APOCALIPSIS 19

1Lawitu' caw tx'ihal anma xwab'e yawi yul satcan̈an, chalni yin̈ ip: ¡Ocojab' smay Comam! Han̈c'a co Dios Scolomal jet, han̈c'a ay smay b'oj scan̈il yeyi. 2Haxca yet chinojcan̈ sb'a Comam yin̈ anma, st'in̈anil chub' Comam b'oj stoholal. Xa' Comam sya'tajil yila' ix ich tx'oj ye swi' x'etantoj sunil satyib'an̈k'inal yu xtx'ojal ye swi' tu'. Xpajni Comam yin̈ ix yu scamical hantaj schejab' Comam xcam yu ix. 3Xalni pax heb'ya' yin̈ ip: ¡Ocojab' smay Comam! Hune' ix tu' maẍtic'a sb'ejcan yah sn̈ub'al ix. 4Wal heb'ya' 24 anciano, b'oj can̈wan̈ querubín x'ay jahnoj b'oj x'ay n̈ohnoj shak'en Comam Dios tz'on̈an yul stz'on̈ob'al, chalni yin̈ hacti': ¡Hactu' yeyi! ¡Ocojab' smay Comam! . 5Lawitu' x'ab'elax stit hune' tzoti' yul tz'on̈ob'al, chalni yin̈ hacti': Hantajex che yijye Comam Dios, hex chex nanon tet, hex comonaln̈e heyeyi b'oj hex caw ay yelapnoj heyeyi, awejcoj smay Comam. 6Caw tx'ihal anma xwab'e pax yul snuk'an, haca'xan̈e swahcha ha' nimej ha' b'oj haca' sk'an̈ c'uh yin̈ caw ip, hactu' sk'an̈i: Ayxacoj co Dios Jahaw Yahawoj, Comam Dios Sunil Chu Yu. ¡Ocojab' smay Comam! 7Tzalaojon̈, ja'a' tzalaoj janma yin̈ sc'ulch'anil, ẍjanicoj smay Comam, haxca x'apni stz'ayical smohyi Comam Canelu sb'ih. Watx'eb'ilxa sb'a sk'anab' yu. 8X'a'lax xilk'ape saj nab'a lino tet, caw fino b'oj caw ẍchaw jilni. (Haxca lino caw fino yechel stoholal cha' Comam tet mac yet-xa.) 9Lawitu' xalni hune' ángel tu' wetan: —Tz'ib'n̈ecanoj: Sak'al yet mac awteb'il yin̈ k'in̈ yet smohilal Comam Canelu sb'ih. Xalnipaxoj: —St'in̈anil stzoti' Comam Dios ye hune' ti'. 10Xquin ay jahnoj yin̈ sat ángel tu' yu hin hak'en walnian, yaja' xala: —Machach ay jahnoj yin̈ hin satan, haxca jet chejab'lomal co b'a b'oj hantaj hawet munlawomal ẍhalni stzoti' Comam Dios yin̈ tzet ye Comam Jesús. Han̈c'a Comam Dios cha hak'e, ẍi.Haxca ha' tzoti' yin̈ tzet ye Comam Jesús, ha' ch'iptzen hantaj mac xalni stzoti' Comam Dios. 11Xwilni shajnitoj sb'a satcan̈an. Syenican̈ sb'a hune' no' saj in̈ cheh. Comam ahatoj yib'an̈ no' tu', Yijyom b'oj Syelal sb'ih, haxca t'in̈an yinitij cuenta yin̈ hej con̈ob' b'oj t'in̈an ya'ni howal. 12Haca' ẍchaw xaj k'a' k'a' ẍchaw sb'ak' sat Comam, tx'ihal corona aycoj yin̈ swi'. Tz'ib'n̈eb'il paxcoj hune' b'ihe yin̈ Comam, han̈c'a Comam ohtajn̈e tzet chaliloj. 13Hune' xilk'ape chic'tajxan̈e aycoj yin̈ Comam. Ha' sb'ih Comam, ha' Stzoti' Comam Dios. 14Tzujancoj sunil hej soldado ay yul satcan̈ yin̈ Comam, lino xil sk'ap aycoj yin̈, caw saj, mach tz'il aycoj yin̈, b'oj saj in̈ no' cheh b'ay ahatoj. 15Yul sti' Comam ch'eltij hune' ch'en espada caw ay yeh. Yu ch'en ch'ay sunil hej nación yu Comam. Cha'noj cuenta yu hune' vara nab'a ch'en. Haca' mac xan̈ni pohoj te' uva yun̈e yel yal te' ch'oc vinoal, hactu' ya'noj Comam sya'tajil yila' hej nación yu showal Comam Dios Sunil Chu Yu. 16Tz'ib'n̈eb'ilcoj hune' b'ihe yin̈ xil sk'ap Comam, ch'ayiloj yin̈ swi' sb'ul, chalni: Rey yin̈ heb'naj rey, b'oj Yahaw yin̈ heb'naj yahaw, xicoj yin̈. 17Yin̈n̈ena tu' xwilni hune' ángelan, lin̈ancan yin̈ sat tz'ayic. X'awi yin̈ ip tet sunil no' usmij, chalni tet no': —Catwej, yamb'awejcoj he b'a wa'oj yin̈ ita cha' Comam Dios. 18C'uxwej schib'eal heb'naj rey, b'oj schib'eal heb'naj yahaw yin̈ heb'naj soldado b'oj heb'naj caw can̈ yeyi, b'oj c'uxwej schib'eal no' cheh b'oj heb'naj ahatoj yib'an̈ no'; c'uxwej schib'eal hunun majan anma, schib'eal anma yet sb'a yin̈ smunil b'oj anma txon̈b'il, anma comonaln̈e yeyi b'oj anma caw ay yelapnoj yeyi. 19Lawitu' xwilni stit ich Nok'an b'oj sunil heb'naj rey, ib'il sunil hej soldado yu, syamb'an sb'a heb'naj xichencoj heb'naj howal yin̈ Comam ahatoj yib'an̈ no' cheh b'oj sunil hej soldado. 20Ich Nok' tu', stzab'laxayoj b'oj naj lek'ti' chejab'lom xyeni c'ayb'alc'ule yin̈ sat ich Nok' tu'. Yu hej c'ayb'alc'ule sye naj sub'cha' anma x'alaxcoj snúmeroal ich Nok' tu' yin̈, x'oc shak'enoj yechel No'. Yaman ye ich Nok' tu' b'oj naj lek'ti' chejab'lom, itzitzto yeyi xyumlaxaytoj yul lago b'ay ẍchaw k'a' k'a' b'oj k'ol. 21Heb'naj yak'b'il, xpotx'ot heb'naj yu ch'en espada ch'eltij yul sti' Comam ahatoj yib'an̈ no' cheh. Sunil no' usmij xnooh sc'ul yin̈ hantaj schib'eal heb'naj.


Copyright
Learn More

will be added

X\