APOCALIPSIS 17

1Lahwi tu' yul hune' naj ángel inc'atan̈an, hune' naj yetbi ebnaj hujwan̈ ik'bil isvaso, yalni naj wetan: —Cata chinyehan isya'tajil chialaxayo yiban̈ ix ix tx'oj ye iswi' tawet, ix tz'on̈anayo yiban̈ ej ha ha'. 2Sunil ebnaj yahawil con̈ob yul sat yiban̈k'inal ti', xaayc'ay yin̈ mule yeb ix, haxa anma ay yul sat yiban̈k'inal ti' xin, haca'tan̈e xayuc'tzecan̈ ix yin̈ mule yu istx'ojal iswi', ẍi naj. 3Yin̈ hune' isye Comam Espíritu wettu'an, wilan quinyinitojan naj ángel tu' bey tx'otx' desierto. Wilnihan hune' ix ix ayahto yiban̈ hune' no' niman nok'. Hune' no nok' tu' cajin̈ yin̈ no', hantan̈e xin huntek'an bihe tx'oj istzotel yin̈ Comam Dios ayco yin̈ no', hujeb xin iswi' no', yeb lahon̈eb yuc'a' no'. 4Hune' ix ix tu' cajwuk'wun̈e yeb cajyolyon̈e jilni xil isk'ap ix, hantan̈e xin yelawil aycoj; ayco ch'en oro yeb ch'en perla yelawiloj, yeb huntek'an ch'en ch'en c'ulch'an jilni. Ik'bil xin hune' ch'en vaso naba oro yu ix, nohna yu sunil ismachiswalilal yeb mule chiswatx'e ix. 5Tz'ibn̈ebilico hune' bihe yin̈ ispalan̈ ix, machi mac ohtan̈e, chalni haca' ti': “Hune' niman con̈ob Babilonia, mi'e yin̈ sunil ebix tx'oj ye iswi' yeb sunil tzet machiswalil ay yul sat yiban̈k'inal ti',” ẍicoj. 6Haxa wilnihan xin caw uc'um ix yu ischiq'uil ebnaj yetxa Comam Dios potx'bil camoj, yeb yu ischiq'uil ebnaj yak' isba testigohal yin̈ Comam Jesús. Caw xin c'ayilo inc'ulan yet wilnihan ix. 7Yalni naj ángel wetan: —¿Tzet yin̈ xin caw chic'ayilo hac'ul hawilni ix? Wal xin chiwalan tawet yin̈ tzet yelapno ye hune' ix ti' yeb no nok' hujeb iswi' yeb lahon̈eb yuc'a' ayicto yalan̈ ix. 8No nok' maxawil tu', ha' ton hune' naj aytic'a yet payxa, yaja' matxa naj ayc'o tinan̈, yaj chiahilo naj yul hune' niman xab yet yalan̈to maẍto chitocano naj yin̈ isya'tajil. Haxa anma ay sat tx'o tx'otx' ti', huntek'an mach ayayo isbi yul te' hum yet k'inale mach istan̈bal yettaxtic'a iswatx'i hune' yul sat yiban̈k'inal ti', caw chic'ay isc'ul yilni naj Nok' isbi tu', naj aytic'a payxa, yaja' machi naj tinan̈, yaja' xin chihulupaxoj. 9Mac ay yitz'atil iswi', istxumabilo hune' ti': Ha' hujeb iswi' no' tu', yechel hujeb witz bay tz'on̈an ix ix tu', yechelpaxo hujwan̈ ebnaj yahawil con̈ob yehi. 10Howan̈ ebnaj yahawil tu' xatan̈iloj, hune' naj xin ayco yahawil tinan̈, hunxa naj xin chioc naj yahawilo tzujanilxa, yaja' xin hanic'xan̈e tiempohal. 11Haxa hune' naj Nok' isbi, naj aytic'a payxa, yaja' machi tinan̈, yet chihul naj tu' ha' naj chioc yahawilo yin̈xa iswaxan̈wan̈, yuto yetbi isba naj yeb ebnaj hujwan̈. Hayet chioc naj yahawilo tu' behxa isto naj yin̈ isya'tajil yin̈ huneln̈e. 12Haxa lahon̈eb yuc'a' no' hawil tu', yechel yin̈ lahon̈wan̈ ebnaj rey maẍto chioc yahawiloj, yaj xin hun chu yak'lax yip ebnaj yeb naj Nok' isbi yoc yahawil yin̈ hanic' tiempohal. 13Ebnaj lahon̈wan̈ tu', hunlahanxan̈e chute ebnaj isnabal cat yak'ni ebnaj yip yeb yahawilal tet naj Nok' isbi, 14cat yanico ebnaj howal yin̈ Comam oc xahanbalil. Yaja' chik'oji Comam yin̈ ebnaj, yuto ha' Comam tu' yahawil yin̈ ebnaj rey yeb yahaw Comam yin̈ ebnaj yahawil. Wal macta awtebil yu Comam yeb mac sic'bililoj, yeb macta yijem tet Comam, ayco isc'atan̈ yet chik'oji Comam yin̈ ebnaj tu', ẍi naj ángel. 15Yalnipaxo naj ángel tu' wetan: —Wal huntek'an ha ha' hawil bay tz'on̈anayo ix ix tx'oj ye iswi' tu', yechelej anma, yebej nime con̈ob yeb niẍte con̈ob, yebej anma nananta yabxubal. 16Ha' lahon̈eb yuc'a' naj Nok' isbi hawil tu' yechel ebnaj rey, ha' ebnaj chiyahnican̈ ix tx'oj ye iswi' tu' cat ist'ilbalax ix cat isbejlaxcano ix. Chic'uxlaxto isnimanil ix cat isn̈uslaxto xol k'a k'a'. 17Comam Dios anico yin̈ isc'ul ebnaj rey tu' iswatx'en haca' tzet choche Comam yuxin hunlahan yute ebnaj isnabal, yak'ni ebnaj sunil yip tet naj Nok' isbi masanta chij isba tzet halbilxatic'a yu Comam Dios. 18Wal hune' ix ix hawil tu', yechel hune' niman con̈ob ay yip yiban̈ sunil ebnaj rey ay yul sat yiban̈k'inal ti' ye ix, ẍi naj ángel.

will be added

X\