APOCALIPSIS 21

1Lahwi tu' xin, wilnihan hune' ac' satcan̈ yeb hune' tx'o tx'otx' ac', yuto ha' babel satcan̈ yeb tx'otx' babel tx'otx' caycan̈, hacpax tu' xin ha' mar caycan̈ ha'. 2Hanin Juan inti'an wilan iscon̈ob Comam Dios, ha' ton ac' Jerusalén, wilan istit yul satcan̈ bay ay Comam Dios. Caw c'ul yehi, haca' hunu ix ix watx'ebilxa isba yuto yocxa yin̈ mohyilal yeb naj chiik'ni. 3Wabenan hune' yul nuk'e elti bay tz'on̈an Comam, yalni yin̈ caw ip: —Wal tinan̈ ayxaco Comam Dios xol anma, chi-xin-cancano Comam xol, iscon̈obxa Comam chucanicoj. Chiehayo Comam xol anma, cat yoccano Comam isDiosaloj. 4Ha' Comam xin chisunilo yal sat anma, matxa camical, matxa ok'il, matxa mac chiah isc'ul, matxa isya'tajil, yuto sunil tzet aytic'a yet yalan̈tocanoj, xatan̈iloj, ẍi. 5Yalni Comam tz'on̈an yul istz'on̈obal wetan: —Haninti'an chiwak' ac'bojan sunil tzettaj ye tu', ẍi Comam. Yalnipaxo Comam wetan: —Tz'ibn̈ecano huntek'an tzoti' ti' yuto isyelal yehi, yeb chu iscawxi isc'ul anma yin̈, ẍi. 6Lahwi tu' yalnipaxo Comam wetan: —Sunil watx'ebilxa. Haninti'an yichebanil yeb islahobal, haca' tz'ib A yeb Z. Macta chitaj isti', chiwak'an ha ha' matanil yuc'u', hune' ha ha' chiak'ni k'inale. 7Ha' mac chik'oji, chiwak'an sunil huntek'an tu' ismajuloj. Haninan xin chinocan isDiosaloj, cat yoc wuninalojan. 8Yaja' wal mac chixiw yanico isba yul ink'aban, yeb mac mach chayto yul yanma win̈an, yeb mac chiwatx'en isyahbetajil, yeb macta potx'om anma, yeb macta chiixli yeb chiwinajli, yeb macta chicunn̈en yet anmahil, yeb macta chiay jahno sata tioẍ, yeb sunil macta lek'ti'wom, ha' huntek'an mac tu' chialaxto xol hune' niman k'a' chiah xaj yu azufre, ha' ton iscab camical. 9Lahwi tu' yul naj ishuj ángel inc'atan̈an, naj ik'n̈e ch'en ishuj vaso bay ayayto islahobal isya'tajil, yalni naj wetan: —Cata, chinyehan tawet mac chioc yixalo Comam oc xahanbalil, ẍi naj. 10Yin̈ hune' isye Comam Espíritu wettu'an wilan quinyinitojan naj ángel tu' yin̈ iswi' hune' niman witz caw nahat yecan̈. Isyeni naj niman con̈ob Jerusalén wetan, iscon̈ob Comam Dios. Hune' con̈ob tu' wilan istit yul satcan̈ bay ay Comam Dios. 11Caw xin chitzejlaco isk'ak'al Comam yin̈ con̈ob tu', lahan haca' istzejla ch'en ch'en c'ulch'an jilni yeb haca' istzejla ch'en jaspe, chik'axpon cosat yul haca' ch'en cristal. 12Hune' con̈ob tu' hoyanico hune' niman c'ub yin̈ caw xin nahat yecan̈, cablahon̈eb ispultahil aycoj, cablahon̈wan̈ ebnaj ángel ayco istan̈enoj, hunun ebnaj yin̈ isti' hunun pulta tu'. Yin̈ hunun pulta tu' tz'ibn̈ebilico hunun isbi ebnaj cablahon̈eb majan Israel. 13Oxeb ispultahil ayco yin̈ yetc'ulal bay chiahilo tz'ayic, oxebpaxo xin ayco yin̈ yetc'ulal bay chito tz'ayic, oxeb xin ayco yin̈ norte, oxebpaxo xin ayco yin̈ sur. 14Hune' niman c'ub tu' ayco cablahon̈eb ch'en ch'en isxe'oj, ayco xin isbi hunun ebnaj cablahon̈wan̈ ischejab Comam oc xahanbalil yin̈ hunun ch'en. 15Naj ángel tzotel wettu'an ik'bil hune' vara naba oro yu naj yun̈e ismalen naj hune' con̈ob tu' yeb ispultahil yebpaxo isc'ubal. 16Hune' niman con̈ob tu' can̈eb istxiquin, lahan xin yeco ismalil hunun istxiquin tu'. Hayet ismalen naj ángel hune' con̈ob tu' wajeb ciento legua yecoj. Hune' con̈ob tu' haca' yeco ismalil ispac'ul hac tu' yeco ismalil istxiquin, hac tu' yepaxocan̈ istel. 17Haxa yet ismalen naj isc'ubal con̈ob tu' sesenta y cinco metro elicoj. Hune' malbal yaco naj tu' lahan haca' ismalbal anma. 18Hune' c'ub tu', ch'en jaspe ayco isch'enaloj. Wal hune' con̈ob tu' caw naba oro, haca' istzejla ch'en vidrio hac tu' istzejlahi. 19Ch'en ch'en ayco isxe'alo isc'ubal con̈ob tu' sunilej ch'en ch'en caw c'ulch'an jilni ayco yelawiloj. Ch'en babel jaspe ch'en, ch'en iscab zafiro, ch'en isyox ágata, ch'en iscan̈ esmeralda. 20Ch'en isho' ónice, ch'en iswaj cornalina, ch'en ishuj crisólito, ch'en iswaxaj berilo, ch'en isbalon̈eb topacio, ch'en islahon̈eb crisoprasa, ch'en ishunlahon̈eb jacinto, haxa ch'en iscan̈lahon̈eb xin amatista; ha' sunil ch'en ti' ayco yelawiloj. 21Cablahon̈eb ispultahil isc'ubal con̈ob tu', ha' ton cablahon̈eb ch'en perla, hunun pulta tu' hunun ch'en perla ayco yin̈. Wal hune' niman calle chiec'to yictabal con̈ob tu' naba oron̈e, chik'axpon cosat yul haca' vidrio. 22Machi xin yatut Comam Dios wilan yul hune' con̈ob tu', yuto ha' Comam Dios caw aycano yip, yeb Comam oc xahanbalil, ayco xol anma tu'. 23Hune' con̈ob tu' matxa chiocnico yoj tz'ayic yeb yoj ixahaw yu, walxinto ha' isk'ak'al yip Comam Dios ha' ayayo xol anma, yeb xin Comam oc xahanbalil sajilk'inal Comam. 24Yin̈xa issajilk'inal hune' con̈ob tu' chibelwi ej con̈ob colbilxa. Sunil ebnaj rey ay yul sat yiban̈k'inal ti' chato isk'alomal tet hune' con̈ob tu'. 25Maẍtic'a chipebalax ispultahil hunun tz'ayic yuto matxa ak'bal bey tu'. 26Ha' tet hune' con̈ob tu' chialaxto sunil isk'alomal yeb yip sunilej con̈ob. 27Maẍtic'a nino istx'ojal chiocto bey tu', mach hunu mac chiwatx'en tzettaj chisyah Comam Dios chiapni yul hune' con̈ob tu', yeb matxa lek'ti'al. Wal xin han̈c'an̈e mac tz'unbilayo isbi yul hum yet k'inale yet Comam oc xahanbalil, ha' chiocto yul hune' con̈ob tu'.

will be added

X\