APOCALIPSIS 2

1Yalnipaxo Comam: —Hac ti' chu hatz'ibn̈ento tet inchejaban chitan̈en macta ayxaco yul ink'aban yul con̈ob Efeso: “Comam ik'n̈e hujeb tx'umel yin̈ iswatx'k'ab, Comam chiec' xol hujeb ch'en candelero naba oro bay chiahto cantil, ha' chalni haca' ti': 2Caw wohtajan sunil tzet chewatx'e, caw wohtajan hanta isya'tajil cheyak'le yin̈ ismunil Comam Dios, niman cheyutepaxo hec'ul heyak'ni techaho isya'tajil, mach xin chextzala yin̈ anma chiwatx'en istx'ojal. Wohtapaxojan tato xaheyilwe ebnaj chisbalico isba inchejabojan, yayc'ay ebnaj yin̈ lek'ti'al, hac tu' yu heyohtan̈eniloj tato lek'ti' ebnaj. 3Wohtajan ta caw chexec'ya' yu ayexico yul ink'aban, yaj xin caw ay henimanc'ulal, mach chitibayo heyu. 4Yaja' ay hanic' mach chischah inwi'an, yuto matxa ayoco heyanma win̈an haca' yet heyichicoj. 5Yuxin nawetij baytet yin̈ quexayc'ayi, meltzoweco henabal yin̈ Comam Dios, cat hewatx'en baytettic'a chewatx'e yet yichebanil. Ta mach xin chintohan quexwila'an yin̈ an̈e cat winilojan hecandelero yul yehobal. 6Yaja' xin ay hune'xa hec'ulal yul insatan, yuto cheyah tzettaj chiswatx'e ebnaj nicolaíta, haquinpaxtu'an chinyahan tzet chiswatx'e ebnaj. 7Maquex cheyabe hune' ti', caw ak'we heyanma hetxumnilo tzet chal Comam Espíritu tet ej macta ayxaco yul isk'ab Comam Dios. Ha' mac chik'oji, chiwak'an sat te' lobehal chiak'ni k'inale islob, te' ay yul yictabal isparaíso Comam Dios,” ẍi Comam. 8Yalnipaxo Comam: —Hac ti' chu hatz'ibn̈ento tet inchejaban chitan̈en macta ayxaco yul ink'aban ay yul con̈ob Esmirna: “Comam yichebanil yeb Comam islahobal, Comam cami yaja' itzitzbican̈, ha' chalni haca' ti': 9Haninti'an caw wohtajan tzet chewatx'e. Wohtajan hanta ch'ec'ya' heyanma yeb hemeba'il, yaja' yin̈ caw yeli yul sat Comam Dios caw k'alomex. Caw wohtajan tato tx'oj istzotel ebnaj chal isba Israelal teyin̈, yaja' huntek'an ebnaj tu' yet naj matzwalil ye ebnaj. 10Mach chexxiw yin̈ huntek'an isya'tajil chul teyiban̈. Ayex ti' chexalaxoco preso yu naj matzwalil yun̈e heyilwelaxi. Yulbal lahon̈eb tz'ayic cheyil isya'tajil, wal xin caw lin̈bawe heba waxan̈ca chexak'lax camoj, hac tu' xin chiwak'an k'inale mach istan̈bal ispaj selelo teyet haca' hunu corona. 11¡Maquex cheyabe hune' ti' ak'we heyanma hetxumnilo yin̈ tzet chal Comam Espíritu tetej macta ayxaco yul isk'ab Comam! Ha' mac chik'oji mach chiak'lax ec'oya' yanma yin̈ hune' iscab camical,” ẍi Comam. 12Yalnipaxo Comam: —Hac ti' chu hatz'ibn̈ento tet inchejaban chitan̈en macta ayxaco yul ink'aban ay yul con̈ob Pérgamo: “Comam ik'n̈e ch'en espada cabeb yeh yeb caw xixi' iswi', ha' chalni haca' ti': 13Haninti'an caw wohtajan tzet chewatx'e. Caw wohtajan tato ayexayo bay caw ay yip naj matzwalil, yaja' hune'n̈etic'a ha' heyijen wetan. Machi xin chebej heyanayto yul heyanma win̈an waxan̈ca heyil isya'tajil yet iscam naj Antipas, naj caw yijem yute isba yalnic'o intzoti'an bay caw ay yip naj matzwalil. 14Yaja' xin ay hanic' mach chischah inwi'an, yuto ayex ti' cheyaco henabal yin̈ iscuybanil naj Balaam, naj oc ak'oc'ule tet naj rey Balac, yoc naj yak'no ayc'ayo ebnaj Israel. Isc'uxni ebnaj no' chibe chiak'lax xahanbalil tetej tioẍ, yocpaxo ebnaj ixloj. 15Yeb xin ayex cheyaco henabal yin̈ iscuybanil ebnaj nicolaíta, huntek'an yahbil wuhan. 16Yuxin nawe heba, bejwecano huntek'an tu', ta mach xin chinapnihan yin̈ an̈e, cat wocan howal teyin̈ yu ch'en espada chielti' yul inti'an. 17¡Maquex cheyabe huntek'an ti' ak'we heyanma hetxumni yin̈ tzet chal Comam Espíritu tetej mac ayxaco yul isk'ab Comam! Ha' mac chik'oji, chiwak'an maná islob, hune' ewan yehi, cat wak'nihan hune' ch'en ch'en caw sajhopon̈e tet bay tz'ibn̈ebilico hune' bihe caw ac'to; machi mac ohtan̈e, cachann̈e hune' mac chichahni tu' chiohtan̈eniloj,” ẍi Comam. 18Yalnipaxo Comam: —Hac ti' chu hatz'ibn̈ento tet inchejaban chitan̈en macta ayxaco yul ink'aban ay bey con̈ob Tiatira: “Comam Isc'ahol Comam Dios, Comam lahan isbak'sat haca' xaj k'a k'a', yeb yoj haca' ch'en bronce chitzejlahi, ha' chalni haca' ti': 19Haninti'an caw wohtajan tzettaj chewatx'e, wohtajan tato ayco heyanma win̈an. Wohtapaxojan hanta chexmunlahi, yeb caw ay isnimanil hec'ul istecha isya'tajil heyu. Wohtapaxojan tato ec'balto hemunil tinan̈ sata yet heyichicoj. 20Yaja' xin ay huntek'an tzet mach chischah inwi'an, yuto hex ti' maẍtic'a nino tzet cheyal yin̈ ix Jezabel, ix isbalico isba ischejabo Comam Dios. Chak'ni subcha ix ebnaj inchejaban yu iscuybanil, chistubtento ix ebnaj ixloj, yeb isc'uxni no' chibe chiak'lax yin̈ xahanbalil. 21Caw wak'an tiempo tet ix yun̈e isnani isba ix cat isbejnicano istx'ojal, yaja' mach isbej ix iswinajli. 22Yaja' xin chiwak' ec'ojan ya' yanma ix, haca' hunu mac chito hilno sat tx'at yu yabil; cat wanipaxayojan isya'tajil yiban̈ ebnaj chiuten mule yeb ix, ta mach chisna isba ebnaj isbejnicano istx'ojal, haca' istx'ojal chiswatx'e ix, 23cat wak'ni camojan yunin ix. Hac tu' xin chu yohtan̈enilo sunil mac ayxaco yul ink'aban tato haninti'an wohtajan tzet chiec' yul heyanma yeb yin̈ henabal. Chiwak'an ispaj selel teyet hatatic'a tzet chewatx'e hununex. 24Yaja' wal hun majanexxa ay bey Tiatira tu', hex mach heyaco henabal yin̈ iscuywabal ix tu', yeb xin mach heyabeto hune' chihallax cuybanile yet naj matzwalil ewan yehi, chiwalan tato machi hunuxa chejbanile chiwaltojan teyet, 25cachann̈e hune' ti', lin̈bawe heba yin̈ tzet xatzujcha apno heyu masanto yet chinhulan. 26Ha' mac chik'oji yeb xin maẍtic'a chisbej iswatx'en tzet chiwalan, chiwak'an yip yoc yahawo yiban̈ ej con̈ob, 27haca' yu yak'ni Inmaman wipan, caw ay yip chu yak'ni yahawil. Haca' ismak'lax poho hunu tx'otx' xi yu ch'en vara naba hierro, hac tu' chu yak'lax isya'tajil tet anma man̈c'om, 28cat wak'nipaxojan tx'umel sajbes tet. 29¡Maquex cheyabe hune' ti', ak'we heyanma hetxumnilo tzet chal Comam Espíritu tetej mac ayxaco yul ink'aban!” ẍi Comam.

will be added

X\