APOCALIPSIS 19

1Lahwi tu' wabenan yel yaw tx'i'al yul nuk'e yul satcan̈ yalni yin̈ caw ip: ¡Caw niman yelapno Comam Dios Jahawil, Comam bay chitit colbanile! Han̈c'an̈e Comam Dios ay ismay yeb caw ay yip. 2Yuto yin̈ caw isyelal yeb yin̈ caw istoholal chil Comam yin̈ tzet chielico anma. Mayayo Comam isya'tajil yiban̈ ix tx'oj ye iswi', ix ayco yechelo con̈ob Babilonia, ix etanto anma ay yul sat yiban̈k'inal ti' yu istx'ojal chiswatx'e, yeb yak' Comam Dios ispaj selel tet ix yu ebnaj ischejab Comam potx'bil yu ix, ẍi. 3Yalnipaxo huntek'an yul nuk'e tu' haca' ti': Caw niman yelapno Comam Dios Jahawil. Hune' ix ix tu' maẍtic'a chisbej yah isn̈ubal, ẍi. 4Wal ebnaj veinticuatro anciano yeb ebnaj can̈wan̈ querubín ay jahno ebnaj, yay xulno ebnaj, yanico ebnaj ismay Comam Dios, Comam tz'on̈an yul istz'on̈obal. Yalni ebnaj: —Hacojab tu', caw niman yelapno Comam Dios Jahawil, ẍi ebnaj. 5Wabenan hune' yul nuk'e elti bay tz'on̈an Comam Dios, yalni haca' ti': Aweco ismay Comam Dios sunilex yijemex tet Comam yeb hex chexxiw tet Comam, walca ay heyelapnoj maca machi heyelapnoj, ẍi. 6Wabenpaxojan hantan̈e yul nuk'e haca' ishaxon tx'i'al ej ha ha' yeb haca' isn̈irla c'uh, chalni haca' ti': Caw niman yelapno isbi Comam Dios Jahawil, yuto Comam caw aycano yip maschahco yoc yahawil. 7Tzalajon̈wej, caw jak'awe tzala coc'ul, cat janico ismay Comam Dios yuto maapni istz'ayical ismohyi Comam oc xahanbalil. Ha' mac chioc yixalo Comam tu' caw watx'ebilxa isba. 8Yuto xahallaxi ta chaco ix xil isk'ap, k'ap lino caw aycan̈ istohol yeb caw saj yehi, yeb caw chitzejtzoni. Hune' xilk'ape tu' yechel istoholal chisbeybaln̈e macta yetxa Comam Dios yehi. 9Yalni hune' naj ángel wetan: —Tz'ibn̈e hune' ti': “Sak'al yet macta awtebil yin̈ ismohyilal Comam oc xahanbalil,” ẍi naj. Yalnipaxo naj: —Huntek'an tzoti' ti' yet Comam Dios yehi, isyelal chala, ẍi naj. 10Lahwi tu' way jahnojan sata naj ángel tu' yu winayo inbahan sata naj walnihan, yaja' xin yal naj wetan: —Mach chachay jahno yin̈ insatan yuto ischejab Comam Dios wehan haca' hach ti', yeb haca' ebnaj hawuẍta chak' isba yalnilo Istzoti' Comam Jesús. Wal xin cachann̈e tet Comam Dios bay chawiyo haba, ẍi naj. Ha' xin Istzoti' Comam Jesús, ha' chiiptzen ebnaj ischejab Comam. 11Lahwi tu' ishajni isba satcan̈, wilnihan hune' no' cheh sajin̈, ayahto hune' mac yiban̈ no'. Hune' mac tu' xin Yijem yeb Isyelal isbi, yuto yin̈ caw istoholal chil yin̈ tzet chielico anma, chak'nipaxo howal yin̈ istoholal. 12Wal isbak'sat lahan haca' xaj k'a k'a', hantan̈e xin corona ayahto yin̈ iswi'. Tz'ibn̈ebilico xin hune' bihe yin̈, hune' bihe tu' han̈c'an̈e hune' mac tu' ohtan̈e. 13Wal xil isk'ap xin bacbilico chic' yin̈. Hune' mac tu' Istzoti' Comam Dios isbi. 14Tzujan xin ebnaj ángel ak'om howal yintaj, ayco k'ap lino caw ay istohol xilo isk'ap ebnaj, yeb caw saj jilni, machi nich'ano tz'il ayco yin̈. Ayahto ebnaj yiban̈ hunun no' cheh sajin̈. 15Chi-xin-elti hune' ch'en espada caw ay yeh yul isti', ha' ch'en xin chak'baln̈e yin̈ej con̈ob. Ch'oc naj Yahawiloj yeb sunil yip, yeb hune' isvara naba hierro. Haca' chu isxan̈laxilti yal te' uva yun̈e yoc te' vinohal, hac tu' chu yanayo naj isya'tajil yiban̈ ej con̈ob yu ishowal Comam Dios, Comam caw aycano yip. 16Wal yin̈ xil isk'ap yeb yin̈ isbul tz'ibn̈ebilico hune' bihe haca' ti': Yahawil yin̈ ebnaj yahaw, Iswi'ehal yin̈ ebnaj ayco iswi'ehaloj, ẍicoj. 17Lahwi tu' wilnihan hune' naj ángel lin̈ancan̈ yiban̈ tz'ayic, yalni naj tetej no' ch'ic chiec' yictabal satcan̈ haca' ti': —Catawej, cutxbaweti heba, cat hec'uxni chibe chak' Comam Dios teyet. 18C'uxwe ischibehal ebnaj rey, yeb ebnaj yahawil soldado, yeb ischibehal ebnaj caw can̈ yehi, yeb ischibehal ej no' cheh yeb ebnaj chiahto yiban̈ no'. C'uxwe ischibehal tzijxan̈e anmahil, anma yet isba ischuquil, anma chejab, anma machi yelapnoj, yeb anma ay yelapnoj, ẍi naj. 19Wilnihan naj Nok' isbi yeb sunil ebnaj rey ay yul sat yiban̈k'inal ti', yeb sunil issoldado, cutxanxaco ebnaj yu yanico howal yin̈ hune' mac ayahto yiban̈ no' cheh yeb yin̈ ebnaj ak'om howal tzujan yintaj. 20Istzablaxayo naj Nok' isbi yeb naj isbalico isba ischejabo Comam Dios, naj yeni nimeta c'aybalc'ule sata naj Nok' isbi. Yu huntek'an nimeta c'aybalc'ule isye naj yak' subchaho naj anma yun̈e yalaxico yechel naj Nok' isbi tu' yin̈, yinipaxayo isba anma tet yechel naj. Caw xin itzitz naj Nok' isbi, yeb naj isbalico isba ischejabo Comam Dios isk'ojlaxto ebnaj xol hune' niman k'a' chiah xaj yu azufre. 21Wal sunilxa ebnaj xin potx'lax ebnaj yu ch'en espada chielti yul isti' naj ayahto yiban̈ no' cheh tu', caw xin sunil no' ch'ic tu' caw nohcano isc'ul isc'uxnito ischibehal sunil anma tu'.

will be added

X\