APOCALIPSIS 18

1Lahwi tu' xin wilnihan yayilo hune' naj ángel yul satcan̈ caw ay yip. Caw xin sajbilo sat tx'o tx'otx' ti' yu isk'ak'al naj. 2Yalni naj yin̈ caw ip: ¡Maayc'ay niman con̈ob Babilonia, wal tinan̈ maayc'aycanoj! Maoc yatuto ebnaj ischejab naj matzwalil yeb yehobalo espíritu tx'oj, yeb yatuto no' ch'ic caw yahbeta jilni, yeb caw machiswalil. 3Yuto sunilej con̈ob xaayc'ay yin̈ mule yu istx'ojal hune' con̈ob tu', haca'tan̈e caw xaiscamtzecanilo iswi' huntek'an con̈ob tu' yu istx'ojal. Haxa ebnaj rey ay yul sat yiban̈k'inal ti' xaayc'ay ebnaj yin̈ ixlo yu hune' con̈ob tu'. Sunil ebnaj txon̈wom ay yul sat yiban̈k'inal ti', xaoc ebnaj k'alomal yu istxon̈ni tzettaj ye tu' caw ay istohol, yuto hune' con̈ob tu' caw lolo' isk'aptzen isba yeb yec'tzen k'in̈, ẍi naj ángel tu'. 4Lahwi tu' wabenpaxojan hune'xa yul nuk'e satcan̈, halni haca' ti': Hex wetxahan, elan̈we yul hune' con̈ob ti' yun̈e mach cheyilto hewatx'en istx'ojal chiswatx'e, yeb yun̈e maẍtaj hunex chechah isya'tajil chul yiban̈. 5Hune' con̈ob ti' caw xaah tenno ismul, caw xaahilo satcan̈, yaja' wal tinan̈ xin manalaxti ismul yu Comam Dios. 6Haca'tic'a yute yak'ni tet anma, hac tu' chu heyak'ni tet, cayelto ec'bal ispaj selel cheyak' tet. Huntek'an howla tzet ye tu' ayayto yul isvaso yak' yuc'u' anma, pajtzewe tet, yaj cayelto ec'na caw how cheyute. 7Haca'tic'a yu islolo'n̈en isba yeb yak'ni tzet choche yanma, hac tu' chu heyak'ni ec'oya' yanma cat heyak'ni isya'tajil tet, yuto chal hune' con̈ob Babilonia tu' haca' ti': “Haninti'an caw reinainan, tz'on̈aninan yul intz'on̈obalan, man hunixojan, mach bak'inal chiec'ya' wanmahan,” ẍi ix. 8Yuxinto hune'n̈e tz'ayical chihul sunil isya'tajil yiban̈, chihul camical, ok'il, wahil, cat isn̈uslaxto xol k'a k'a', yuto ay yip Comam Dios Jahawil yanayo isya'tajil yiban̈ hune' con̈ob tu', ẍiayoj. 9Wal sunil ebnaj rey ay yul sat yiban̈k'inal ti' yaco ebnaj ismul yeb yak' yoche tzet chal isnimanil yeb hune' con̈ob tu', caw ch'ok' ebnaj yeb caw chitz'ay isc'ul ebnaj yilni yah isn̈ubal yet chitz'atoj. 10Nahat xin chicancano lin̈no ebnaj yu xiwquilal yilni isya'tajil chiay yiban̈ con̈ob tu', chalni ebnaj: ¡Ay, caw c'anch'an niman con̈ob Babilonia, hune' con̈ob caw aycano yip! Yuto caw yin̈ an̈e mahul isya'tajil yiban̈, ẍi ebnaj. 11Hacpax tu' ebnaj txon̈wom ay yul sat yiban̈k'inal ti', caw chitz'ay isc'ul ebnaj, yeb caw chiok' ebnaj yuto matxa mac chilok'ni tzet chistxon̈ ebnaj. 12Yuto caw yijatzilxa chistxon̈ ebnaj ch'en oro, ch'en plata, yebej ch'en ch'en c'ulejch'an jilni, yeb ch'en perla. Chistxon̈nipaxo ebnaj k'ap lino caw ay istohol, k'ap k'ap morado jilni, yeb k'ap seda, yeb k'ap k'ap caj jilni. Chistxon̈nipaxo ebnaj sunilej te te' xuk' sam, yeb tzettaj ye tu' watx'ebil yin̈ istx'i'eh no' elefante, yeb yin̈ej te te' caw ay istohol, yeb yin̈ ch'en bronce, yin̈ ch'en hierro yeb yin̈ ch'en mármol. 13Chistxon̈nipaxo ebnaj te' canela yeb yan̈al itah caw xuk' sam, yeb te' pom, yeb mirra, yeb an̈ caw xuk' sam, yeb te' vino, yeb te' aceite, yeb ixim harina caw ay istohol, yeb ixim trigo. Chistxon̈nipaxo ebnaj no' wacax, no' me' yeb no' cheh, yeb te' caret chistaric'o no' cheh. Chistxon̈nipaxo ebnaj anma chejabo tet hune' con̈ob tu'. 14Chalni ebnaj txon̈wom tet hune' con̈ob tu': ¡Matxa chiapni te' lobehal tawet tinan̈, huntek'an te' caw chawoche halob. Caw mac'aycanilo halolo'al yeb hak'alomal, matxa bak'inal chawil yin̈! ẍi ebnaj. 15Ebnaj txon̈wom caw occano k'alomal yu hune' con̈ob tu', nahat can lin̈no ebnaj yu xiwquilal yilni isya'tajil chiay yiban̈ con̈ob tu', caw xin chiok' ebnaj yeb chitz'ay isc'ul ebnaj yin̈ con̈ob tu'. 16Chalni ebnaj: ¡Ay, caw c'anch'an hune' niman con̈ob ti'! Hune' con̈ob ti' lahantic'a haca' hunu ix ix chianico k'ap lino caw ay istohol xilo isk'ap, yeb huntek'an xilk'ape morado yeb caj jilni, aypaxico ch'en oro yeb ch'en perla yeb ch'en ch'en caw ay istohol yelawiloj, 17yaja' xin yin̈ caw hunepn̈e matan̈canilo isk'alomal, ẍi ebnaj. Sunil ebnaj yahaw barco yeb anma ayicto yul barco tu', yeb ebnaj chibak'on te', yeb huntek'anxa mac chimunla yiban̈ ha' mar nahat cancano lin̈noj. 18Yet yilni ebnaj yah isn̈ubal hune' con̈ob tu' yah yaw ebnaj, yalni ebnaj: Caw machi hunuxa con̈ob haca' hune' niman con̈ob ti', ẍi ebnaj. 19Yanahto ebnaj pojoj xol xil iswi' yu bisc'ulal, caw xin ch'ok' ebnaj, yeb caw chitz'ay isc'ul ebnaj yin̈ con̈ob tu', chalni ebnaj: ¡Ay, caw c'anch'an hune' niman con̈ob! Yu isk'alomal yuxin k'alombican̈ ebnaj ay isbarco xol ha' mar. ¡Yaja' xin yin̈ caw hunepn̈ech'an matan̈iloj! ẍi ebnaj. 20Yuxin tzalahan̈we hex ayex yul satcan̈ yu maayc'ay hune' con̈ob tu'. Tzalahan̈wepaxo hex yetexxa Comam Dios, hex ischejab Comam yet payat yeb hex ischejab Comam Jesús, yuto haca' yu yak'ni hune' con̈ob tu' ec'oya' heyanma, hac tu' yu yak'lax ec'oya' yanma yu Comam Dios. 21Lahwi tu' wilnihan yinican̈ hune' naj ángel caw ay yip, hune' ch'en niman ch'en haca' ch'en molino yet trigo, isk'ojnayto naj ch'en xol ha' mar, yalni naj: Hac ti' chu isk'ojlaxayto hune' niman con̈ob Babilonia, matxa bak'inal xin chiillaxi. 22Matxa bak'inal chiabelax yoc te' arpa, yeb te' su' yeb ch'en trompeta yulaj iscallehal con̈ob tu'. Matxa xin hunu naj munlawom chiillax ismunla yin̈ tzettaj munilal, yeb matxa chiabelax yoc ch'en molino yul con̈ob tu'. 23Matxa xin chiillax isk'ak'al hunu cantil, matxa xin chiabelax iswejcha anma yin̈ mohyilal. Matxa xin chiillax ebnaj txon̈wom yul con̈ob tu' waxan̈ca xin caw ay yelapno ye ebnaj sata anma yul sat yiban̈k'inal ti'. Yak'nipaxo subchaho hune' con̈ob tu' sunil anma yul sat yiban̈k'inal ti' yu isnawalil. 24Alaxpaxayo hune' niman isya'tajil yiban̈ con̈ob Babilonia tu' yuto ha' bey tu' ilcha ischiq'uil ebnaj ischejab Comam Dios potx'bilcamoj, yeb ischiq'uil macta yetxa Comam yehi, yeb ischiq'uil ebnaj potx'lax yul sat yiban̈k'inal ti', ẍi naj.

will be added

X\