APOCALIPSIS 3

1Yalnipaxo Comam: —Hac ti' chu hatz'ibn̈ento tet inchejaban chitan̈en macta ayxaco yul ink'aban ay yul con̈ob Sardis: “Comam ayco hujeb Yespíritu Comam Dios yin̈, yeb ik'bilcan̈ hujeb tx'umel yu, ha' chalni haca' ti': Haninti'an caw wohtajan tzet chewatx'e. Caw itzitzex yalbanil, yaja' wal yul insatan camomex. 2Tinan̈ xin, iwelo hewayan̈ cat heyocpaxo hewatx'en huntek'an tzet etza lan̈an istan̈iloj. Yuto chiwilan ta ha' tzet chewatx'e mach c'ulo sata Comam Dios. 3Naweti huntek'an cuybanile chabil heyu, lahweco heyijeni. Nawe heba, bejwecano hetx'ojal yuto ta mach helano cheyute heba, chinapni lemnahan quexwila'an yet tona nahul ayex, haca' chu yapni hunu naj elk'om yin̈ hunu mac tona nahul aya. 4Yaja' ay haywan̈ mac texol bey Sardis tu' mach yetato isba, haca' hunu mac mach istz'iln̈eto xil isk'ap, yuxin huntek'an mac tu' yet ay yec' wintajan, sajhopon̈e xil isk'ap. 5Ha' mac chik'oji, chialaxico xil isk'ap caw sajhopon̈e yeb xin mach chinhocan̈an isbi yul hum yet k'inale; cat walnihan sata Inmaman yeb sata ebnaj ángel ta wetan yehi. 6¡Maquex cheyabe hune' ti' ak'we heyanma hetxumni tzet chal Comam Espíritu tetej mac ayxaco yul ink'aban!” ẍi Comam. 7Yalnipaxo Comam: —Hac ti' chu hatz'ibn̈ento tet inchejaban chitan̈en macta ayxaco yul ink'aban ay yul con̈ob Filadelfia: “Comam machi nino istx'ojal yin̈, yeb isyelaln̈etic'a chala, Comam ik'n̈e islawe naj rey David. Comam hayet chishajni pulta machi hunu mac chu ispebani, hayet chispeban pulta, mach mac chu ishajni, chihalni haca' ti': 8Haninti'an wohtajan tzettaj chewatx'e. Ay hune' pulta hajan teyet wuhan, machi hunu mac chu ispebani. Waxan̈ca machi heyip yaja' caw yijem cheyute heba yin̈ intzoti'an. Machi xin chextx'ixwilo win̈an. 9Ha' huntek'an ebnaj chiyijen yin̈ tzet chal naj matzwalil, ebnaj chisbalico isba Israelal chinchejtojan ebnaj tec'atan̈ cat yay jahno ebnaj tesataj, cat yohtan̈enilo ebnaj ta xahan ayex wuhan. 10Caw heyije inchejbanilan, nimanpaxo hec'ul heyak'ni techaho ilwebal, yu hune' tu' yuxin chexincolan yul isk'ab hune' isya'tajil chihul sat yiban̈k'inal yun̈e yilwelax anma ay sat tx'o tx'otx' ti'. 11Toxa chinhullemnahan, machojab chebej hewatx'en tzet chi-tic'a-hewatx'e, haxinwal machi hunu mac chiinilo ispaj selel chiak'lax teyet. 12Ha' mac chik'oji, chiwacojan haca' yoyal yatut Inmaman, machi xin bak'in chiilaxiloj; chintz'ibn̈enicojan isbi Inmaman yin̈ yeb isbi iscon̈ob Inmaman, hune' ac' Jerusalén chitit yul satcan̈ bay ay inDiosalan, cat intz'ibn̈enicojan inbihan ac' yin̈. 13¡Mac chiaben huntek'an ti' yak'ab yanma istxumnilo tzet chal Comam Espíritu tet macta ayxaco yul ink'aban!” ẍi Comam. 14Yalnipaxo Comam: —Hac ti' chu hatz'ibn̈ento tet inchejaban chitan̈en macta ayxaco yul ink'aban bey con̈ob Laodicea: “Comam ist'in̈anil chala, Comam testigo caw yijem yeb chalni isyelal, Comam watx'en̈e sunil tzettaj ye tu' yeb Comam Dios, ha' chalni haca' ti': 15Wohtajan tzet chewatx'e, wohtajan ta lahanex haca' hunu tzet chiuc'laxi mach chewoj, mach xin cajopaxoj, ayxic'a chew hex maca caj hex. 16Yaja' yu namanex, mach chewojex mach cajohexpaxoj, yuxin chexinpuch'iltijan yul inti'an. 17Hex ti' cheyala ta caw k'alomex, caw c'ul heyin̈bal yeb caw sunil ay yul hek'ab heyalni. Mach xin heyohtajoj tato caw c'anch'anex yeb caw ya'ta heyehi. Caw meba' hex, mach chu heyilni, t'ilanexpaxoj. 18Wal xin chiwalan teyet lok'we heoro wetan, ch'en caw c'ul watx'ebilxalo xol k'a k'a'. Hac tu' xin chexoc k'alomal yin̈ caw isyelal, cat xin helok'ni xil hek'ap caw sajhopon̈e wetan, cat heyanico teyin̈ yun̈e mach chiel hetx'ixobal yuto t'ilanex. Chelok'nipaxo yan̈al isbak' hesat wetan yun̈e chu heyilni. 19Haninti'an chincachan yeb chiwak'an isya'tajil yiban̈ mac xahan ay wuhan. Wal xin aweco heyanma yin̈ Comam, nawe heba, bejwecano istx'ojal. 20Haninti'an lin̈an inicojan sat pulta cat wawictojan, ha' mac chiaben yul innuk'an cat ishajni yatut wetan, chinoctojan isc'atan̈ cat inwa'an yebi. 21Ha' mac chik'oji isyijeni chiwak'an hune' yehobal bay tz'on̈aninan, haca' yu ink'ojihan, woc tz'on̈nojan isc'atan̈ Inmaman bay ay istz'on̈obal. 22¡Maquex cheyabe hune' ti', ak'we heyanma hetxumniloj tzet chal Comam Espíritu tetej macta ayxaco yul ink'aban!” ẍi Comam.

will be added

X\