APOCALIPSIS 16

1Lawitu' xwab'en yeliloj hune' tzoti' caw ip yul yatut Comam Diosan, chalni tet hujwan̈ ángel tu': —As hamwejayoj hujeb' sec' i'n̈e showal Comam Dios yib'an̈ tx'otx'otx'. 2Xtona b'ab'el ángel shamniaytoj sec' yib'an̈ tx'otx'otx', x'ahiloj tx'ac caw tx'oj b'oj caw ya' yin̈ hantaj anma aycoj yechel mac Nok' sb'ih tu' yin̈, mac xhak'en yechel. 3Ha' scab' ángel shamaytoj sec' yul ha' mar, lemb'il xcaj pan̈iloj ha' haca' chic', xcamiloj sunil snok'al ha'. 4Ha' syox ángel shamaytoj sec' yul hej ha' ha' b'oj niẍtej snuk' ha', lemb'il xpaq'ui ha' chic'al, haca schiq'uil camom xuluj ha'. 5Lawitu' xwab'en yalni hune' ángel yetwanoj yetantoj ha' ha' tu'an: —Hach Jahaw, caw tohol hawi'ni cuenta yin̈ anma. Hach ayach tinan̈ b'oj ayachn̈etic'a, caw mach hunuj hawet lahan. 6Haxca hunk'aan anma ti' xmalnitoj schiq'uil mactaj ab'ilxacoj sb'a yul ha k'ab' b'oj heb'ya' ha chejab'lom. Tinan̈ yettic'a aya chawa' chic' yuc'u' hunk'aan potx'waom tu'. 7Xwab'en yeliloj hune' tzoti' b'et altaran, chalni yin̈ hacti': —Ho' Dios Jahaw, Dios Sunil Chu Yu, caw st'in̈anil b'oj stoholal hawinojcan̈ ha b'a yin̈ anma. 8Hune' scan̈ ángel, shamaytoj sec' yib'an̈ tz'ayic, schanican tz'ayic tu' scan̈il ye sn̈usni anma yu sk'ak'al. 9Sunil mac caw stz'a' yu sk'ak'al tu', yaja' mach sb'ejcan xtx'ojal, machca xacoj smay Comam Dios, to x'oc yala' tzoti' caw tx'oj yin̈ Comam, Comam ay scan̈il ye yib'an̈ hunk'aan huchan ti'. 10Ha' sho' ángel shamaytoj sec' yib'an̈ stz'on̈ob'al mac Nok' sb'ih tu', xk'ejholiloj sunil b'ay aycoj yahawoj tu'. Sunil anma xtx'ayoj yak' yu sya'il. 11Matoj haxca hactu', sb'ejcan yuni xtx'ojal, to x'oc yala' tzoti' tx'oj yin̈ Comam Dios ay satcan̈, yu sya'il chab'e b'oj yu hej tx'ac x'ahiloj yin̈. 12Ha' swaj ángel shamaytoj sec' yul ha' niman Éufrates, yuxin xtan̈toj ha', hactu' xu scan hune' b'eh tet heb'naj rey b'oj soldado ẍtit b'ay ch'ahiloj tz'ayic. 13Xwilni yelpaxiloj oxwan̈ yespíritu naj matzwalilan, haca' no' pahtza' jilni. Hune' espíritu x'eltij yul sti' ich niman lab'ah, hunxa x'eltij yul sti' mac Nok' sb'ih, hunxa x'eltij yul sti' naj lek'ti chejab'lom. 14Hunk'aan espíritu tu' xyeni c'ayb'alc'ule, ch'ec' syamb'anojcoj sunil heb'naj rey ay satyib'an̈k'inal ti' yu yoc heb'naj yin̈ howal yin̈ hune' tz'ayic caw ay yelapnoj yeyi, yet chinojcan̈ sb'a Comam Dios yin̈ anma, Comam Sunil Chu Yu. 15Xalni Comam Cristo: Nawej he b'a. Toxa chin huluj lemna haca' hune' naj elk'oman. Sak'al yet mac itz'atn̈etic'a yeyi b'oj yan̈eb'il xil sk'ap yu, yun̈e mat t'eb'anoj ch'ec'oj, mach'ila' snimanil k'a' ewan yeyi. 16Hat xyamb'alax sunil heb'naj rey b'oj heb'naj soldado b'et hune' ac'al ẍal-lax Armagedonal. Hactu' sb'ih yin̈ ab'xub'al hebreo. 17Ha' shuj ángel shamtoj sec' xol cak'e'. Hunip tu' x'eliloj hune' tzoti' caw ip yul yatut Comam Dios sataj stz'on̈ob'al, chalni yin̈ hacti': —Wal tinan̈ xax yijcan sb'a sunil. 18Lawitu' x'ay tzejna cayompa, b'oj huyanxan̈e hunk'aanxa tzetet, b'oj tz'ito yay c'uh, caw x'ec' chixcab'. Yichotax ay anma satyib'an̈k'inal ti' mach hunecoj xa' chixcab' caw ip haca' hune' ti'. 19Ich niman con̈ob', oxeb' x'aycoj, sunil hej con̈ob' ay satyib'an̈k'inal ti' x'ec' wejnayi. Xtitcan̈ ich con̈ob' Babilonia yin̈ sc'ul Comam Dios, xa'ni Comam vino ahaytoj yul scopa yuc'u', ha' chaliloj hune' ti' showal Comam xaytoj yib'an̈ hune' con̈ob' tu'. 20Sunil hej isla b'oj hej witz xc'aycan̈. 21B'oj x'ay ch'en nimejtaj sajb'at yib'an̈ anma, squintalil xam yalil ch'en. Xalni anma tzoti' tx'oj yin̈ Comam yu hej huchan xu tu', haxca caw nimej huchan xui.


Copyright
Learn More

will be added

X\