APOCALIPSIS 21

1Lawitu' xwilni hune' satcan̈ ac'an b'oj hune' tx'otx'otx' ac', haxca hune' b'ab'el satcan̈ ti' b'oj hune' b'ab'el tx'otx' ti' xc'aycan̈, hactu' ha' mar xc'aycan̈ ha'. 2Xwilni pax ac' Jerusalénan, con̈ob' yet-xa Comam Dios, x'el sc'atan̈ Comam xtit yul satcan̈. Caw k'aptzeb'ilxa sb'a yu haca' hune' ix k'anab'e stohxa mohyoj b'oj sk'anab'. 3Xwab'en stit hune' tzoti' caw ip yul stz'on̈ob'al Comaman, chalni yin̈ hacti': —Ab'ewej, ayxacoj Comam Dios xol anma, scon̈ob'xa Comam chub'can heb'ya'. Ha' caw Comam ch'ehojc'oj xol heb'ya', ha' Comam ch'occan sDiosoj. 4Ha' Comam sunujiloj yal sat heb'ya', matxa b'ak'in̈ chuuj camical, matxa ok'ilal, matxa mac ch'ahoj sc'ul, matxa mac ch'ab'enoj sya'tajil, haxca tzettic'a ye yet yalan̈to xax tan̈canoj. 5Lawitu' xalni Comam tz'on̈an yul stz'on̈ob'al: —Ab'ecanoj, ẍwac'n̈e sunil hej tzetetan. Xalnipaxoj: —Tz'ib'n̈ecan hunk'aan tzoti' ti', haxca st'in̈anil yeyi, b'oj chu scawxi sc'ul anma yin̈. 6Lawitu' xalnipax wetan: —Xax t'in̈k'ocanoj. Hayin yichob'anil sunil tzetetan b'oj slahub'alan, haca' tz'ib' A b'oj Z hactu' weyan. Mac ẍtaj sti' ẍwa' ha' yuc'u' yin̈ snuk' ha' ha' ch'a'ni k'inalan, mach ninoj stohol ha' cha'a wetan. 7Mactic'a mach ẍtib'ay yu, ha' ẍchanojcan hunk'aan tzetet ti'. Hayin chin ocoj sDiosojan, cat yocojcan wuninalojan. 8Yaja' mac can̈ xiwi, mac mach'a'ni yuluj sc'ul, mac quistal snab'al, mac potx'waom, mac ch'ec' yin̈ ixloj, mac sayni swinaj, mac ẍcunli, mac ẍhak'en tioẍ, b'oj mactaj lek'ti', ha' hunk'aan tu' ẍtojcan yul niman lago b'ay ẍchaw k'a' k'a' calan ye b'oj k'ol, hune' tu' scab' camical. 9Lawitu' xhul hune' ángel aycoj tz'ajoj hej hujwan̈ i'n̈e ch'en hujeb' sec' slahub'al huchan. Xhul tin c'atan̈an xalni wetan: —Ton̈ win̈an, chin yeb' ix ẍmohyi b'oj Comam Canelu sb'ih tawetan. 10Lawitu' xquin can yalan̈ smay sk'ak'al Comam Espírituan. Xquin yitoj hune' ángel tu' swi' hune' witz caw nahat aycan̈an. Syeni niman con̈ob' Jerusalén yet-xa Comam Dios wetan, x'el sc'atan̈ Comam, ẍtit yul satcan̈. 11Hune' con̈ob' tu' aycoj smay sk'ak'al Comam yin̈. Haca' schaw hune' ch'en ch'en caw fino, caw ay stohol, haca' ch'en jaspe, hactu' ẍchawi. Ẍk'axpon co mujlub'al yul haca' ch'en cristal. 12Shoyanil hune' con̈ob' tu' aycoj hune' niman peyab' nahat yecan̈. Cab'lan̈eb' spultail, cab'lan̈wan̈ ángel aycoj stan̈eni, hunun yin̈ sti' hunun pulta. Aycoj sb'ih cab'lan̈wan̈ ichmame israel yin̈ sti' cab'lan̈eb' pulta tu'. 13Oxeb' pulta aycoj yetc'ulal b'ay ch'ahiloj tz'ayic, oxeb' pax yin̈ scuenta norte, oxeb' aycoj yin̈ sur, oxeb' aycoj b'ay ẍto tz'ayic. 14Speyab'il hune' con̈ob' tu' aycoj cab'lan̈eb' ch'en ch'en xe'oj, sb'ih heb'ya' cab'lan̈wan̈ yapóstol Comam Canelu sb'ih aycoj yin̈. 15Hune' ángel xwet tzotel tu'an ib'il hune' haca' te' ah nab'a' oro yu, ẍmalen con̈ob' tu' b'oj spultail b'oj speyab'il. 16Can̈xucut ye hune' con̈ob' tu', lahan stel b'oj satb'al. Ha' smalen ángel hune' niman con̈ob' tu' yu te' ah, 12,000 estadio yecoj. Lahan yeltoj b'oj yecan̈ b'oj satb'al, yuxin lahan smalil sunil. 17Yin̈n̈ena tu' smalen pax speyab'il, 144 codo yecan̈, ha' mal chacoj anma ha' xacoj ángel tu'. 18Ch'en ch'en latzb'ilcan̈ peyab'il tu', jaspe ch'en, wal con̈ob' tu' nab'a' oro, haca' sk'axpon co mujlub'al yul ch'en espejo, hactu' jilni. 19Hej ch'en ch'en aycoj xe'oj peyab' tu', aycoj ch'en ch'en caw ay stohol yelawoj: Ch'en b'ab'el, jaspe, ch'en scab', safiro, ch'en syox, ágata, ch'en scan̈, esmeralda. 20Ch'en sho', ónice, ch'en swaj, cornalina, ch'en shuj, crisólito, ch'en swaxaj, berilo, ch'en sb'alun̈, topacio, ch'en slahun̈, crisoprasa, ch'en shunlaun̈, jacinto, ch'en scab'laun̈, amatista. 21Cab'lan̈eb' pulta aycoj yin̈ speyab'il tu', cab'lan̈eb' ch'en perla, hunun pulta hunun ch'en perla tu' aycoj yin̈. Wal b'ab'el calle ch'ec'toj yictajb'al, nab'a' oro, haca' sk'axpon co mujlub'al yul ch'en espejo, hactu' jilni. 22Mach hunuj n̈ah b'ay ẍhak'elax Comam Dios Jahaw, Comam Dios Sunil Chu Yu xwil yul hune' con̈ob' tu'an, haxca ha' caw Comam ay b'etu' b'oj Comam Canelu sb'ih, tzan b'ay chu shak'elaxi. 23Hune' con̈ob' tu' mach yeẍtooj ch'a'ot mujluj yu tz'ayic b'oj x'ahaw, haxca ha' sk'ak'al smay Comam Dios ha' ch'a'noj mujluj, b'oj Comam Canelu sb'ih. 24Hej con̈ob' yin̈xa sajilk'inal hune' con̈ob' tu' b'ay ẍb'elwi. Tet hune' con̈ob' tu' chi'a'toj heb'naj rey sk'alomal. 25Maẍtic'a ẍpehoj spultail, haxca tz'ayicalxan̈c'a. 26Hat ch'ilaxojtoj sk'alomal b'oj smay sunil hej nación. 27Maẍtic'a ninoj tzet tx'oj ch'ocojtoj b'etu', mach'ocojtoj mac quistal snab'al b'oj mac lek'ti'. Han̈c'a mac ahayoj sb'ih yul Yum Comam Canelu sb'ih, hune' b'ay ay sb'ih mac ayxa sk'inal mach stan̈b'al, ha'n̈e ch'ocojtoj b'etu'.


Copyright
Learn More

will be added

X\