APOCALIPSIS 17

1Xol hujwan̈ ángel i'n̈e ch'en hujeb' sec' slahub'al huchan tu', ay hune' xhul tin c'atan̈an, xalni wetan: —Ton̈ win̈an, cat hin yeni huchan xtij yib'an̈ ix ich tx'oj ye swi' tawetan, ix tz'on̈an yib'an̈ hej ha' ha'. 2Sunil heb'naj rey ay satyib'an̈k'inal ti' xetatoj sb'a yin̈ ix. Hantaj mac ay sat tx'otx'otx', x'uc' can̈ yu xtx'ojal ye swi' ix. 3Lawitu' xquin can yalan̈ smay sk'ak'al Comam Espírituan. Xquin yinitoj ángel yul tajin̈ witz ac'alan, hat xwil hune' ix ixan, ahatoj ix yib'an̈ hune' ich nok' caj in̈ jilni yin̈. Tx'ihal b'ihe ẍhalni tx'oj yin̈ Comam Dios aycoj yin̈ no'. Hujeb' swi' no', lahun̈eb' yuc'a' no'. 4Hune' ix tu' caw ay yelaw xil sk'ap ix aycoj yin̈, ay caj wuk'wun̈e b'oj caj hatz'on̈e yilot. Oro yelaw aycoj, b'oj aycoj ch'en perla yin̈ b'oj hunk'aanxa ch'en ch'en c'ulch'an. Ib'il hune' copa nab'a' oro yu ix b'ay nohnajaytoj squistalil xtx'ojal ye swi' ix. 5Tz'ib'n̈eb'ilcoj hune' b'ihe caw c'ayb'alc'ule yin̈ spalan̈ ix, chalni yin̈ hacti': Ha' ich ti' con̈ob' Babilonia, smi' sunil heb'ix tx'oj ye swi' b'oj sunil hej squistalil ay satyib'an̈k'inal ti'. 6Lemb'il xwilnaan to caw uc'um ix yu schiq'uil mac yet-xa Comam Dios b'oj mactaj xpotx'ot yu ya'ni sb'a yin̈ Comam Jesús. Yet xwilni hune' tu'an xquin occan yin̈ c'ayc'ulalan. 7Yuxin xal ángel tu' wetan: —¿Tzet yuxin cach occan yin̈ c'ayc'ulal? Ẍwa'a' hawohtajn̈e'an tzet yelapnoj ye hune' ix ti', b'oj no' ich nok' b'ay ahatoj ix tu', hujeb' swi' no' b'oj lahun̈eb' yuc'a' no'. 8No' ich nok' xawil ti', ha' no' hune' xaxtic'a hulc'uj, matxacoj tinan̈, yaja' ẍto ahojiloj yul xab' yalan̈to maẍto ẍc'aylaxiloj. Caw ẍc'ayojiloj sc'ul anma ay sat tx'otx'otx' ti'. Ha' hunk'aan tu' machayoj sb'ih yul te' hum tz'ib'n̈eb'il yettax x'ichitij satyib'an̈k'inal, te hum b'ay ahayoj sb'ih mac ayxa sk'inal mach stan̈b'al. Ẍc'ayojiloj sc'ul anma tu' yet chilnoj no' ich nok' tu', haxca xax tan̈iloj no', matxac'oj no' tinan̈, yaja' chulujpax no' hunecxa. 9Ha' tzet ẍwal ti'an, ha' ch'a'noj cam xtxumu' mac ay stz'ajanil sc'ul: Hujeb' swi' no' tu' yechel hujeb' witz b'ay tz'on̈anatoj ix ich tx'oj ye swi' tu' yeyi. 10Yaja' yechel pax hujwan̈ heb'naj rey yeyi. Howan̈ heb'naj xax ayi. Hune'to naj aycoj yahawoj tinan̈. Hune'xa naj maẍto chuli, yaja' yet chuluj naj matxa nahatiloj ch'ocoj naj yahawoj. 11Hune'xa naj yin̈ heb'naj hujwan̈ rey tu' syeb'paxcan̈ sb'a cat yocoj naj swaxaj reyal. Ha' hune' naj tu', ha'tic'a no' ich nok' x'ec'le, matxac'oj tinan̈, haxa chuluj, b'ehxa sc'aylaxojiloj. 12Ha' lahun̈eb' uc'a' xawil tu', ha' lahun̈wan̈ heb'naj rey maẍto chichecoj yoc yahawoj. Yaja' hun schab' heb'naj schejb'anil b'oj no' ich nok' tu', hun ch'ocoj heb'naj yahawoj hanic'ojxa b'oj no'. 13Heb'naj lahun̈wan̈ rey tu' slahtin̈e sb'a heb'naj ya'ni scan̈il ye b'oj schejb'anil tet no' ich nok' tu'. 14Yamanxa ye heb'naj b'oj no' ich nok' tu' cat yocoj heb'naj ya'noj howal yin̈ Comam Canelu sb'ih b'oj mactaj aycoj yin̈ Comam. Yaja' ch'ayoj heb'naj yu Comam, haxca Yahaw Comam yin̈ mac yahaw, Rey yin̈ heb'naj rey. Mactaj ayxacoj yul sk'ab' Comam tu', ha' hunk'aan tu' awteb'il b'oj sic'leb'il yu b'oj yijyom. 15Xalnipaxoj: —Ha' ha' b'ay tz'on̈an ix tx'oj ye swi' tu', ha' hej con̈ob', ha' hej hun tenan anma, ha' hej nación, ha' hej anma nanan yab'xub'al. 16Ha' lahun̈eb' uc'a' xawil tu' b'oj no' ich nok' tu', ha' hunk'aan tu' ẍyahnojcan̈ ix tx'oj ye swi tu'. Ch'a'laxojcan ix yin̈ sc'antajil, cat ẍch'ob'b'alaxojcan ix. Ẍc'uxu'toj schib'eal ix cat ẍn̈uslaxojtoj ix xol k'a' k'a'. 17Comam Dios x'anicoj yin̈ sc'ul hunk'aan heb'naj rey tu' slahtin̈en sb'a ya'ni schejb'anil tet no' ich nok', masanto chija' sb'a tzet halb'ilcan yu Comam. 18Ix ich xawil tu', ha' ich niman con̈ob' yahaw ye yin̈ sunil heb'naj rey ay satyib'an̈k'inal ti' yeyi.


Copyright
Learn More

will be added

X\