APOCALIPSIS 22

1Lawitu' syeni ángel hune' ha' ha' caw yax c'anc'on̈e wetan. Ha' hune' ha' tu' ch'a'ni k'inal. Hat ẍtit ha' b'ay ay stz'on̈ob'al Comam Dios b'oj Comam Canelu sb'ih. 2Yictajb'al calle ch'ec'toj yictajb'al con̈ob' ch'ec'toj ha'. Sk'axeplaj ha' ha' tu' hat ẍch'ib' te' te' ch'a'ni k'inal. Hunun x'ahaw satni te', cab'lan̈ el yulb'al hab'il. Ch'an̈li xaj te' yin̈ anma ay yul hunun nación. 3Yin̈ hantaj tzet ay b'etu' matxa tzet tz'actin̈eb'il. Yul hune' con̈ob' tu' hat ay stz'on̈ob'al Comam Dios b'oj Comam Canelu sb'ih. Sunil ẍchejab' Comam ẍhak'enoj Comam. 4Hunk'aan tu' ayn̈etic'acoj yilni Comam, b'oj tz'ib'n̈eb'ilcoj sb'ih Comam yin̈ spalan̈. 5B'etu' matxa ak'b'alil, tz'ayicalxan̈c'a. Matxa ch'ocnojcoj hunuj tzetet ẍmujli, ni tz'ayic, haxca ha' Comam Dios Jahaw ẍmujluj yin̈, cat yocoj Comam yahawoj stohb'alk'inal. 6Yin̈n̈ena tu' xalni hune' ángel tu' wetan: —Hunk'aan tzoti' ti' caw st'in̈anil yeyi, chu scawxi co c'ul yin̈. Hatic'a Comam Dios Jahaw ch'iptzen tzoteloj heb'ya' schejab'lom, hatic'a Comam ch'anitij yángel syeb' tet hej schejab' hej tzetet toxa chuuj. 7Chal Comam Canelu sb'ih: —Ab'ewej, toxa chin hulujan. ¡Sak'al yet mac ẍyijyen stzoti' Comam Dios tz'ib'n̈eb'il yul te' hum ti'! . 8Hayin Juan ti'an xwil hunk'aan tzetet ti'an b'oj xwab'e hunk'aan tzoti' ti'an. Lawitu' xquin ay jahnoj yin̈ sat ángel ẍyeni tu' yu hin hak'en walnian. 9Yaja' xal wetan: —Machach ay jahnoj yin̈ hin satan, haxca jet chejab'lom co b'a b'oj hantaj hawet munlawomal ẍhalni stzoti' Comam Dios, b'oj hantaj mac syijyen tzet chal te' hum ti'. To han̈c'a Comam Dios cha hak'e. 10Xalnipaxoj: —Macha web'a'ayoj stzoti' Comam Dios tz'ib'n̈eb'il yul te' hum ti' haxca lan̈anxa yijnoj sb'a tzet chal te'. 11Anma tx'oj, slahab'coj yuni xtx'ojal. Anma quistal snab'al, slahab'coj yuni squistalil. Anma c'ul, slahab'coj yuni sc'ulal. Mac ab'ilxacoj sb'a yul sk'ab' Comam Dios, slahab'coj syijyen tet Comam. 12Chalni Comam Jesús: —Ho' lan̈anxa wulujan, wetb'i spaj ẍwa'a' tet hunun anma yin̈ tzettic'a xwatx'e. 13Hayin b'ab'elinan b'oj hayin slahub'alinan, haca' ye hune' tz'ib' A, b'oj Z. Hayin yichob'anil hinan, b'oj win̈ chij sb'a hej tzetetan. 14Sak'al yet mac xtx'ah xil sk'ap yun̈e ay yoc yin̈ sat te' te' ch'a'ni k'inal b'oj chu yoctoj yul spultail con̈ob' tu'. 15Yaja' mac quistal snab'al ẍcanojcan yin̈taj, mac ẍcunli, mac ch'ixli, mac sayni swinaj, mac potx'waom, mac ẍhak'en tioẍ, b'oj sunil mac ch'ochen yaacoj lek'ti'al. 16Hayin Jesús ti'an, xwatoj wángel yala' tawetan yun̈e hawalni sunil hunk'aan tzetet ti' tet hej iglesia. Hayin ti' yichob'anilan b'oj yic'al ya' rey David wean, b'oj haca' sajb'es ch'ahiloj sahc'alil. 17Chal Yespíritu Comam Dios b'oj yixal Comam Canelu sb'ih: —Hulan̈wej. Mactaj ch'ab'en hune' ti', yalab'paxoj:—Hulan̈wej. Mactaj ẍtaj sti', tijab'i, cat yuc'ni ha' ha' ch'a'ni k'inal, mach ninoj stohol ha' cha'a, ẍi. 18Mactaj ch'ab'en stzoti' Comam Dios tz'ib'n̈eb'il yul hune' te' hum ti', chin tak'ecan tetan: Ta ay mac ch'anicoj yak'b'il tzoti' yin̈ hantaj ahay yul te', cha'a'paxcoj Comam Dios hunk'aan huchan chal te' hum ti' yib'an̈. 19Ta ay mac ch'iniloj yak'b'il stzoti' Comam Dios ahayoj yul hune' te' hum ti', chi'a'paxiloj Comam sk'ahmucul yin̈ te' te' ch'a'ni k'inal, b'oj yin̈ con̈ob' yet-xa Comam Dios chal te' hum ti'. 20Ha' Comam cha' sb'a yin̈ hune' tzoti' ti', ha' ẍhalni: —Ho' toxa chin hulan. ¡Hactu' yeyi! ¡Hulan̈ Jahaw Jesús! 21Ya'ab' Jahaw Jesús sc'ulch'anil sc'ul teyet te hunil.


Copyright
Learn More

will be added

X\