APOCALIPSIS 2

1Tz'ib'n̈etoj tet hin chejab' ay b'et iglesia ay yul con̈ob' Éfesoan: Ha' ti' ẍwal hayin i'n̈e hujeb' tx'umel yul hin watx' k'ab'an, b'oj chin ec' xol hujeb' yoj tz'on̈ob'al candil nab'a' oroan. 2Wohtaj hej tzetet cheyuan: Hantaj sya'tajil munil cheyu, b'oj stecha sya'tajil heyu, b'oj wohtaj paxan to mach ẍtecha anma tx'oj heyu. Wohtajan to xeyacoj mac chal sb'a apóstolal yin̈ ilweb'al, xeyohtajn̈eni to lek'ti' hunk'aan tu'. 3Wohtaj paxan to caw x'ec' ya' heyanma, xtechaapnoj heyu, maẍtic'a ẍtib'ay heyu hin ya'ilojan. 4Yaja' ay hune' he tx'ojal ẍwalcoj yin̈ he satan: To matxa chin heyoche haca' yet x'ichitijan. 5Yuxin tijab' yin̈ he c'ul hantaj he sac'anil yet x'ichitij. Nawej he b'a cat heyuni b'aytet ẍtic'a heyu yet yalan̈to. Ta machoj, chin toj yin̈ lemb'il hex wila'an, cat winojiloj he b'ih xol hej iglesiaan. 6Waltu' yeli ayto hune'xa he c'ulal yul hin satan: To mach ẍcha he wi' tzet chu heb'naj nicolaíta, haquinan chin yah xtx'ojal chu heb'najan. 7Maquex cheyab'e hune' ti', a'wej heyanma he txumniloj tzet chal Comam Espíritu tet hej iglesia. Mactic'a mach ẍtib'ay yu, ẍwa'a' sat te' te' ch'a'ni k'inal ay yul sparaíso Comam Dios slob'an, ẍi Comam wetan. 8Tz'ib'n̈etoj tet hin chejab' ay b'et iglesia ay yul con̈ob' Esmirnaan: Ha ti' ẍwal hayin b'ab'el b'oj slahub'al, hayin xaxtic'a quin caman, yaja' xquin pitzc'acan̈an. 9Wohtaj hej tzet cheya'lean: Hantaj ch'ec' ya' heyanma b'oj hantaj meb'a'il cheyila, yaja' yin̈ caw yeli, k'alomex. B'oj wohtajan to caw tx'oj stzotel heb'naj chal sb'a israelal teyin̈, hunmajan heb'naj tu' yet naj matzwalil ye heb'naj. 10Machex xiw tet hantaj sya'tajil cheyila', haxca ay haywan̈ mac aycoj te xol cha'a'ctoj naj matzwalil yul presu, yu heyilwelaxoj, cat heyilnoj sya'tajil yulb'al lahun̈eb' tz'ayic. Yaja' lin̈b'awej he b'a masanto camical, waltu' ẍwa'a' k'inale teyet spajojan. 11Maquex cheyab'e hune' ti', a'wej heyanma he txumniloj tzet chal Comam Espíritu tet hej iglesia. Mactic'a mach ẍtib'ay yu, machila' scab' camical, ẍi Comam wetan. 12Tz'ib'n̈etoj tet hin chejab' ay b'et iglesia ay yul con̈ob' Pérgamoan: Ha' ti' ẍwal hayin i'n̈e ch'en espada caw ay yeh sataj b'oj yin̈taj. 13Wohtajan to hat ayex b'ay aycoj naj matzwalil yahawoj, yaja' waxan̈ca hactu', yehn̈e he yijyomal wetan. Yehn̈e heya'ni yuluj he c'ul win̈an, waxan̈ca xeyil spotx'lax ya' Antipas yijyom ya' x'a' sb'a ya' win̈ b'ay ay naj matzwalilan. 14Yaja' ay hanic' he tx'ojal yul hin satan, haxca te xol ay mac ch'ec' yi'a' scuywab'al naj Balaam, naj x'a'ni sc'uluj naj Balac yun̈e yetantoj anma Israel, x'oc slonoj hej tzetet halteb'il xahanb'alil tet hej tioẍ, xtx'ojn̈encantoj swi' yin̈ ixloj. 15Ay pax mac te xol ch'ec' yi'a' scuywab'al heb'naj nicolaíta. 16Yuxin tinan̈ nawej he b'a, haxca ta machoj, chin toj yin̈ lemb'il hex wila'an cat wa'noj howal b'oj heb'naj tu' b'oj ch'en espada ch'eltij yul hin ti'an. 17Maquex cheyab'e hune' ti' a'wej heyanma he txumniloj tzet chal Comam Espíritu tet hej iglesia. Mactic'a mach ẍtib'ay yu, ẍwa'a' maná ewan ye slob'an, cat wa'noj hune' ch'en ch'en sajpok'pon̈e tetan. Yin̈ hune' ch'en tu', hat tz'ib'n̈eb'ilcoj hune' b'ihe ac' maẍto hunuj mac ohtajn̈e, to han̈c'a mac ẍchani ch'en han̈c'a ohtajn̈e, ẍi Comam wetan. 18Tz'ib'n̈etoj tet hin chejab' ay b'et iglesia ay yul con̈ob' Tiatiraan: Ha' ti' ẍwal hayin hin Sc'ahol Comam Diosan, haca' xaj k'a' k'a' ẍchaw sb'ak' hin satan b'oj haca' ch'en bronce tx'utx'eb'il, hactu' wojan. 19Wohtaj hej tzetet cheyuan: Hantaj chin heyochean b'oj hantaj cheya' yuluj he c'ul win̈an, hantaj xax quex munlayi b'oj hantaj ẍtecha sya'tajil heyu. Wohtaj paxan to k'a' tx'ihalto cheyu tinan̈ sataj yet xquex ichitij. 20Yaja' ay he tx'ojal yul hin satan, haxca ton̈c'a che cha ix Jezabel, ẍhalni ta hin tzoti' chal ixan, ix tu' smontecoj ix hej hin chejab' yin̈ yu tx'ojal ye swi'an b'oj yin̈ sloni hej tzetet halteb'ilxa tet hej tioẍ. 21Xto wa' nimanc'ulal yin̈ ix hanic'ojxaan yu scachni sb'a ix, yaja' mach sje ix ya'a'can xtx'ojal ye swi'. 22Yuxin ẍwa'ayoj ix yin̈ hune' niman yab'ilan, hasta hej hin chejab' x'uni tx'oj b'oj ixan chila' sya'tajil yin̈ ix ta mach sb'ejcan yuni xtx'ojal chu ix tu', 23cat hin potx'noj yunin ixan. Hactu' chu yohtajn̈enoj sunil hej iglesia to chin txuman tzet ib'il yu yanma hunun anma, cat wa'noj spaj teyetan yin̈ hantaj tzet cheyu. 24Wal hantaj hex to ayex b'et Tiatira machex ec' heyi'a' hune' cuywab'al tu', machca cheyab'etoj hune' ẍhalot scuywab'al naj matzwalil caw ewan yeyi, mach ẍwa'a'coj hunujxa ijatz teyib'an̈an. 25Lin̈anex yin̈ tzet xax stzujcha heyu masanto chin hulujan. 26Mactic'a mach ẍtib'ay yu cat syijyen yuni tzet ẍwal ti'an masanto slahwub'al tz'ayic, ẍwa'a'coj yahawoj yib'an̈ sunil hej con̈ob'an. 27Cat yocoj stan̈enoj yin̈ caw ay smay yu hune' k'ojoch nab'a ch'en, haca' xu ya'ni hin Mam hin chejb'anilan. Ha' ch'elicoj hune' ti', haca' co mak'ni pohoj hunuj xih, hactu' ch'utelaxoj hej con̈ob' mat yijyomoj chute' sb'a. 28Ẍwa'noj pax niman sajb'es tetan. 29Maquex cheyab'e hune' ti', a'wej heyanma he txumniloj tzet chal Comam Espíritu tet hej iglesia.


Copyright
Learn More

will be added

X\