Comam Espíritu tet hej iglesia. 7Tz'ib'n̈etoj tet hin chejab' ay b'et iglesia ay yul con̈ob' Filadelfiaan: Ha' ti' ẍwal hayin caw c'ulin ti'an b'oj st'in̈anil ẍwalan, ib'il slawe ya' rey David wuan. Yet chin hajni pultaan, mach mac chu speb'ani, yet chin peb'anan, mach mac chu shajni. 8Wohtaj hej tzetet cheyuan. Waxan̈ca mach caw heyip, yaja' xeyab'etoj hin tzoti' xwa' teyetan, mach xquex nanon heyalni ta ayexcoj win̈an. Yuxin xin hajb'acan hune' pulta yin̈ he satan, mach mac chu speb'anoj. 9Ay hune' majan heb'naj chal sb'a israelal, yaja' lek'ti' heb'naj. Chin cheja'toj hune' majan anma yet naj matzwalil tu' ayoj jahnoj yin̈ he satan. Hactu' chu yohtajn̈enoj heb'naj to chex wochean. 10Haxca xtecha sya'tajil heyu haca' xin chej heyub'an, yuxin chex hin colo'an yet chuluj ilweb'al yib'an̈ sunil mac ay satyib'an̈k'inal ti'. 11Toxa chin hulujan, lin̈anexn̈etic'a yin̈ tzet xax stzujcha heyu, yun̈e mach mac ch'inojiloj tzetet ẍwa'a teyet spajoj tzet xeyuan. 12Mactic'a mach ẍtib'ay yu, ẍwa'a'coj haca' spilalil yatut hin Diosan, mach b'ak'in̈ chu shec'laxi, chin tz'ib'n̈enojcoj sb'ih hin Dios yin̈an, b'oj sb'ih scon̈ob' hin Dios tu'an, hune' ac' Jerusalén ẍtit b'ay ay hin Diosan. Chin tz'ib'n̈enoj paxcoj hin b'ih ac' yin̈an. 13Maquex cheyab'e hune' ti', a'wej heyanma he txumniloj tzet chal Comam Espíritu tet hej iglesia. 14Tz'ib'n̈etoj tet hin chejab' ay b'et iglesia ay yul con̈ob' Laodiceaan: Ha' ti' ẍwal hayin caw chij sb'a tzet ẍwalan, ẍwa' hin b'a yin̈ b'aytet caw syelalan. Wuan, yuxin watx'inaj sunil tzetet swatx'e Comam Dios. 15Wohtaj tzet cheyuan. Lahanex b'oj hune' tzet ch'uc'laxi, mat chewoj matca cajoj. K'a' c'ulmi ta chewex mato cajex. 16Yaja' haxca naman heya'ni, mat hex chewoj ni mat hex cajoj, chex hin puch'n̈e'iltij yul hin ti'an. 17Cheyala to caw k'alomex, to caw c'ul chex elcoj yin̈ tzet che yu, mach ninoj tzet chex mahlani, yaja' mache txumu to ayexcoj yin̈ sya'tajil, caw c'antajex, caw meb'a'ex, tz'opsatex, b'oj t'eb'anex. 18Yuxin ẍwa' he c'ulujan ta che lok' oro caw c'ul wetan, yun̈e caw yeli chex k'alomb'i. Hune' oro ẍwal ti'an, caw c'ul yeloj stz'ilal xol k'a' k'a'. Che lok'ni pax xilk'ape caw saj wetan yun̈e he pichni xtx'ixwilal he nimanil. Che lok'ni colirio wetan, cheyanitoj yul he sat haxin̈wal chu heyilni. 19Hayin ti'an caw chin cach mactaj ẍwochean b'oj chin cuyan. Yuxin yet aya che sac'ann̈ecan̈ he b'a, cat smeltzo he nab'al yin̈ c'ul. 20Tinan̈ lin̈anin sti' pultaan, chin awictojan. Ta ay mac ch'ab'en tzet ẍwalan cat shajni spulta, chin octoj yul yatutan cat hin wa' b'ojan. 21Mactic'a mach ẍtib'ay yu, ch'ocoj tz'on̈noj tin c'atan̈ b'ay hin tz'on̈ob'alan, haca' xu ẍtecha wuan, yuxin xquin oc tz'on̈noj sc'atan̈ hin Mam b'ay stzon̈ob'alan. 22Maquex cheyab'e hune' ti', a'wej heyanma he txumniloj tzet chal Comam Espíritu tet hej iglesia.


Copyright
Learn More

will be added

X\