APOCALIPSIS 20

1Lahwi tu', wilnihan yayilo hune' naj ángel yul satcan̈, ik'bil islawehal hune' niman xab yu naj, ik'bilpaxo hune' niman cadena yu naj. 2Istzabnayo naj hune' mac chiyij dragón, ha' ton no' payat laba chihallax diablohal yeb Satanás, isc'albanayo naj ángel tu' naj yulbal mil habil. 3Isk'ojlaxto naj yul hune' niman xab, ismajchencano naj ángel tu' isti'. Yanico naj issellohal yun̈e mach ch'ahti naj dragón tu' yak'a subchaho ej con̈ob. Haxa yet chiec'to mil habil tu' cat isbejtzolax naj hanic'xa tiempohal. 4Lahwi tu' wilnihan huntek'an tz'on̈obal bay tz'on̈an ebnaj ak'lax yip yu yilni yin̈ tzet chielico anma. Wilnipaxojan yanma ebnaj ilaxilo iswi' yu yak' isba testigohal yin̈ Comam Jesús, yeb yu yalic'o Istzoti' Comam Dios. Ha' ton ebnaj tu' mach yiyo isba tet mac Nok' isbi, mach xin aypaxo jahno tet yechel. Mach xin ischahpaxico ebnaj yechel mac Nok' isbi tu' yin̈ ispalan̈ maca yin̈ isk'ab. Wilnihan yitzitzbican̈ ebnaj tu', yoc ebnaj yahawilo yinta Comam yulbal mil habil. 5Ha' ton huntek'an ebnaj tu' babel pitzc'acan̈, wal huntek'anxa camom xin mach pitzc'acan̈ masanto chielto mil habil tu', cat ispitzc'acan̈. 6¡Sak'al yet mac babel chipitzc'acan̈ tu' yuto yetxa Comam Dios yehi! Matxa xin chik'oji iscab camical yin̈, wal xin chioc sacerdotehal yin̈ ismunil Comam Dios yeb Comam Jesucristo, chiocpaxo yahawilo yinta Comam yulbal mil habil. 7Lahwi yec'to mil habil xin cat isbejtzolax naj matzwalil bay majan, 8cat xin yahti naj yak'no subchaho anma ay yul sat yiban̈k'inal ti' yebpaxo xin Gog yeb Magog cat iscutxbanico naj yin̈ howal. Ha' xin isbisil ebnaj ak'om howal chicutxico tu' lahan haca' yarenahil isti' ha' mar. 9Yet chito ebnaj yin̈ howal tu' chismajto ebnaj sunil sat tx'o tx'otx' ti' cat ishoynoyo ebnaj iscampamento ebnaj yetxa Comam Dios yehi yeb hune' niman con̈ob xahan ay yu Comam; yaja' chati Comam k'a k'a' yiban̈ ebnaj cat istz'ahcanto ebnaj sunil. 10Wal naj matzwalil ak'ni subchaho huntek'an anma tu' k'ojlaxayto naj xol hune' niman k'a' chiah xaj yu azufre, hune' bay k'ojlaxayto mac Nok' isbi yeb naj isbalico isba ischejabo Comam Dios. Ha' bey tu' xin chiak'lax ec'oya' yanma ebnaj tz'ayic ak'bal yin̈ sunilbal tiempo. 11Lahwi tu', wilnihan hune' niman tz'on̈obal saj jilni yeb hune' mac tz'on̈anayo yul hune' tz'on̈obal tu'. Yin̈n̈ena tu' isc'aycan̈ tx'o tx'otx' yeb satcan̈ sata mac tz'on̈an tu', wiyom xin isc'aycaniloj. 12Wilnihan anma camnaj lin̈ancan̈ sata Comam, anma niman yelapnoj yeb anma mach yelapnoj. Ishajlax huntek'an te' hum, yillax yin̈ tzet chielico anma camom tu' hatatic'a tzet iswatx'e hunun, haca' yehayo yul huntek'an te' hum tu'. Ishajlaxpaxo te' hum bay ayayo isbi anma ayxa isk'inal yin̈ huneln̈e. 13Yanico ha' mar sunil mac camna yul ha' tet Comam, hacpax tu' naj camical yeb cambal yapaxico sunil camom tet Comam. Yilni Comam yin̈ tzet elicoj hatatic'a tzet iswatx'e hunun. 14Lahwi tu' isk'ojlaxayto naj camical yeb cambal xol hune' niman k'a'. Hune' k'a k'a' tu', ha' ton iscab camical. 15Haxa mac mach ayayo isbi yul te' hum yet k'inale k'ojlaxayto xol hune' niman k'a' tu'.

will be added

X\