APOCALIPSIS 20

1Lawitu' xwilni yayiloj hune' ángel yul satcan̈an, ib'il slaweal niman xab' yu b'oj hune' niman cadena. 2Ha' ángel tu' stzab'ni no' ich niman lab'ah, no' ich tu' payat lab'ah, Diablo sb'ih b'oj Satanás. Xanicoj ángel tu' scadenail naj yulb'al mil hab'il. 3Xyumuttoj naj yul niman xab' tu' hat xmajican naj, xanicoj ángel smajil b'oj seyoal yun̈e matxa mac ẍhajni cat yeltij naj sub'nuj hej nación. Ẍto ec'ojcan mil hab'il, cat shajlaxojpaxiltij naj hanic'ojxa. 4Lemb'il xwilna hunk'aan tz'on̈ob'alan. Yib'an̈ tu' tz'on̈an heb'ya' xax chani schejb'anil yinitij cuenta yin̈ anma. Xwilnipax hantaj mac x'iotiltoj swi'an haxca xalic'oj stzoti' Comam Dios b'oj tzet ye Comam Jesús. Hunk'aan tu' mach xhak'en ich Nok' tu', machca x'ay jahnoj tet yechel, machca sje ta ch'alaxcoj snúmeroal yin̈ spalan̈ mato yin̈ sk'ab'. Hunk'aan tu' xwil spitzc'acan̈an, x'oc yahawoj b'oj Comam Cristo yulb'al mil hab'il. 5Ha' hunk'aan ti' b'ab'el xpitzc'acan̈. Yaja' hunk'aanxa camom, ẍto ec'ojcan mil hab'il catto spitzc'aojcan̈. 6Sak'al yet mactaj ẍpitzc'aojcan̈ yin̈ sb'ab'el tu' haxca yet-xa Comam Dios. Matxa ẍc'ojojcoj scab' camical yin̈, to ch'ocojcan sacerdoteal yin̈ smunil Comam Dios b'oj yin̈ Comam Cristo, cat yocoj yahawoj b'oj Comam yulb'al mil hab'il. 7Lawi yec'ojcan mil hab'il tu', ẍhajlaxojatij naj matzwalil yul xab' b'ay majan, 8cat yelojtoj naj smonte' naj Gog, b'oj scon̈ob' Magog, ha' chaliloj tu' sunil hej nación ay satyib'an̈k'inal. Syamb'a'coj naj b'oj sunil hej soldado yin̈ howal, caw tx'ihal, haca'xan̈e yecantoj arena sti' ha' mar, hactu' sb'isil. 9Yet ẍtoj heb'naj tu' yin̈ howal sunil sat tx'otx'otx' majb'il yu heb'naj cat shoynojay heb'naj scon̈ob' Comam Dios caw xahan ay yu b'ay ay mac yet-xa Comam. Yaja' xatij Comam k'a' k'a' yib'an̈ heb'naj, stz'acantoj heb'naj sunil. 10Naj matzwalil xmonten heb'naj, xyumlaxaytoj naj yul niman lago b'ay ẍchaw k'a' k'a' b'oj k'ol, hune' b'ay ahaytoj ich Nok' tu' b'oj naj lek'ti' chejab'lom. Hat ch'a'laxoj ec'oj ya' yanma heb'naj tz'ayic ak'b'al yin̈ stohb'alk'inal. 11Lawitu' xwilni hune' niman tz'on̈ob'alan saj jilni. Ay hune' mac tz'on̈an yib'an̈. Lemb'il sc'aynacan̈ satcan̈ b'oj tx'otx'otx' yin̈ sat Comam, matxa ninoj yechel xcani. 12Hantaj camom xax pitzc'acan̈ lin̈ancan sataj tz'on̈ob'al tu', hunk'aan ay yelapnoj yeyi b'oj mactaj comonaln̈e yeyi. Lawitu' xhajlaxtoj hunk'aan te' hum, xhajlaxpaxtoj hune'xa te' b'ay ahayoj sb'ih mactaj xax chani sk'inal mach stan̈b'al. X'ilaxtij cuenta yin̈ hej camom tu', hantaj tzet xul yub' hunun, haca' yeyoj yul hunk'aan te' hum tu'. 13Xac'oj ha' mar hantaj camom tohnaj yul ha', xanipaxc'oj camical yet, b'oj camb'al. Sunil hunk'aan mac xax cam tu' x'ilaxtij cuenta yin̈ tzet xul yub'c'uj yet aytoc'oj. 14Lemb'ilna tu' xyumlaxaytoj camical b'oj camb'al yul niman lago nab'a' k'a'. Hune' niman lago tu' ha' scab' camical. 15Hat xyumlaxaytoj mactaj mach ayoj sb'ih yul te' hum b'ay tz'ib'n̈eb'il sb'ih mactaj ay sk'inal mach stan̈b'al.


Copyright
Learn More

will be added

X\